විෂ සහිත කෘතිම කඩදාසිවලින් මුද්‍රණය කළ සියලු පාසල් පෙළපොත් දරුවන් වෙතින් ඉවත් කර වගකිවයුත්තන්ට එරෙහිව වහා දඬුවම් ලබාදෙන ලෙසට රජයේ වෛද්‍ය නිලධාරීන්ගේ සංගමයේ ලේකම් වෛද්‍ය නවීන් ද සොයිසා මහතා ජනාධිපතිවරයාගෙන් ඉල්ලා සිටී.
‘හොඳම දේ දරුවන්ට’ යෑයි වැඩිහිටියන් විසින් නිතර කරන ප්‍රකාශය දේශපාලකයන් විසින් ක්‍රියාවෙන් වෙනස්‌ කර ඇතැයි පවසන වෛද්‍ය නවීන් ද සොයිසා මහතා දරුවන්ගේ සෞඛ්‍යයට බරපතළ තර්ජනයක්‌ විය හැකි විෂ සහිත කෘතිම කඩදාසිවලින් මුද්‍රණය කළ පාසල් පෙළපොත් බෙදාහැරීමට කටයුතු කරමින් සිටින බව ද කීවේය.
මෙම කෘතිම පෙළපොත් මුද්‍රණය කර ඇත්තේ මුදල් අමාත්‍යාංශයේ නිර්දේශයන්ට ද පටහැනිව බව පවසන වෛද්‍ය නවීන් ද සොයිසා මහතා විද්වත් වාර්තා සැලකිල්ලට නොගෙන සිදුකළ මෙම අත්තනෝමතික ක්‍රියාකාරකම පිළිබඳ වගකිවයුත්තන්ට දඬුවම් කළ යුතු බව ද ප්‍රකාශ කළේය.
