ශ්‍රී ලංකා නිදහස් පක්ෂ කොළඹ දිස්ත්‍රික් නායක පාර්ලිමේන්තු මන්ත්‍රී තිලංග සුමතිපාලට ශ්‍රී ලංකා පොදුජන පෙරමුණේ පළමු ජාතික සම්මේලනයට සහභාගී වීම සඳහා සිදුකොට තිබූ ආරාධනය සම්බන්ධයෙන් එම පක්ෂයෙන් නායක හිටපු ජනාධිපති සහ වත්මන් විපක්ෂ නායක මහින්ද රාජපක්ෂ මහතා වෙත ලිපියක් යවමින් ඉතාමත් තීරණාත්මක කරුණු කිහිපයක් අවධාරණය කොට ඇත.
මෙහිදී තිලංග සුමතිපාල මහතා ප්‍රථමයෙන් තමාට කළ ආරාධනය සම්බන්ධයෙන් ශ්‍රී.පො.ජ.පෙ. නායක මහින්ද රජාපක්ෂ මහතා වෙත සිය ගෞරව පුදකොට ඇති අතර 2009 වසරේදී කොළඹ දිස්ත්‍රික්කයෙන් මනාප 160,000ක් ඉක්මවමින් පළාත් සභාවට පත්වෙමින් දේශපාලනයට අවතීරණය වීම සඳහා මහින්ද රාජපක්ෂ මහතා ලබාදුන් සහය සහ මඟ පෙන්වීම ගෞරවයෙන් යුතුව සිහිපත් කොට ඇත.
එසේම පසුගිය මහමැතිවරණයේදී තම සන්ධානයේම පිරිසක් විසින් ඉතා සංවිධානාත්මක තමාව පරාජය කිරීමෙන් අනතුරුව අහිමි වූ පාර්ලිමේන්තු අසුන තමා ශ්‍රී ලංකා නිදහස් පක්ෂය වෙනුවෙන් කළ කැප කිරීම හොඳින්ම දන්නා ශ්‍රීලනිප සභාපති ජනාධිපති මෛත්‍රීපාල සිරිසේන මහතා විසින් තමාට ජාතික ලැයිස්තුවෙන් යළි ලබාදෙමින් පාර්ලිමේන්තුවේ නියෝජ්‍ය කතානායක ලෙසට ඔසවා තැබූ ජනාධිපති මෛත්‍රීපාල සිරිසේන මහතාට තම ගෞරවාදරය නිතැතින්ම පුදකරන බවත් එම කෘතවේදීත්වය කිසිදා අමතක කළ නොහැකි බවත් සුමතිපාල මහතා මහින්ද රාජපක්ෂ මහතා වෙත යොමු කළ ලිපියේ වැඩිදුරටත් සඳහන්.
එසේම පසුගිය 2018 වසරේදී ජනාධිපති මෛත්‍රීපාල සිරිසේන මහතාත්, මහින්ද රාජපක්ෂ මහතාව අගමැති කරමින් නව ආණ්ඩුවක් නිර්මාණය කිරීමට ගත් වෙහෙස සහ උත්සහය අපමණ බවත් එම ඔබතුමා හොදින් දන්නා කරුණකි. තවද ශ්‍රී ලංකා නිදහස් පක්ෂය සහ ශ්‍රී පොදු ජන පෙරමුණ අතර බිඳ වැටුණු සබඳතා යළි ගොඩනඟමින් ශ්‍රීලනිප, ශ්‍රිලපොපෙ අතර නව සන්ධානයක් ගොඩනැඟුමේ කටයුතු කරන ලද්දේද මහින්ද රාජපක්ෂ මහතාගේ සහ ජනාධිපතිතුමාගේ පූර්ණ ආශිවාර්දය යටතේ වන අතර එය දැන් අවසන් අදියරට පැමිණ තිබෙන බවයි.
මෙහිදී වැඩිදුරටත් අදහස් දක්වා ඇති තිලංග සුමතිපාල මහතා පවසා ඇත්තේ, මහින්ද රාජපක්ෂ මහතා සහ මෛත්‍රීපාල සිරිසේන මහතා එකම ජනාධිපති අපේක්ෂකයෙකු වෙනුවෙන් එකම වේදිකාවක සිටිනු දැකීම තම ඒකායන ප්‍රාර්ථනය බවයි.
තවද ඔබ දෙපළ එක්ව නම් කරන ජනාධිපති අපේක්ෂකයා දිනවීමේ ක්‍රියාන්විතය තමා කිසි විටෙකත් අමතක නොකරන බව පවසා ඇති සුමතිපාල මහතා ශ්‍රීලනිපය සහ ශ්‍රීලපොපෙ එක්කිරීමේ කර්තෘවය සාර්ථක වනු ඇතැයි විශ්වාසය පළ කර සිටී. එසේම මෙම සම්මේලනයට සහභාගී වීම සඳහා කළ ආරාධනය ගෞරවයෙන් යුතුව පිළිගන්නා බවත් ශ්‍රී ලංකා නිදහස් පක්ෂයේ සාමාජිකයෙකු වශයෙන් පක්ෂයේ ප්‍රතිපත්තිවලට ගරු කරමින් මේ සඳහා තමා පෞද්ගලික සහභාගී නොවන බවත් තිලංග සුමතිපාල මහතා විසින් මහින්ද රාජපක්ෂ මහතා වෙත යොමු කළ ලිපියේ වැඩිදුරටත් සඳහන් කර ඇත.
