එක්සත් ජාතික පක්ෂය පෙරටු කරගත් “ප්‍රජාතන්ත්‍රවාදී ජාතික පෙරමුණ” ගොඩනඟමින් අනෙකුත් පක්ෂ සන්ධාගත කරගැනීමට අදාළව එජාපයේ මහලේකම් අඛිල විරාජ් කාරියවසම් මහතා ඇතුළු ප්‍රධානීන් පිරිසක් අද(17) පෙරවරුවේ සෞඛ්‍ය අමාත්‍ය රාජිත සේනාරත්න මහතාගේ කොළඔ පිහිටි නිල නිවසේදී විශේෂ සාකච්ඡාවක නිරත විය.
මේ සඳහා එක්සත් ජාතික පක්ෂයේ නියෝජ්‍ය නායක සජිත් ප්‍රේමදාස, මහ ලේකම් අකිල විරාජ් කරියවසම්, මංගල සමරවීර, කබීර් හෂීම්, නවීන් දිසානායක, රාජිත සේනාරත්න, මනෝ ගනේෂන් යන අය සහභාගී වී ඇත. පැය දෙක හමාරකට ආසන්න කාලයක් පැවති මෙම සාකච්ඡාවේදී ප්‍රජාතන්ත්‍රවාදී ජාතික පෙරමුණේ ව්‍යවස්ථා සකස් කර අවසන් කිරීම, සන්ධානය පිහිටුවන දිනය පිළිබඳ තීන්දුවක් ගැනීම සහ සන්ධානය පිහිටුවන දිනයේම අපේක්ෂකයා නම්කිරීම යන ප්‍රධාන කරුණු 03 සම්බන්ධයෙන් ප්‍රධාන වශයෙන් අවධානය යොමු කර ඇත.
මෙම කරුණු ඉදිරි දින කිහිපයේදී සාකච්ඡා කොට අවසන් කරගැනීමට දින නියම කරගෙන ඇති අතර ඒවා අවසානයේ එක්සත් ජාතික පක්ෂ පාර්ලිමේන්තු මන්ත්‍රී කණ්ඩායමේ සහ කෘත්‍යාධීකාරී මණ්ඩලයට යොමු කොට අනුමැතිය ලබාගෙන ඉදිරිපත් කිරීමට එකඟ වී ඇත.
එසේම සන්ධානය ගොඩනැඟීමට ප්‍රථම ජනාධිපති අපේක්ෂකයා නම් කර සිටින්නැයි සජිත් පාර්ශවයෙන් යෝජනාවක් ඉදිරිපත් වී ඇති අතර, මෙතෙක් ප්‍රකාශයට පත්නොකළ ජනාධිපතිවරණයක් සඳහා “ගෝඨාභය නඩුවලින් කට්ටි පැනයාමට සිදුකරන උපක්‍රම” වලට රැවටී අපි ඉල්ලන් කෑමට ජනාධිපති අපේක්ෂකයෝ පත් නොකල යුතුයැ’යි රාජිත සේනාරත්න අමාත්‍යවරයා පැවසීමත් සමඟම සජිත්ගේ පංචාකාර මුහුණ චතුරෂ්ෂාකාර වී ඇත.
ඒත් සමඟම සජිත්ගේ අටපට්ටම් වුණු මුහුණ දෙස බැලූ මංගල එල්ල වුණු ප්‍රහාරය අස්වැසීම සඳහා “නැහැ අපි පාක්ෂිකයින්ට පොඩි කාලෙකට මොරාල් එකක් දෙන්නත් එක්ක ජනාධිපති අපේක්ෂකයා කියන එකත් එළියට දාමු” යැයි කියද්දී මේ වන විට නිදිවැද සිටින පාක්ෂිකයින්ට එය යම් උත්තේඡනයක් වන බව වටහා ගත් එජාප ප්‍රධානීන් ඊට එකඟ වී ඇත්තේ, එනම් ප්‍රජාතන්ත්‍රවාදී ජාතික පෙරමුණ ගොඩනඟන දවසේදීම අපේක්ෂකයාත් නම් කරනු යැයි අදහසටය.
ඊට වේදිකාවේ අමුතුම ආකාරයේ කථා ගොතන එජාප නියෝජ්‍ය නායක සජිත් ප්‍රේමදාස සද්ද නැතිව එකඟ වී ඇත්තේ සජිත් වෙනුවෙන් කඩේ ගිය අයවලුන්ද අනාථ කරවිමිනි. කෙසේ වෙතත් මේ අනුව තීරණය වී ඇත්තේ “ප්‍රජාතන්ත්‍රවාදී ජාතික පෙරමුණ” නම් සන්ධානය බිහිකරන දිනයේදීම ජනාධිපති අපේක්ෂකයෙකු නම් කිරීමයි.
