රටේ ඒකීයභාවයට හානි වන කිසිදු ව්‍යවස්ථාවක් සම්පාදනය කිරීමට තමා ඉඩ නොතබන අතර, දැනට පවතින ව්‍යවස්ථාව තුළ බෞද්ධාගම සම්බන්ධයෙන් සඳහන්වන කිසිදු වගන්තියක් ඉවත් කිරීමට හෝ බාල කිරීමට ඉඩ නොතබන බව ද ජනාධිපති මෛත්‍රීපාල සිරිසේන මහතා අවධාරණය කළේය.
ජනාධිපතිවරයා ඒ බව අවධාරණය කළේ ගිරාඹේ මංගල නායක ස්වාමින්වහන්සේ වෙත උඩරට අමරපුර සාමග්‍රී සංඝ සභාවේ මහානායක පදවිය පිළිබඳ ශ්‍රී සන්නස් පත්‍ර පිළිගැන්වීම වෙනුවෙන් පසුගියදා (29) පස්වරුවේ අම්පාර ගැමුණුපුර බෞද්ධ මධ්‍යස්ථානයේ පැවති පුණ්‍යෝත්සවය අමතමිනි. නව ආණ්ඩුක්‍රම ව්‍යවස්ථාවක් සම්පාදනය කිරීම පිළිබඳ ඉදිරිපත් කර ඇති වාර්තාව තුළ කිසිදු ආකාරයෙන් සන්ධිය රාජ්‍ය සංකල්පයක් අර්ථ නිරූපණය නොවන බව ජනාධිපතිවරයා පෙන්වා දුන්නේය.
නව ආණ්ඩුක්‍රම ව්‍යවස්ථාවක් සම්පාදනය කිරීම පිළිබඳ ඉදිරිපත්වී ඇති යෝජනාවලිය තුළ කිසිදු ආකාරයේ රට කඩන හෝ රට බෙදන කරුණක් ඇතුළත් නොවන බවද මෙහිදී මහා නායක හිමිවරුන් ඉදිරියේ අවධාරණය කළ ජනාධිපතිවරයා නව ආණ්ඩුක්‍රම ව්‍යවස්ථාවක් සැකසීම කෙරෙහි කිසිදු දළ කෙටුම්පතක් හෝ මේ වන තෙක් සකස් කර නොමැති අතර සියලූදෙනාගේ අදහස් සහ යෝජනා ලබාගනිමින් පාර්ලිමේන්තුවට ඉදිරිපත් කර තිබෙන වාර්තාව ද සියලූ ක්ෂේත්‍රවල සාකච්ඡාවට, සංවාදයට මෙන්ම සංශෝධනවලට ඉඩ ලබාදෙමින් ඉදිරිපත් කර තිබෙන බව සඳහන් කළේය.
උතුරු නැගෙනහිර ජනතාව මුහුණ දී තිබෙන ගැටලූවලට විසදුම් ලබාදීම, ස්ථිර සාමයක් රට තුළ පවත්වාගෙන යාම, නැවත යුද්ධයක් ඇති නොවන ආකාරයෙන් සියලූ ජන කොටස් අතර සහජීවනය සහ සංහිඳියාව ගොඩනැගීම යන කරුණු කෙරෙහි රජය ප්‍රමුඛ අවධානයක් යොමු කරමින් කටයුතු කරන බවද ජනාධිපතිතුමා මෙහිදී සඳහන් කළේය.
නැවත රට තුළ යුද්ධයක් ඇතිවන බවට අදහසක් හෝ රටේ ජනතාව තුළ ඇතිවුවහොත් යළිත් රට අදුරු ප්‍රපාතයකට ඇද වැටෙන බව ද මෙහිදී පෙන්වා දුන් ජනාධිපතිවරයා එම අදහසක් හෝ ජනතාව තුළ ඇති වීමට ඉඩ නොතබා සියලූ ජන කොටස් අතර සහජීවනය සහ විශ්වාසය ගොඩනැගීමට රජය කැපවී සිටින අතර මෙම සංහිඳියා වැඩපිළිවෙළ සාර්ථක කර ගැනීම සඳහා එකම මේසයකට රැස්ව සාකච්ඡා කරන ලෙස තමා මහානායක හිමිවරුන්ගෙන් මෙන්ම හින්දු, ඉස්ලාම්, කතෝලික සියලූ ආගමික නායකයින්ගෙන් නැවතත් ඉල්ලා සිටින බව ද ප්‍රකාශ කළේය.
අභිනව මහානායක ධූරයෙන් පිදුම් ලද පූජ්‍ය ගිරාබේ මංගල මහානායක ස්වාමින් වහන්සේගේ ශාසනික සහ සාමාජයීය මෙහෙවර මෙහිදී ඇගයීමට ලක් කළ ජනාධිපතිතුමා යහපත් මෙන්ම හරවත් සමාජයක් ගොඩනැගීමට මෙන්ම ආදර්ශමත් රටක් ගොඩනැගීමට උන්වහන්සේ සිදුකරන කැපවීම ඇගයීමට ලක් කළේය.
