ජනාධිපති මෛත්‍රීපාල සිරිසේන මහතා විසින් ශ්‍රී ලංකා පොලිසිය තම යටතට ගත් පසුව මෙරට ඉතිහාසයේ පෙර නොවූ විරූ ලෙස හොරොයින් ඇතුළු මත්කුඩු තොගපිටින් අත් අඩංගුවට ගැනීමට ශ්‍රී ලංකා පොලිසිය කටයුතු කරමින් සිටීම පෙර සිටි දේශපාලනඥයින් මත්ද්‍රව්‍ය ජාවාරම සඳහා කොතරම් අනුග්‍රහයක් සහ සහයෝගයක් ලබාදී ඇති බව ඇස්පනාපිට සාක්ෂි සහිතව ඔප්පු වෙමින් පැවතීම සුවිශේෂීය.
ඒ අනුව ඊයේ(31) දිනයේ රුපියල් කෝටි 440 කට අධික වටිනාකමින් යුත් මත් කුඩු කිලෝග‍්‍රෑම් 275 ක් සමග බංග්ලාදේශ ජාතිකයන් දෙදෙනකු දෙහිවල, කව්ඩාන පාරේ සුපිරි දෙමහල් නිවසකදී අත්අඩංගුවට ගැනීමට පොලිස් මත්ද්‍රව්‍ය කාර්යාංශය සහ පොලිස් විශේෂ කාර්ය බළකාය සමත් විය.
මෙම සුපිරි දෙමහල් නිවස මොවුන් ලංකාවටම මත් කුඩු බෙදාහරින ප්‍රධානතම ගබඩාව ලෙස භාවිත කර ඇතැයි හෙළිවූ බව ජ්‍යෙෂ්ඨ පොලිස් නිලධාරියෙක්‌ පැවසීය.
ලංකාවේ මෙතෙක්‌ හමුවූ විශාලතම මත් කුඩු තොගය මෙය බවද එම නිලධාරියා කීවේය.
මොවුන් මෙම මත් කුඩු ඇෆ්ගනිස්‌ථානයේ සිට නැව් මගින් සහ ගුවන් මගින් ගෙන්වා පසුව වාහන වලින් සුපිරි දෙමහල් නිවසට රැගෙනවිත් ගබඩා කර ඇතැයි හෙළිවූ බවද එම නිලධාරියා කියා සිටියේය.
මාස කීපයක සිට කුලී පදනම මත මේ නිවසේ හිඳිමින් ඔවුන් මෙම මහා පරිමාණ මත් කුඩු ජාවාරමේ නියෑළී ඇතැයි හෙළිවූ බවද මත් කුඩු ජාවාරමෙන් උපයාගත් මුදල්වලින් මෙම බංග්ලාදේශ ජාතිකයන් දෙදෙනා කොළඹ සුපිරි නිවාස හා ගොඩනැඟිලි පවා මිලදී ගෙන ධනවතුන් බවට පත්ව ඇතැයි හෙළිවූ බවද හෙතෙම සඳහන් කළේය.
අවුරුදු 35 හා 38 වයසේ පසුවන මෙම බංග්ලාදේශ ජාතිකයන් දෙදෙනාගෙන් තවදුරටත් ප්‍රශ්න කරගෙන යන බවද අත්අඩංගුවට ගත් මත් කුඩු තොගය තවදුරටත් කිරමින් සිටින බවද එම නිලධාරියා කියා සිටියේය.
පොලිස් මත් ද්‍රව්‍ය කාර්යාංශයේ නියෝජ්‍ය පොලිස්‌පති සජීව මැදවත්ත මහතාගේ අධීක්‍ෂණය යටතේ අධ්‍යක්‍ෂ ජ්‍යෙෂ්ඨ පොලිස් අධිකාරි ධනපාල, ප්‍රධාන පොලිස් පරීක්‍ෂක ධර්මප්‍රිය, පොලිස් පරීක්‍ෂක කේ. ඒ. ප්‍රේමලාල් යන මහත්වරුන් සහ පොලිස් විශේෂ කාර්ය බළකායේ අණදෙන නිලධාරි ජ්‍යෙෂ්ඨ නියෝජ්‍ය පොලිස්‌පති එම්. ආර්. ලතීෆ් මහතාගේ අධීක්‍ෂණය යටතේ එම බළකායේ නිලධාරීන් කණ්‌ඩායමක්‌ එක්‌ව මෙම වැටලීම සිදුකර ඇත.
