ශ්‍රී ලංකාවේ ජනාධිපති රනිල් වික්‍රමසිංහ ප්‍රතිපත්ති ප්‍රතිසංස්කරණ, පාලනය, ධාරිතා ගොඩනැගීම, ඩිජිටල්කරණය සහ රාජ්‍ය සේවා සැපයීම ස්ථාපිත කිරීම සඳහා ඉන්දියාවේ සහාය ඉල්ලා ඇත.
ඉන්දියාවේ පුද්ගල, මහජන දුක්ගැනවිලි සහ විශ්‍රාම වැටුප් අමාත්‍යාංශය විසින් අඟහරුවාදා නිකුත් කරන ලද නිල ප්‍රකාශයකට අනුව, ඉන්දීය නියෝජිත පිරිසක් සමඟ පැවති සාකච්ඡාවකදී, ඩිජිටල් පාලනය සහ සහභාගීත්ව ප්‍රතිපත්ති සම්පාදනය පිළිබඳ ඉන්දියාවේ අත්දැකීම් මත පදනම්ව ජනාධිපති වික්‍රමසිංහ අවශ්‍ය උපකාර ඉල්ලා සිටියේය.
මෙය ශ්‍රී ලංකාව සඳහා වේගවත් සමාජ-ආර්ථික සංවර්ධනයක් සහ ඉහළ ආර්ථික වර්ධනයක් සහතික කරනු ඇති බව ඔහු ඉන්දීය යහපාලනය සඳහා වූ ජාතික මධ්‍යස්ථානයේ අධ්‍යක්ෂ ජනරාල් භාරත් ලාල් ප්‍රමුඛ නියෝජිත පිරිසට පැවසීය. සෙනසුරාදා පැවති මෙම හමුවට ශ්‍රී ලංකාවේ ඉන්දීය මහ කොමසාරිස් ගෝපාල් බග්ලේ සහ ශ්‍රී ලංකා ජ්‍යෙෂ්ඨ නිලධාරීන් එක්ව සිටියහ. ශ්‍රී ලංකාව තුළ පාලන හා රාජ්‍ය ප්‍රතිපත්ති පිළිබඳ විශ්වවිද්‍යාලයක් පිහිටුවීමට සහාය වන ලෙස ද ශ්‍රී ලංකා ජනාධිපතිවරයා ඉන්දීය යහපාලනය සඳහා වූ ජාතික මධ්‍යස්ථානයේ අධ්‍යක්ෂ ජනරාල් වෙතින් ඉල්ලා සිටියේය.
මෙම හමුවේදී ජනාධිපති වික්‍රමසිංහ මහතා ශ්‍රී ලංකාව පිළිබඳ සිය දැක්ම බෙදාගත් අතර, මෑතකාලීන ආර්ථික අභියෝගවලට මුහුණදීමේ උපාය මාර්ගයක් සහ රට ඉහළ ආර්ථික වර්ධන මාවතකට ගෙන ඒමේ උපාය මාර්ගය පැහැදිලි කළේය. මෙම සාකච්ඡාව ප්‍රතිපත්ති ප්‍රතිසංස්කරණ, යහපාලනය, ඩිජිටල්කරණය, ධාරිතා ගොඩනැගීම සහ පුහුණුව, ආයතන ගොඩනැගීම සහ සහතික වූ රාජ්‍ය සේවා සැපයීම පිළිබඳව කේන්ද්‍රගත වූ බව නිල ප්‍රකාශයේ සඳහන් වේ.
නිල ප්‍රකාශයට අනුව, ශ්‍රී ලංකාව ඉන්දියාවේ ප්‍රතිපත්ති මත පදනම් වූ පාලන ආකෘතිය සහ විවිධ වැඩසටහන් සහ ව්‍යාපෘති සැලසුම් කිරීම, ක්‍රියාත්මක කිරීම සහ අධීක්ෂණය කිරීමේදී ඩිජිටල් තාක්‍ෂණය විශාල වශයෙන් භාවිතා කිරීම ඉගෙන ගැනීමට උනන්දු වෙයි.
මෑත කාලීන පෙර නොවූ විරූ ආර්ථික අර්බුදයකදී ඉන්දියාව ශ්‍රී ලංකාවට ලබා දුන් තිරසාර සහය සඳහා ඉහළ පෙළේ සිවිල් සේවකයින් සිය ප්‍රශංසාව පළ කළ බව එම නිවේදනයේ වැඩිදුරටත් සඳහන් වේ.
ඉන්දීය අග්‍රාමාත්‍ය නරේන්ද්‍ර මෝදි විසින් පුරවැසි කේන්ද්‍රීය ප්‍රතිපත්ති සහ යහපාලනයේ නව සංස්කෘතියක් හඳුන්වා දී ඇති අතර එහි ප්‍රතිඵලයක් ලෙස ඉන්දියාව ඉහළ ආර්ථික වර්ධනයක්, සහතික වූ රාජ්‍ය සේවා සැපයීමක් සහ ජීවන තත්ත්වය වේගවත් දියුණුවක් අත්කර ගනිමින් සිටින ආකාරය ඉන්දීය යහපාලනය සඳහා වූ ජාතික මධ්‍යස්ථානයේ අධ්‍යක්ෂ ජනරාල්වරයා අවධාරණය කළේය.
ඉන්දියා නිවුස් නෙට්වර්ක්ස්
