ඉන්දියාව සහ ඕස්ට්‍රේලියාව ත්‍රස්තවාදය එහි සියලු ආකාරවලින් සහ ප්‍රකාශනයන් දැඩි ලෙස හෙළා දැක තිබේ.
ත්‍රස්තවාදයට එරෙහි ඉන්දීය-ඕස්ට්‍රේලියා ඒකාබද්ධ ක්‍රියාකාරී කණ්ඩායමේ 13 වැනි රැස්වීමේදී දෙපාර්ශවයම දේශසීමා ත්‍රස්තවාදය සඳහා ත්‍රස්තවාදී ප්‍රොක්සි භාවිතා කිරීම හෙළා දුටු බව ඉන්දීය විදේශ කටයුතු අමාත්‍යාංශයේ ඒකාබද්ධ මාධ්‍ය නිවේදනය උපුටා දක්වමින් ඉන්දියා නිවුස් නෙට්වර්ක්ස් වාර්තා කරයි.
එම නිවේදනයට අනුව, ත්‍රස්තවාදයට එරෙහිව තිරසාර ලෙස සටන් කිරීම සඳහා ජාත්‍යන්තර සහයෝගීතාව ශක්තිමත් කිරීමේ අවශ්‍යතාවය දෙපාර්ශ්වයම අවධාරණය කළහ.
දෙරට අතර දැනට ක්‍රියාත්මක ත්‍රස්ත විරෝධී සහයෝගීතාව පිළිබඳ සාකච්ඡාවලදී, ඉන්දියා-ඕස්ට්‍රේලියා විස්තීරණ උපායමාර්ගික හවුල්කාරිත්වයේ මෙම වැදගත් අංගය සම්බන්ධීකරණය කිරීමට සහ සහයෝගීව කටයුතු කිරීමට දෙපාර්ශ්වයම ඔවුන්ගේ කැපවීම අවධාරණය කළහ.
මෙම හමුව බදාදා ඔස්ට්‍රේලියාවේ කැන්බරා නුවරදී පැවැත්විණි.
තම පාලනය යටතේ පවතින කිසිදු ප්‍රදේශයක් ත්‍රස්තවාදී ප්‍රහාර සඳහා යොදා නොගැනීම සහ එවැනි ප්‍රහාරවල අපරාධකරුවන්ට කඩිනමින් යුක්තිය පසිඳලීම සඳහා සියලු රටවල් ක්ෂණික, තිරසාර, සත්‍යාපනය කළ හැකි ක්‍රියාමාර්ග ගැනීමේ හදිසි අවශ්‍යතාව ඉන්දියාව සහ ඕස්ට්‍රේලියාව අවධාරණය කර ඇත.
“26/11 මුම්බායි, පතන්කොට් සහ පුල්වාමා ප්‍රහාර ඇතුළුව ඉන්දියාවේ ත්‍රස්තවාදී ප්‍රහාර හෙළා දකීන බවත් ත්‍රස්තවාදයට එරෙහි ගෝලීය සටනේදී ඉන්දීය රජයට සහය දක්වන බවත් ඕස්ට්‍රේලියාව නැවත වරක් අවධාරණය කළේය.
ඉන්දියාව සහ ඕස්ට්‍රේලියාව රැඩිකල්කරණය සහ ප්‍රචණ්ඩ අන්තවාදයට එරෙහිව සටන් කිරීම ඇතුළුව ත්‍රස්ත විරෝධී ක්ෂේත්‍රයේ සහයෝගීතාවයේ විවිධ ක්ෂේත්‍ර වන ත්‍රස්තවාදයට මුදල් සැපයීමට එරෙහිව සටන් කිරීම; ත්‍රස්තවාදයට එරෙහිව සටන් කිරීමේ මෙවලමක් ලෙස ත්‍රස්තවාදී පුද්ගලයන් සහ ආයතන තහනම් කිරීම; ත්‍රස්තවාදය සඳහා අන්තර්ජාලය සූරාකෑම වැළැක්වීම; නීතිය ක්‍රියාත්මක කිරීමේ සහයෝගීතාව; තොරතුරු හුවමාරු කිරීම සහ ධාරිතාව ගොඩනැගීම ආදීය පිළිබඳව ද අදහස් හුවමාරු කර ගත්හ.
මෙම අභියෝගවලට ප්‍රතිචාර දැක්වීම සඳහා සමීපව එක්ව කටයුතු කිරීමට දෙපාර්ශ්වයම තම කැපවීම යලි තහවුරු කළහ.
දෙපාර්ශවය එක්සත් ජාතීන්ගේ සංවිධානය, ජී20, ගෝලීය ත්‍රස්ත විරෝධී සංසදය, ආසියාන් ප්‍රාදේශීය සංසදය, ඉන්දියානු සාගර රිම් සංගමය සහ ජාත්‍යන්තර මූල්‍ය ක්‍රියාකාරී කාර්ය සාධක බලකාය වැනි බහුපාර්ශ්වික සංසදවල මෙන්ම ක්වාඩ් හවුල්කරුවන් සමඟ ත්‍රස්ත විරෝධී සහයෝගීතාව තවදුරටත් වැඩිදියුණු කිරීමේ ක්‍රම පිළිබඳව ද සාකච්ඡා කළහ.
ඉන්දියාවේ විදේශ කටයුතු අමාත්‍යාංශයේ ත්‍රස්ත විරෝධී කටයුතු පිළිබඳ සම ලේකම් මහාවීර් සිංවි සහ ඔස්ට්‍රේලියාවේ විදේශ කටයුතු සහ වෙළෙඳ දෙපාර්තමේන්තුවේ ත්‍රස්තවාදය වැළැක්වීමේ තානාපති රොජර් නෝබල් විසින් අදාළ විශේෂඥ දූත පිරිසට නායකත්වය දෙන ලදී.
ඉන්දියා නිවුස් නෙට්වර්ක්ස්
