ශ්‍රී ලංකා නිදහස් පක්ෂයේ සභාපති ජනාධිපති මෛත්‍රීපාල සිරිසේන මහතාගේ ප්‍රධානත්වයෙන් අද(26) පැවති ශ්‍රී ලංකා නිදහස් පක්ෂ මධ්‍යම කාරක සභා රැස්විමේදී එම පක්ෂයේ උප සභාපති ධුරය සඳහා හිටපු නියෝජ්‍ය කථානායක සහ කොළඹ දිස්ත්‍රික් කණ්ඩායම් නායක පාර්ලිමේන්තු මන්ත්‍රී තිලංග සුමතිපාල මහතාව ඒකමතික ඡන්දයෙන් පත්කොට ගෙන ඇත.
මධ්‍යම කාරක සභාවේදී තිලංග සුමතිපාල මහතා උප සභාපතිධුරය සඳහා පත්කිරීමට අදාළ යෝජනාව පක්ෂයේ සභාපති මෛත්‍රීපාල සිරිසේන මහතා විසින් ඉදිරිපත් කර ඇති අතර එය පක්ෂයේ මහලේකම් දයාසිරි ජයසේකර මහතා විසින් ස්ථිර කොට ඒකමතිකව සම්මත වී ඇත.
2009 වසරේ පැවති පළාත් සභා මැතිවරණයේදී එක්සත් ජනතා නිදහස් සන්ධානයේ කොළඹ දිස්ත්‍රික්කයෙන් මනාප ඡන්ද 159,603 ක් දිනා ගනිමින් පළාත් සභාවට තේරී පත් වූ තිලංග සුමතිපාල මහතා, 2010 පාර්ලිමේන්තු මැතිවරණයේදී මනාප ඡන්ද 60,848ක් දිනා ගනිමින් පාර්ලිමේන්තුවට කොළඹ දිස්ත්‍රික්කයෙන් තේරී පත්විය. 2015 දී ජාතික ලැයිස්තුවෙන් පාර්ලිමේන්තුවට පැමිණි සුමතිපාල මහතා පාර්ලිමේන්තුවේ නියෝජ්‍ය කථානායකවරයා ලෙස පත්විය.
මේ වන විට ශ්‍රී ලංකා නිදහස් පක්ෂයේ කොළඹ දිස්ත්‍රික් නායකයා වශයෙන්ද කටයුතු කරන තිලංග සුමතිපාල මහතා පාරම්පරික ශ්‍රී ලංකා නිදහස් පාක්ෂිකයෙකි. 1977 න් පසු බලය අහිමි වී යද්දී ශ්‍රී ලංකා නිදහස් පක්ෂයට දේශපාලන පළිගැනීම් මත පක්ෂ මූලස්ථානය අහිමි වෙද්දී, සුමතිපාල පවුල විසින් බොරැල්ලෙන් පක්ෂ මූලස්ථානය පත්වාගෙන යෑමට අවශ්‍ය ඉඩ පහසුකම් සහ මූල්‍ය පහසුකම් සපයමින් සිරිමාවෝ බණ්ඩාරනායක මැතිනියට පක්ෂය පවත්වාගෙන යෑම සඳහා අවශ්‍ය ශක්තිය සහ දායකත්වය නොමසුරුව ලබාදී ඇත.
කොළඹ නාලන්දා විද්‍යාලයෙන් මූලික අධ්‍යාපනය හදාරා ඇති තිලංග සුමතිපාල මහතා, එක්සත් රාජධානියේ සන්නිවේදන විශ්ව විද්‍යාලයෙන් උසස් අධ්‍යාපනයත්, කොළඹ විශ්ව විද්‍යාලයෙන් ව්‍යාපාර කළමනාකරණය සම්බන්ධයෙන් පශ්චාත් උපාධියත් ලබා ඇති අතර, මේ වන විට චීනයේ බීජීං විශ්ව විද්‍යාලයෙන් ආචාර්ය උපාධිය ලබාගැනීමට අදාළ අධ්‍යයන කටයුතු කරමින් සිටී.
එදා සිටි අද දක්වා ශ්‍රී ලංකා නිදහස් පක්ෂයේ ජ්‍යේෂ්ඨයින්ගේ ආදරය සහ විශ්වාසය දිනාගනිමින් පක්ෂයේ ප්‍රතිපත්තීන්ටත්, නායකත්වයටත් ගරු කරමින් මනා විනයක් සහ ශික්ෂණයක් තුළ දේශපාලන කටයුතුවල නිරතවෙමින් ඔහු පක්ෂයටත්, පාක්ෂිකයින්ටත් සිදුකොට ඇති නොමසුරු සේවය පක්ෂයේ සභාපති වන ජනාධිපති මෛත්‍රීපාල සිරිසේන මහතා මෙම උප සභාපතිත්වය තිලංග සුමතිපාල මහතාට පිරිනැමීමට හේතු වී ඇතැයි එම පක්ෂයේ ආරංචි මාර්ග සඳහන් කරයි.
