ඉස්ලාම් අන්තවාදය ව්‍යාප්ත කිරීමට නැගෙනහිර ඉදිකර ඇති ෂරියා විද්‍යාලය අහෝසි කිරීම සඳහා විදී සටන් හා බොරු මාධ්‍ය සංදර්ශන සිදුකිරීමට තමාට අනවශ්‍ය බවත් සත්‍යවශයෙන්ම මෙහි ආයෝජකයින් ආයෝජනය කර ඇත්නම් එම ආයෝජකයින්ට ගෙවිය යුතු හැම සතයක්ම මුදලින් ගෙවා රටේත්, ජාතියේත්, මතු අනාගත පරපුරේත් ජාතික ආරක්ෂාව වෙනුවෙන් එය මිලදී ගෙන “රාජ්‍ය ආරක්ෂක විශ්ව විද්‍යාලයක්” වෙනුවෙන් රජයට පවරා දීමට තමා සූදානම් බව ශ්‍රී ලංකා නිදහස් පක්ෂ පාර්ලිමේන්තු මන්ත්‍රී තිලංග සුමතිපාල මහතා මාධ්‍ය හමුවක් අමතමින් ප්‍රසිද්ධියේ පැවසීය.
මෙහිදී වැඩිදුරටත් අදහස් දැක්වූ පාර්ලිමේන්තු මන්ත්‍රී තිලංග සුමතිපාල මහතා,
නැගෙනහිර හිටපු ආණ්ඩුකාර හිස්බුල්ලා විසින් ඉස්ලාම් අන්තවාදය ප්‍රවර්ධනය කොට ප්‍රචාරණය කිරීම සඳහා ඉදිකරන ලද නැගෙනහිර ෂරියා විද්‍යාලය රජයට පවරාගෙන එය රාජ්‍ය ආරක්ෂක විශ්ව විද්‍යාලයක් බවට පත්කළ යුතුයැයි පෞද්ගලික මන්ත්‍රී යෝජනාවක් ලෙස මෙය පසුගිය 2019 මැයි මස 26 වනදා පාර්ලිමේන්තුවට ඉදිරිපත් කරන ලද බවත් එය 2019 ජුනි මස 07 වනදා පාර්ලිමේන්තු න්‍යාය පුස්තකයට ඇතුලත් කොට ඇති බවත් 2019 ජුනි මස 18 වනදා එය පාර්ලිමේන්තුවේ පක්ෂ නායක රැස්වීමේදී විවාදයට ගන්නා බවත් පැවසීය.
එසේම මෙම ෂරියා විද්‍යාලය අහෝසි කිරීම සහ එය රජයට පවරා ගෙන රාජ්‍ය ආරක්ෂක විශ්ව විද්‍යාලයක් බවට පත්කිරීමට තමන් රටේ ජනතාවගෙන් අත්සන් දශලක්ෂයක් දින 14ක් තුළ එකතු කිරීමේ ව්‍යාපාරයක් ආරම්භ කළ බවත්, එයට දින 14ක් තුළ අත්සන් ලක්ෂ 7කට වඩා එකතු කරගැනීම හැකි වූ බවත් මෙහිදී පැවසීය.
මෙහිදී මාධ්‍යවේදීන් නැඟූ ප්‍රශ්න වලට පිළිතුරු දුන් තිලංග සුමතිපාල මහතා,
රතන ස්වාමීන්වහන්සේත් මේ සම්බන්ධයෙන් ඊයේ පෙරේදා දිනයකදී කථා කරන්න පටන්ගත් බවත්, උන්වහන්සේත් එසේ තමා පැවසූ දේ සමඟ එකඟ වී කථා කිරීම ගැන සතුටු වන බවත් පැවසූ අතර එය රතන ස්වාමීන්වහන්සේ මීට පටන් ගත් වස-විස නැති ව්‍යාපාරය මෙන් අතරමඟ නතර නොවී මෙම කතිකාව ඉදිරියටද ගෙන යනු ඇතැයිද තමා බලාපොරොත්තු වන බව මෙහිදී සුමතිපාල මහතා පවසා සිටියේය.
