ඉදිරි ජනාධිපතිවරණයේ ප්‍රචාරක කටයුතු හෙට (18) මධ්‍යම රාත්‍රියෙන් අවසන් වන බවත් එතැන් සිට නිහඬ කාලය ක්‍රියාත්මක වන බවත් මැතිවරණ කොමසාරිස් ජනරාල් සමන් ශ්‍රී රත්නායක මහතා පවසයි.
මෙම නිහඬ කාලයෙන් පසු අපේක්ෂකයන් ප්‍රවර්ධනය කිරීම වෙනුවෙන් ගෙයින් ගෙට යාම හෝ ඕනෑම ආකාරයක ප්‍රචාරණ කටයුත්තක නිරත වීම මැතිවරණ නීති උල්ලංඝණය කිරීමක් ලෙස සලකන බවත්, එවැනි පුද්ගලයින් හෝ කණ්ඩායම් වහාම අත්අඩංගුවට ගන්නා බවත් කොමසාරිස් ජනරාල්වරයා ප්‍රකාශ කළේය.
නිදහස් හා සාධාරණ මැතිවරණ ක්‍රියාවලියක් සහතික කිරීම සඳහා දැඩි රෙගුලාසි ක්‍රියාත්මක වන බව ද ඔහු අවධාරණය කළේය.
“ප්‍රචාරක කාලය අවසන් වූ පසු, තවදුරටත් මහජන රැලි, ප්‍රවර්ධන ද්‍රව්‍ය බෙදා හැරීම හෝ ගෙයින් ගෙට ප්‍රචාරණ කටයුතු සඳහා අවස්ථාව ලබාදීමක් සිදුවන්නේ නැහැ. එවැනි කටයුත්තක කිසියම් පුද්ගලයෙක් හෝ කණ්ඩායමක් නිරත වන්නේ නම් ඔහුට හෝ එකී කණ්ඩායමට එරෙහිව පියවර ගන්නා ලෙස පොලිසියට උපදෙස් දී තිබෙනවා,” රත්නායක මහතා වැඩිදුරටත් පැවසීය.
