ඉහළ යන උෂ්ණත්වය හමුවේ චර්ම රෝග වැඩි වීමේ අවදානමක් පවතින බව විශේෂඥ වෛද්‍ය දීපාල් පෙරේරා කියයි. ඔහු සඳහන් කළේ රට පුරා උෂ්ණත්වය ඉහළ යාමත් සමඟ ළමුන් අතර සමේ ගැටලු බහුලව දක්නට ලැබෙන බවයි.
ඉහළ උෂ්ණත්වය සමේ තත්ත්වය නරක අතට හැරිය හැකි අතර, විශේෂයෙන්ම කුඩා දරුවන්ගේ විජලනය වීමේ අවදානම ඉහළ බව සඳහන් කළ විශේෂඥ වෛද්‍යවරයා එබැවින් අනවශ්‍ය ලෙස හිරු එළියට නිරාවරණය වීමෙන් වළකින ලෙසත්, නිතර නිතර දියර වර්ග පානය කරන ලෙසත් ජනතාවට උපදෙස් දුන්නේය.
කෘත්‍රිම පාන වර්ග නොබොන ලෙසත්, ස්වභාවික ජලය, ලෙමන් යුෂ සහ පොල් වතුර හෝ තැඹිලි පානය කරන ලෙසත් ඔහු ජනතාවගෙන් ඉල්ලා සිටි වෛද්‍ය දීපාල් විජලනය වළක්වා ගැනීම සඳහා තම දරුවන් දිනකට දෙවරක් ස්නානය කිරීමට වග බලා ගන්නා ලෙස ද දෙමාපියන්ගෙන් ඉල්ලා සිටියේය.
