රජයේ රෝහලක ඇසේ සුද ඉවත් කිරීමේ සැත්කම්වලින් පසු භාවිත කරන ‘Prednisolone Acetatean’ අක්ෂි බිංදු භාවිතය හේතුවෙන් සදාකාලික පෙනීම අහිමි වූ රෝගීන් තිදෙනෙකු හිටපු සෞඛ්‍ය අමාත්‍ය කෙහෙළිය රඹුක්වැල්ල ඇතුළු දස දෙනෙකුගෙන් රුපියල් මිලියන 300ක වන්දියක් ඉල්ලා කොළඹ දිසා අධිකරණය හමුවේ අද (20) නඩු පවරා ඇත.
කෙහෙළිය රඹුක්වැල්ල, ජාතික ඖෂධ නියාමන අධිකාරියේ සභාපති ජානක චන්ද්‍රගුප්ත, මහාචාර්ය එස්.ඩී. ජයරත්න, වෛද්‍ය විජිත් ගුණසේකර, වෛද්‍ය අසේල ගුණවර්ධන, වෛද්‍ය රොහාන් එදිරිසිංහ, වෛද්‍ය මහේන්ද්‍ර සෙනෙවිරත්න, Chamee Chemist (Pvt) Ltd, Indiana Ophthalmics LLP සහ නීතිපතිවරයා මෙම පැමිණිලිවල විත්තිකරුවන් ලෙස නම් කර ඇත.
තමා නුවරඑළිය මහ රෝහලට ඇතුළත් කර නුවරඑළිය මහ රෝහලේ වෛද්‍ය කාර්ය මණ්ඩලය විසින් 2023 අප්‍රේල් 05 වැනි දින ඇසේ සුද ඉවත් කිරීමේ ශල්‍යකර්මයකට භාජනය කළ බව කඳපොළ ප්‍රදේශයේ පදිංචි පැමිණිලිකරු මක්කාරි රාජරත්නම් මහතා සිය පැමිණිල්ලේ සඳහන් කළේය.
ඉන් අනතුරුව ශල්‍යකර්මය නිමවා 2023 අප්‍රේල් 06 දින තමා රෝහලෙන් පිටව ගිය බවත් Indiana Opthalmics LLP විසින් නිෂ්පාදනය කරන ලද Prednisolone Acetatean අක්ෂි බිංදු භාවිතා කරන ලෙස නුවරඑළිය රෝහලේ වෛද්‍ය කාර්ය මණ්ඩලය උපදෙස් දුන් බවත්, එය රෝහලෙන් ද ලබා දුන් බවත් පැමිණිලිකරු සඳහන් කළේය. ඉහත කී අක්ෂි බිංදු කිහිපයක් යෙදීමෙන් පසු 2023 අප්‍රේල් 19 හෝ ඊට ආසන්න දිනකදී ඔහුට කඳුළු, අපහසුතා, වේදනාව සහ හිසරදය ඇති වූ බව ඔහු වැඩිදුරටත් සඳහන් කළේය.
2023 මැයි 10 වැනි දින වැඩිදුර වෛද්‍ය පරීක්‍ෂණයක් සිදු කර ජාතික අක්ෂි රෝහලට ඇතුළත් කිරීමේදී එම Prednisolone Acetatean අක්ෂි බිංදු සමඟ සැත්කම් කර ප්‍රතිකාර කළ ඔහුට ක්‍රමක්‍රමයෙන් ඇසේ පෙනීම අඩුවෙමින් පවතින බව නිරීක්ෂණය වූ බව පැමිණිලිකරු වැඩිදුරටත් සඳහන් කළේය.
නිසි පරීක්ෂණවලට අනුකූල නොවීම හේතුවෙන් එම අක්ෂි බිංදු ප්‍රමිතියෙන් තොර බවත් එම ඖෂධය භාවිත කළ රෝගීන්ට Endophthahnitis රෝගය වැළඳී ඇති බවත් වින්දිතයා වැඩිදුරටත් ප්‍රකාශ කළේය.
විත්තිකරුවන් එකොළොස් දෙනාගෙන් වන්දි ඉල්ලා Invictus නීතිඥ සමාගමේ නීතිඥ සම්පත් විජේවර්ධන, තමාලි කුරුප්පු සහ ප්‍රවින්කා රත්නසේකර යන මහත්ම මහත්මීන් මාර්ගයෙන් පැමිණිලිකරු මෙම නඩු ගොනු කළේය.
