පළාත් පාලන මැතිවරණයට තරග කිරීම සඳහා ශ්‍රී ලනිප සමඟ එක්වීමට ඒකාබද්ධ විපක්ෂය ඉදිරිපත් කරන ලද ඉල්ලීම්වලට පිළිතුරු ලබා නොදීමට පෙරේදා (3දා) පැවැති ශ්‍රී ලනිප පාර්ලිමේන්තු මන්ත්‍රි කණ්ඩායම් විශේෂ රැස්වීමේදී තීරණය කොට තිබේ.
ජනාධිපති මෛත්‍රිපාල සිරිසේන මහතාගේ ප්‍රධානත්වයෙන් ශ්‍රී ලනිප මන්ත්‍රි කණ්ඩායම් රැස්වීම පැවැත්වූයේ ජනාධිපති ලේකම් කාර්යාලයේදීය. මේ රැස්වීම පැවැත්වීමට කලින් යොදා ගෙන තිබුණේ ජනාධිපතිවරයාගේ නිල නිවෙසය.
ඒකාබද්ධ විපක්ෂය නියෝජනය කරන ශ්‍රී ලනිප පාර්ලිමේන්තු මන්ත්‍රිවරුන්ටද ඒ සඳහා ලිඛිතව ආරාධනා කොට තිබිණි.
පළාත් පාලන මැතිවරණයට දෙපාර්ශ්වය එක්ව තරග කිරීම සම්බන්ධයෙන් සාකච්ඡා කිරීම සඳහා මේ ආරාධනය කර තිබිණි.
එහෙත් ඊට සහභාගි වීමට නම් ආණ්ඩුව නියෝජනය කරන ශ්‍රී ලනිප කණ්ඩායම කොන්දේසි 7ක් ඉටු කළ යුතු බවට ඒකාබද්ධ විපක්ෂයේ ශ්‍රී ලනිප මන්ත්‍රිවරුන් 42 දෙනකු අස්සන් කොට පසුගිය බ්‍රහස්පතින්දා (2දා) ශ්‍රී ලනිප මහ ලේකම් වෙත ලිපියක් යොමු කොට තිබිණි.
සිකුරාදා පැවැති සාකච්ඡාවට ඒකාබද්ධ විපක්ෂය නියෝජනය කරන ශ්‍රී ලනිප මන්ත්‍රිවරුන් සහභාගි නොවුණද ආණ්ඩුවට සහාය දක්වන ශ්‍රී ලනිප මන්ත්‍රි කණ්ඩායම පමණක් සහභාගි විය.
ශ්‍රී ලනිපයේ අපි සියලු දෙනා එකතු වනු දැකීම සාමාජිකයන්ගේත් ජනතාවගේත් ඉල්ලීමක් බව මෙහිදී ජනාධිපතිවරයා අවධාරණය කොට ඇත. පාර්ශ්ව දෙකම එකතු වී යා යුතු බවට ඒකාබද්ධ විපක්ෂයේ බොහෝ දෙනෙක් තමන්ට වරින් වර පැවැසූ බවද එහෙත් විස¼දා ගත යුතු ප්‍රශ්න කිහිපයක් තිබෙන බව ඔවුන් දැනුම්දීමක් කර තිබෙන බවද සිහිපත් කළ ශ්‍රී ලනිප නායක මෛත්‍රිපාල සිරිසේන මහතා ඡන්දය නොඉල්ලන, පාර්ලිමේන්තුව නියෝජනය නොකරන කිහිප දෙනෙක් දෙපාර්ශ්වයේ එක්වීමට බාධා කරන බවටද චෝදනා කොට ඇත.
පැය දෙකකට අධික කාලයක් පැවැති එම සාකච්ඡාවේදී වැඩි අවධානයක් යොමු කෙරුණේ ඉදිරි පළාත් පාලන මැතිවරණයට තරග කළ යුතු ආකාරය සම්බන්ධයෙනි.
එක්සත් ජනතා නිදහස් සන්ධානය යටතේ තරග කළ යුතු බව ඔවුන්ගේ අදහස වී තිබේ. ඒ ඒ දිස්ත්‍රික්කවල සංවිධාන කටයුතුවල ප්‍රගතිය පිළිබඳවද මෙහිදී අවධානය යොමු කොට ඇති අතර දුර්වල දිස්ත්‍රික්කවල සංවිධාන කටයුතු වේගවත් කිරීමටත් ඇතැම් දිස්ත්‍රික්කවලට සංවිධායකවරුන් පත් කිරීමේ අවශ්‍යතාවත් එහිදී සාකච්ඡාවට ලක්වී තිබේ.
මේ අතර බෙදී සිටින ශ්‍රී ලනිපය යළි සමඟි කරවීම සඳහා වන සාකච්ඡා තවදුරටත් සිදුවෙමින් තිබෙන බවද ආරංචි මාර්ග සඳහන් කරයි.
