අනුරාධපුර රත්මලේ තිස්ස මහා විද්‍යාලයේ 5 ශ්‍රේණියේ ශිෂ්‍යත්ව විභාග ප්‍රශ්න පත්‍රයක් පිටවීම සම්බන්ධයෙන් එහි විභාග මධ්‍යස්ථානයේ රාජකාරි කළ පරීක්ෂකවරයා ඇතුළු තිදෙනෙකුගේ වැඩ තහනම් කිරීමට නියමිත බව උතුරු මැද පළාත් අධ්‍යාපන අධ්‍යක්ෂ එස්.එම්.ඩබ්ලිව්. සමරකෝන් මහතා පවසයි.
සැකකරුවන්ගෙන් ප්‍රකාශ සටහන් කර ගැනීමෙන් අනතුරුව සිදුකළ විමර්ශනයකින් පසුව මෙම තීරණය ගත් බවයි ඔහු කියා සිටියේ.
පසුගිය ඉරිදා (15) පැවති 5 ශ්‍රේණිය විභාගයේ පළමු ප්‍රශ්න පත්‍රය කාන්දු වීම සම්බන්ධයෙන් දෙමාපියන් 100 කට ආසන්න පිරිසක් අනුරාධපුර මූලස්ථාන පොලිසියට පැමිණිලි කර තිබුණි. එම විභාගය නැවත පවත්වන ලෙස දෙමාපියන් තම පොලිස් පැමිණිලිවලින් ඉල්ලා තිබුණි.
විභාගයේ පළමු ප්‍රශ්න පත්‍රයේ ඡායාරූප සහකාර පරීක්ෂකවරයා විසින් විභාගය ආරම්භ වීමට පෙර පෞද්ගලික පන්ති භාර ගුරුවරුන් සමඟ සමාජ මාධ්‍ය කණ්ඩායමක් අතර බෙදාගෙන ඇති බව මූලික විමර්ශනවලදී අනාවරණය වී ඇත. ඒ අනුව එම විභාග මධ්‍යස්ථානයේ සේවය කළ පරීක්ෂකවරයා, සහකාර පරීක්ෂකවරයා සහ එක් ගුරුවරයෙකුගේ සේවය කඩිනමින් අත්හිටුවීමටයි තීරණය කර ඇත්තේ.
ඊට අමතරව බෙදාගත් ප්‍රශ්න පත්‍රය ලැබුණු බව කියන අනුරාධපුර සහ නොච්චියාගම ප්‍රදේශවලින් ගුරුවරුන් දස දෙනකු ප්‍රකාශ සටහන් කර ගැනීම සඳහා විභාග දෙපාර්තමේන්තුව විසින් කොළඹට කැඳවා තිබිණි.
