මෙවර අනුරාධපුරයේ පැවැත්විමට නියමිත රාජ්‍ය නත්තල් උත්සවයේ සියලු සංවිධාන කටයුතුවලින් ඉවත්වීමට අනුරාධපුර රදගුරු නෝබට් අන්ද්‍රාදි හිමිපාණන් තීරණය කර තිබේ.
මොරටුව, රාවතාවත්ත ළමා නිවාසය සම්බන්ධයෙන් ගෙන යන අසත්‍ය ප්‍රචාරවලට විරෝධය පල කිරීම එහි අරමුණ බව උන්වහන්සේ සඳහන් කළේය.
මෙවර රාජ්‍ය නත්තල් උත්සවය අනුරාධපුර ශාන්ත ජෝෂප් ආසන දෙව්මැදුරේදී පැවැත්වීමට සැලසුම් කර තිබේ.
අනුරාධපුර රදගුරු හිමියන් පැවසුවේ මේ සම්බන්ධයෙන් ක්‍රිස්තියානි කටයුතු දෙපාර්තමේන්තුවට දැනුම්දීමටද පියවර ගත් බවය.
අප මේ පිළිබදව ක්‍රිස්තියානි කටයුතු දෙපාර්තමේන්තුවේ අධ්‍යක්ෂ ඒ.ආර්.ගුණවර්ධනගෙන් විමසීමක් කළේය.
ඔහු පැවසුවේ රාජ්‍ය නත්තල් උත්සවයේ සංවිධාන කටයුතුවලින් අනුරාධපුර රදගුරු හිමියන් ඉවත්වීම සම්බන්ධ තීරණය තමන් වෙත දන්වා ඇති බවය.
ඒ අනුව සඳුදා ඒ සම්බන්ධයෙන් අදාළ පාර්ශව සමඟ සාකච්ඡා කරන බව ඔහු සඳහන් කළේය.
