වයස අවුරුදු එකකට අඩු ළමුන්ගෙන් සියයට 25ක් නින්ද සම්බන්ධ ගැටලු වලට මුහුණ දෙනවා – විශේෂඥ වෛද්‍යවරු
ශ්‍රී ලංකාවේ වසරකට අඩු ළමුන්ගෙන් ආසන්න වශයෙන් සියයට 25කට පමණ යම් ආකාරයක නින්ද සම්බන්ධ ගැටලු ඇති අතර, හොඳ නින්දක් නොලැබීම හේතුවෙන් මෙම ළදරුවන් තුළ විවිධ කායික හා මානසික සෞඛ්‍ය ගැටලු ඇති කළ හැකි බව සෞඛ්‍ය ප්‍රවර්ධන කාර්යාංශයේ උපදේශක, ප්‍රජා වෛද්‍ය වෛද්‍ය ඉනෝකා වික්‍රමසිංහ මහත්මිය පැවසුවාය.
මෙරට දරුවන් අතර නින්ද පිළිබඳ සැලකිය යුතු ලෙස පර්යේෂණ සිදු කර නොමැති නමුත්, පවතින සීමිත දත්ත සැලකිල්ලට ගත්විට නව යොවුන් වියේ සහ වැඩිහිටියන්ගේ නින්ද නොයාමේ ප්‍රතිවිපාක පවතින බව ඇය පැවසුවාය.
ඇය වැඩි දුරටත් සඳහන් කළේ, නින්ද සනීපාරක්ෂාව, සෞඛ්‍ය සම්පන්න පුරුදු, හැසිරීම් සහ නින්දට සම්බන්ධ පාරිසරික සාධක මත තීරණය වන බවයි.
ඔබට හොඳ රාත්‍රී නින්දක් ලබා ගැනීමට අවශ්‍ය නම් මෙම සාධක සකස් කළ හැකි බව ද ඇය පෙන්වා දුන්නාය.
ඇය මෙසේ ද පැවසුවාය, “ඉස්සර මිනිස්සු ඉර බැස යන විට නිදාගෙන ඉර පායන විට අවදි වෙනවා. කෘතිම ආලෝකකරණයේ දිගුකාලීන භාවිතය සහ ජංගම දුරකථන, පරිගණක, ටැබ් සහ රූපවාහිනිය වැනි උපාංගවල තිර කාලය වැඩි වීම මිනිසුන් අවදියෙන් තබා ඔවුන්ගේ නින්දේ රටාවට අහිතකර ලෙස බලපානවා. නින්දේ රටාවේ වෙනස්වීම් විවිධ කායික, මානසික සහ සමාජීය ගැටලු ඇති කරන බව අධ්‍යයන කිහිපයකින් පෙන්වා දී තිබෙනවා. මේ නිසා මිනිසුන්ගේ සෞඛ්‍ය තත්ත්වය ඉහළ නැංවීමට ක්‍රියාමාර්ග රැසක් ගෙන තිබෙනවා.
විශේෂයෙන්ම පාසල් දරුවන්ට ස්ථාවර මතකයක් ලබා ගැනීමට හොඳ නින්දක් අවශ්‍ය බව ඇය පැවසුවාය. එබැවින් දරුවන්ට සුවදායක නින්දක් ලබාදීම දෙමාපියන්ගේ වගකීමක් බව ද වෛද්‍ය වික්‍රමසිංහ වැඩි දුරටත් සඳහන් කළාය.
“හොඳ නින්දක් පුරුදු පුහුණු වීමට නම්, නිත්‍ය නින්දට යන සහ අවදි වන වේලාව, ඔවුන් නිදා ගන්නා ස්ථානය, නිදා ගන්නා ආකාරය, පාරිසරික තත්ත්වයන් සහ නින්දේ කාලසීමාව වැනි පියවර කිහිපයක් අනුගමනය කළ යුතුයි. දෙමව්පියන්ට සහ භාරකරුවන්ට තම දරුවන්ට හොඳ නින්ද පුරුදු ඇති කර ගැනීමට උපකාර කළ හැකියි“ ඇය අවධාරණයෙන් පෙන්වා දුන්නාය.
නින්ද ගැන දැනගත යුතුම දේවල්
ලෝක සෞඛ්‍ය සංවිධානය (WHO) විසින් එක් එක් වයස් කාණ්ඩ සඳහා දිනකට නිදා ගත යුතු පැය ගණන පිළිබඳව නිර්දේශ ඉදිරිපත් කර ඇත.
උපතේ සිට මාස තුන දක්වා ළදරුවන් දිනකට පැය 14 සිට 17 දක්වා නිදා ගත යුතු බව ලෝක සෞඛ්‍ය සංවිධානය නිර්දේශ කර ඇත.
මාස හතරක සිට අවුරුද්දක් දක්වා ළදරුවන්ට පැය 12 සිට 16 දක්වා නින්දක් අවශ්‍ය වේ.
වයස අවුරුදු 1 සිට 2 දක්වා ළමුන් පැය 11 සිට 14 දක්වා නිදා ගත යුතු අතර අවුරුදු 3 සිට 4 දක්වා ළමුන් පැය 10 සිට 13 දක්වා නිදා ගත යුතුය.
වයස අවුරුදු 5 දී, දරුවන් පැය 10 සිට 12 දක්වා නිදා ගත යුතුය.
ලෝක සෞඛ්‍ය සංවිධානයේ නිර්දේශයන්ට අනුව, අවුරුදු පහට අඩු දරුවන්ට ඔවුන්ගේ ශාරීරික, මානසික සහ සමාජීය යහපැවැත්මට උපකාර වන බැවින් ඔවුන්ගේ පැය 24 නින්දෙන් සියයට 50කට වඩා වැඩි ප්‍රමාණයක් ලබා ගත යුතුය.
තරුණ වැඩිහිටියන් සහ වැඩිහිටි පුද්ගලයින් ඔවුන්ගේ මානසික හා ශාරීරික සෞඛ්‍යය සඳහා අවම වශයෙන් පැය 7-8 ක නින්දක් අපේක්ෂා කළ යුතුය.
වෛද්‍ය වික්‍රමසිංහ නිර්දේශ කළේ දෙමාපියන් නින්දට පැයකට පෙර ඩිජිටල් තිර භාවිතය නතර කරන ලෙසයි. පවතින දත්ත වලට අනුව, අවුරුදු දෙකකට අඩු දරුවන්ට ඩිජිටල් තිර භාවිතා කිරීම සුදුසු නොවේ.
වයස අවුරුදු 2 සහ 5 අතර දරුවන්ට දෙමාපියන්ගේ හෝ භාරකරුවන්ගේ අධීක්ෂණය යටතේ දිනකට පැය භාගයක් දක්වා ඩිජිටල් තිර භාවිතා කළ හැකිය. ළමයින් නිදා සිටින විට අධික ශබ්ද සහ දීප්තිමත් ආලෝකය ඇති ප්‍රදේශවලින් වැළකී සිටිය යුතුය. මන්ද මේවා ඔවුන්ගේ නින්දට බලපාන අතර එමඟින් ඔවුන්ගේ වර්ධනයට හා මොළයේ වර්ධනයට බලපෑම් සිදුවෙයි.
මූලාශ්‍රය – ඩේලි මිරර්
