ජාතික ජන බලවේගයේ නායකයන් විසින් සිය ආර්ථික ප්‍රතිපත්තිය මෙතෙක් නිශ්චිත වශයෙන් එලි දක්වා නැති බව සමගි ජන බලවේග පාර්ලිමේන්තු මන්ත්‍රී හර්ෂ ද සිල්වා මහතා සඳහන් කරයි.
සමගි ජන බලවේගව විසින් පසුගිය දා සංවිධානය කරන ලද ජන හමුවකදී හර්ෂ මේ බව සඳහන් කළේය.
පසුගිය දා ස්වාධීන රූපවාහිනී සේවය සමග පැවැති වැඩසටහනේදී මාළිමා ආණ්ඩුව ද ජාත්‍යන්තර මුල්‍ය අරමුදල සමග ඉදිරියට යන බව ජාතික ජනබලවේග නායක අනුර දිසානායක පැවසූව ද ටිල්වින් සිල්වා, ලාල් කාන්ත, සුනිල් හදුන්නෙත්ති, වසන්ත සමරසිංහ වැනි නායකයන් පවසන්නේ ජාත්‍යන්තරයන් මුල්‍ය අරමුදල විසින් ගොඩනැගූ රටවල් නැති බවත් ඔවුන් සමග ගමනක් නැති බවත් යයිද හර්ෂ ද සිල්වා වැඩි දුරටත් පැවසුවේය.
‘ මාළිමාවේ නායකයින් කරන විවිධාකාර ප්‍රකාශ අනුව පැහැදිලි වන්නේ ඔවුන්ට ආර්ථිකය සම්බන්ධයෙන් නිශ්චිත වැඩපිළිවෙළක් හෝ පොදු අදහසක් නැති බවයි. නමුත් සමගි ජනබලවේගයට පැහැදිලි ආර්ථික දැක්මක් සහ වැඩපිළිවෙළක් තිබෙනවා. ඒ නිසා තමයි මාළිමාවේ නායකයෝ සමගි ජන බලවේගය සමග ආර්ථිකය සම්බන්ධ විවාදයකට නොපැමිණෙන්නේ‘ යැයි ද සඳහන් කළේය.
