විදේශ ගමන් බලපත්‍රයක් ලබා ගැනීමට දිනයක් ලබනා 06 වැනිදා සිට මාර්ගගත ලෙස (Online) වෙන් කරවා ගත හැකි බවත් ඒ අනුව නොවැම්බර් 6 වැනිදායින් පසුව දිනයක් වෙන් කරවා ගැනීමේ අපේක්ෂාවෙන් ආගමන විගමන දෙපාර්තමේන්තුවට පැමිණීමෙන් වළකින ලෙසත් ආගමන හා විගමන දෙපාර්තමේන්තුවේ වැඩ බලන පාලක ජනරාල් නිලූෂා බාලසූරිය මහත්මිය පැවසුවාය.
ඇය මේ බව පැවසුවේ අද (04) පැවැති මාධ්‍ය හමුවකදී ය.
මේ සම්බන්ධයෙන් තව දුරටත් කරුණු පැහැදිලි කරමින් නිලූෂා බාලසූරිය මහත්මිය මෙසේ ද පැවසුවාය. ” ආගමන හා විගමන දෙපාර්තමේන්තුව සතුව මාර්ග ගතක්‍රමය හරහා දිනයක් ලබා ගැනීම සඳහා පසුගිය කාලයේ පැවති ක්‍රමවේදය විවිධ හේතූන් නිසා ක්‍රියාත්මක කළ නොහැකි තත්ත්වයට පත්වුණා. ඒ අතර වාරයේදී දෙපාර්තමේන්තුව සතු විදේශ ගමන් බලපත්‍ර තොගය සීමා වීමේ හේතුවෙන් ඉල්ලුමට සරිලන ආකාරයේ මහජනතාව වෙත ගමන් බලපත්‍ර ලබාදීමේ අපහසුතාවයක් පැන නැගුණු අතර ගුවන් ගමන් බලපත්‍රයක් ලබා ගැනීමේ අපේක්ෂාවෙන් අයදුම්කරුවන් විශාල ප්‍රමාණයක් දෙපාර්තමේන්තුව වෙත පැමිණියා. එම උද්ගත වූ තත්ත්වය තුළදී ගමන් බලපත්‍රයක් සකසා ගැනීම සඳහා දෙපාර්තමේන්තුව වෙත පැමිණ ඉදිරි දිනයක් ලබා ගැනීමට සිදුවීමෙන් මහජනතාවට අපහසුතාවයට හා පීඩාවට පත්වීමට සිදුවූ බව දෙපාර්තමේන්තුවට නිරීක්‍ෂණය වුණා. මහජනතාව වෙත වඩාත් පහසු සේවාවක් ලබාදීම සඳහා ආගමන හා විගමන දෙපාර්තමේන්තුව පසුගිය කාලය පුරා විවිධ අත්හදා බැලීම් සිදු කළ අතර එහි ප්‍රතිඵලයක් ලෙස පහත දැක්වෙන මාර්ගගත ක්‍රමය හඳුන්වාදීමට තීරණය කළා. ආගමන හා විගමන දෙපාර්තමේන්තුවේ www.immigration.gov.lk වෙබ් අඩවියට පිවිස “විදේශ ගමන් බලපත්‍රය ලබාගැනීම සඳහා දිනයක් වෙන් කර ගැනීම” යන සබැඳියට පිවිසීම තුළින් ගමන් බලපත්‍ර ලබා ගැනීම සඳහා දිනයක් වෙන්කර ගත හැකියි.
මෙම මාර්ගගත ක්‍රමවේදය 2024.11.06 දින සිට ආරම්භ කරනවා. ඒ හේතුවෙන් දිනයක් වෙන් කර ගැනීමේ අපේක්ෂාවෙන් මින් ඉදිරියට දෙපාර්තමේන්තුව වෙත පැමිණීමෙන් වළකින ලෙස මහජනතාව වෙත කාරුණිකව දැනුම් දෙන්න කැමතියි.
අන්තර්ජාල පහසුකම් සහිත ඕනෑම පරිගණක යන්ත්‍රයකින් හෝ ජංගම දුරකථනයකින් ආගමන හා විගමන දෙපාර්තමේන්තු වෙබ් අඩවියට ප්‍රවේශ වීමේ හැකියාව මහජනතාව වෙත ඇති බැවින් කිසිදු වෙනත් ආයතනයක් හෝ පාර්ශවයක් වෙත මුදල් ගෙවීමෙන් වළකින ලෙස අවධාරණය කරනවා. නීත්‍යානුකූල නොවන ලෙසට මාර්ගගත ක්‍රමවේදයට ප්‍රවිෂ්ට වීමට උත්සාහ කිරීමෙන් දිනයක් වෙන් කර ගැනීමේ හැකියාව තවදුරටත් ප්‍රමාද වීමට ඒ හේතුවක් විය හැකියි. දිනයක් වෙන් කර ගැනීමේදී ඇතිවන තාක්ෂණික ගැටලුවලට රාජ්‍ය තොරතුරු කේන්ද්‍රය දුරකථනය වන 1919 හරහා පිළිතුරු ලබාගත හැකි අතර, ඉතා නුදුරු දිනකදී ආගමන හා විගමන දෙපාර්තමේන්තු තොරතුරු කේන්ද්‍රය වන 1962 හරහාද මෙම නව මාර්ගගත ක්‍රමවේදය පිළිබඳ ඇති වන ගැටලු විමසිය හැකියි“
