සුළු සුළු වැරදිවලට බන්ධනාගාර ගත කර සිටින දෙමළ දේශපාලන සිරකරුවන් 46 දෙනකු නිදහස් කිරීම සඳහා වන මුලික වැඩකටයුතු ආරම්භ කර ඇතැයි අධිකරණ අමාත්‍ය ජනාධිපති නීතීඥ විජේදාස රාජපක්ෂ මහතා පාර්ලිමේන්තු මන්තී‍්‍ර සී. වී. විග්නේෂ්වරන් මහතා වෙත පවසා ඇත.
මෙම සිරකරුවන් සම්බන්ධයෙන් හිටපු අග විනිසුරු අශෝක ද සිල්වා මහතාගේ වාර්තාව ලැබෙන තෙක් බලා සිටින බවත් අමාත්‍යවරයා තමාට පැවසු බවද විග්නේෂ්වරන් මහතා සදහන් කරයි.
සැප්තැම්බර් මාසයේ පැවැත්වෙන එක්සත් ජාතීන්ගේ මානව හිමිකම් කවුන්සලයේදි ශී‍්‍ර ලංකාව සම්බන්ධයෙන් එළිදැක්වීමට නියමිත වාර්තාව ඉතා බරපතල එකක් වනු ඇතැයි පැවසු විග්නේෂ්වරන් මහතා එම වාර්තාවට පෙර තමන් විසින් ජනාධිපති රනිල් වික‍්‍රමසිංහ මහතා වෙත ඉදිරිපත් කරනු ලැබු ඉල්ලීම් ඉටු කිරීමට ඔහු කටයුතු කරනු ඇතැයි විශ්වාසයද පළ කරයි.
ජනාධිපතිවරයා තෝරා පත් කර ගැනීම වෙනුවෙන් පාර්ලිමේන්තුවේ ඡන්දය පැවැත්වීමට පෙර පැවති සාකච්ඡාවලදි දෙමළ දේශපාලන සිරකරුවන් වහා නිදහස් කරන්නැයි හා උතුරු නැගෙනහිර පළාත්වල සිදුවන ඉඩම් ආක‍්‍රමණ වහා නතර කරන්නැයි ඉල්ලා සිටිය බවද එම ඉල්ලීම් ඉටු කිරීමට ජනාධිපතිවරයා පොරොන්දු වී ඇති බවද ඒ මහතා පවසයි.
තවද ත‍්‍රස්තවාදය වැළැක්වීමේ පනත අහෝසි කිරීමටත් එහිදි ජනාධිපතිවරයා එකඟ වු බද හෙතෙම වැඩිදුරටත් සදහන් කරයි.
