ඉන්දීය විදේශ කටයුතු අමාත්‍ය එස් ජයිශංකර් ඉරිදා නිව්යෝර්ක් වෙත පැමිණියේය. මෙහිදී එක්සත් ජාතීන්ගේ මහා මණ්ඩලයේ ඉහළ පෙළේ රැස්වීම සඳහා සහභාගි වීමට ඔහු බලාපොරොත්තු වේ.මෙම හමුවට සමගාමීව ඔහු එක්සත් ජාතීන්ගේ මහලේකම් ඇන්ටෝනියෝ ගුටරෙස් ඇතුළු රාජ්‍ය නායකයින් රැසක් හමුවීමට ද නියමිතය.
එක්සත් ජාතීන්ගේ සංවිධානයේ ඉන්දීය නිත්‍ය නියෝජිත රුචිර කම්බෝජ් සහ නිව්යෝර්ක්හි කොන්සල් ජනරාල් රන්ධීර් ජයිස්වාල් විසින් නිව්යෝර්ක් වෙත පැමිණි ඉන්දීය විදේශ කටයුතු අමාත්‍යවරයා පිළිගනු ලැබිණ.
එක්සත් ජාතීන්ගේ මහා මණ්ඩලයේ පැවැත්වෙන රැස්වීමේදී “අන්තර් සම්බන්ධිත අභියෝග සඳහා පරිවර්තනීය විසඳුම්”යන මාතෘකාව යටතේ ඉන්දියාව වෙනුවෙන් එහි විදේශ කටයුතු අමාත්‍යවරයා දේශනයක් ඉදිරිපත් කිරීමට නියමිතය.
කොවිඩ්-19 වසංගතයෙන් පසු වසර දෙකකට පසු ප්‍රථම වරට පවත්වනු ලබන ඉහළ පෙළේ රැස්වීමට රාජ්‍ය හෝ රජයේ ප්‍රධානීන් 153 ක්, නියෝජ්‍ය අගමැතිවරුන් තිදෙනෙකු සහ විදේශ අමාත්‍යවරුන් 34 දෙනෙකු සහභාගී වීමට අපේක්ෂා කෙරේ. .
ඉන්දීය විදේශ කටයුතු අමාත්‍ය එස් ජයිශංකර් විසින් ද්විපාර්ශ්වික සහ බහුපාර්ශ්වික හමුවීම් වලට සහභාගී වීමට නියමිතය. එක්සත් ජාතීන්ගේ ආරක්ෂක මණ්ඩලයේ ප්‍රතිසංස්කරණ ඔහුගේ න්‍යාය පත්‍රයේ ඇති ප්‍රධාන ස්ථානයක් ගනු ඇත.
මීට අමතරව, ඉන්දීය විදේශ කටයුතු අමාත්‍යාංශය විදේශ කටයුතු අමාත්‍ය එස් ජයිශංකර්ගේ සංචාරයට පෙර නිවේදනය කළේ ඔහු විසින් ජී-4 (ඉන්දියාව, බ්‍රසීලය, ජපානය, ජර්මනිය) හි අමාත්‍ය රැස්වීමකට සත්කාරකත්වය සපයන බවයි. එමෙන්ම ඔහු “බහුපාර්ශ්විකත්වය පුනර්ජීවනය කිරීම සහ එක්සත් ජාතීන්ගේ ආරක්‍ෂාවේ විස්තීරණ ප්‍රතිසංස්කරණ සාක්ෂාත් කර ගැනීම” පිළිබඳ එල්.69 කණ්ඩායමේ ඉහළ පෙළේ රැස්වීමට සහභාගී වනු ඇති බවයි.
ජී-4 රටවල් එක්සත් ජාතීන්ගේ ආරක්ෂක මණ්ඩලයෙහි ස්ථිර ආසන සඳහා එකිනෙකාට සහය දැක්වීම සහ එහි ව්‍යාප්තිය ප්‍රවර්ධනය කිරීම විශේෂ කරුණක් වේ.
ඔහුගේ දින 11ක එක්සත් ජනපදයේ සංචාරය තුළ ඉන්දීය විදේශ කටයුතු අමාත්‍ය එස් ජයිශංකර් ඉන්දියාව, ඕස්ට්‍රේලියාව, ජපානය සහ එක්සත් ජනපදයෙන් සමන්විත ක්වාඩ්හි රැස්වීම්වලට සහ බ්‍රික්ස්හි හමුවීම් වලටද සහභාගී වනු ඇත.
ඉන්දීය විදේශ කටයුතු අමාත්‍යාංශයට අනුව ඔහු ජී-20 සහ එක්සත් ජාතීන්ගේ ආරක්ෂක මණ්ඩල සාමාජික රටවල විදේශ අමාත්‍යවරුන් සමඟ ද්විපාර්ශ්වික රැස්වීම් වලට සහභාගී වනු ඇත.
ඉන්දීය විදේශ කටයුතු අමාත්‍ය එස් ජයිශංකර් සැප්තැම්බර් 18 සිට සැප්තැම්බර් 24 දක්වා නිව්යෝර්ක් හි සිටිනු ඇත. අනතුරුව ඔහු ද්විපාර්ශ්වික රැස්වීම් සඳහා සැප්තැම්බර් 25 සිට සැප්තැම්බර් 28 දක්වා වොෂින්ටන් ඩීසී වෙත ගමන් කරනු ඇති බව ඉන්දීය විදේශ කටයුතු අමාත්‍යාංශය පවසයි.
ඉන්දියා නිවුස් නෙට්වර්ක්ස්
