කොවිඩ්-19 පැතිරීම වැළැක්වීමේ ජාතික ක්‍රියාන්විත මධ්‍යස්ථානයේ දී අද (10) දින පැවැත්වූ මාධ්‍ය හමුවේදී සෞඛ්‍ය ඇමතිනි පවිත්‍රා වන්නිආරච්චි මහත්මිය, ආරක්‍ෂක මාණ්ඩලික ප්‍රධානී, යුද්ධ හමුදාධිපති සහ කොවිඩ් -19 පැතිරීම වැළැක්විමේ ජාතික ක්‍රියාන්විත මධ්‍යස්ථානයේ ප්‍රධානී ලුතිනන් ජෙනරාල් ශවේන්ද්‍ර සිල්වා, සෞඛ්‍ය සේවා අධ්‍යක්‍ෂ ජෙනරාල් විශේෂඥ වෛද්‍ය අනිල් ජාසිංහ මහතා සහ නියෝජ්‍ය පොලිස්පති නීතිඥ අජිත් රෝහණ මහතා දැක්වූ අදහස් සම්පූර්ණයෙන්ම පහත පළවේ.
පසුගිය සතිය පුරාම ජනතාව අතරින් කොවිඩ් ආසාදිතයින් වාර්තා වී නෑ – සෞඛ්‍යඇමතිනි පවිත්‍රා වන්නිආරච්චි
හෙට (11) දින රට විවෘත කිරීමෙන්, රජයේ අරමුණ වනුයේ රටෙහි ආර්ථිකය ක්‍රමානුකූලව ගොඩනැංවීමට පුද්ගලික අංශය විවෘත කිරීමත්, ඒ සඳහා වූ රාජ්‍ය යාන්ත්‍රණය ක්‍රියාත්මක කිරීම වේ. එම නිසා සියළුම ජනතාව නගර වෙතට පැමිණීම රජය විසින් අපේක්‍ෂා නොකරයි.
එසේම, පසුගිය දින කිහිපය තුලදී අවධානම් කලාප ලෙස නම්කර ඇති බණ්ඩාරනායකපුර ප්‍රදේශයත්, සුදුවැල්ල ප්‍රදේශයෙනුත් කිසිදු රෝගියෙකු වාර්ථා නොවේ. විශේෂයෙන් පසුගිය සතිය තුලදී ප්‍රජාව තුලින් ආසාධිත රෝගීන් වාර්ථා නොවන අතර වැලිසර නාවික කඳවුරේ නාවික හමුදා සොයුරන් හා ඔහුන් සමීපව ඇසුර කළ අයවළුන් පමණක් ආසාධිතයන් ලෙස වාර්ථා වේ.
එම කරුණු පදනම්ව රජය විසින් හෙට (11) දිනයේ රට විවෘත කරනුයේ ආර්ථිකය ගොඩනැංවීම සඳහා වූ යාන්ත්‍රණය ආරම්භ කිරීම වේ. එම නිසා සියළුම ජනතාව අනවශ්‍ය ලෙස ගමනාගමනයේ නොයෙදිය යුතු වේ. එසේම, නාවික හමුදාවේ සොයුරන් සහ ඔහුන්ගේ පවුල්වල අයවළුන් සහ සමීපව ඇසුර කළ අයවළුන් සියළුම දෙනා නිරෝධායනයට ලක්කර ඇත. ඔබ නිරෝධායනය වූ අයෙකුනම් ඔබගේ වගකීම වනුයේ අදාළ නිරෝධායන ප්‍රතිපත්තීන්ට අනුකූලව ක්‍රියාකිරීමයි.
ප්‍රවාහන පහසුකම් රැකී රක්‍ෂා සඳහා පැමිණෙන අයවළුන් සඳහා පමණයි – ලුතිනන් ජෙනරාල් ශවේන්ද්‍ර සිල්වා
ඊයේ (09) දිනයේ වාර්ථා වූ ආසාධිතයින් ප්‍රමාණය 12 ක් වන අතර එයින් 10 දෙනෙකු නාවික හමුදාවේ වීරෝධාර රණවිරුවන් වේ. එසේම, අනෙක් දෙදෙනා එම රණවිරුවන් සමීපව ඇසුරු කරනු ලැබූ නිරෝධායනය වෙමින් සිටි අයවළුන් වේ. ඒ අනුව, මේ වන විට ශ්‍රී ලංකාව තුළ ආසාධිතයින් 578 දෙනෙකු රෝහල් තුළ ප්‍රතිකාර ලබමින් සිටිනු ඇත. විශේෂයෙන් 259 දෙනෙකු සම්පූර්ණ සුවය ලබා රෝහල් වලින් පිටත්ව ගොස් ඇත.
මෙල්බර්න් (Melbourne) සිට ශ්‍රී ලංකන් මගී ගුවන් යානයක් මගින් පුද්ගලයින් 274 ක කණ්ඩායමක් අද (10) දින උදෑසන දිවයිනට පැමිණෙන ලදී. එසේ පැමිණි ඔවුන් සියළු දෙනා ත්‍රිවිධ හමුදාව විසින් පාලනය කරනු ලබන නිරෝධායන මධ්‍යස්ථාන වෙත නිරෝධායන ක්‍රියාවලිය සඳහා යොමුකරන ලදී. එසේම, අද (10) දින සන්ද්‍යාවේ ශ්‍රී ලංකන් ගුවන් යානයක් මගින් මැලේසියාවේ සිට ශ්‍රී ලාංකිකයින් පිරිසක් දිවයිනට පැමිණීමට නියමිතව ඇත.
ශ්‍රී ලංකාවේ සෑම දිස්ත්‍රික්කයක් තුළම හෙට (11) දිනයේ රාජ්‍ය සහ පුද්ගලික ආයතනයන් යම් සීමාවන් යටතේ විවෘත කිරීමට නියමිතව ඇත. ජනාධිපති කාර්යාලය විසින් ඇඳිරි නීතිය තවදුරටත් පවත්නා ප්‍රදේශ පිළිබඳව අද (10) දින සන්ද්‍යාවේ දැනුම් දීමට නියමිතව ඇත.
මීට ප්‍රථම සති වලදී රාජ්‍ය සහ පෞද්ගලික ආයතන ප්‍රධානීන් වෙත 3න් 1ක් වූ අවම පුද්ගලයින් සංඛ්‍යාවක් මඟින් ආයතන පවත්වාගෙන යන ක්‍රමවේදය සැලසුම් කරගැනීම සඳහා වූ උපදෙස් ලබාදී ඇත. ඒ අනුව, ආයතන ප්‍රධානීන් ලබාදී ඇති උපදෙස් වලට අනුකූලව හෙට (11) දිනයේ සිට ක්‍රියාකරනු ඇතැයි අපේක්‍ෂා කරනු ඇත. එසේම, සේවකයින් ක්‍රියාකරන ආකාරය, ශාරීරික දුරස්ථභාවය තබාගැනීම, ගමනාගමනය හා සියළුම සෞඛ්‍ය උපදෙස් සබැඳිව දැනුවත් කිරීම් සිදුකර ඇත.
මීට ඉහතදී හඳුන්වා දුන් ඇඳිර නීතිය බලපවත්නා ප්‍රදේශයන් තුළ හැඳුනුම්පත උපයෝගී කරගනිමින් ගමන් කළහැකි ක්‍රමවේදයට අනුව අත්‍යවශ්‍ය කටයුතු සඳහා පමණක් ජනතාව නගර වෙත පැමිණෙතැයි අපේක්‍ෂා කරනු ලබයි. එසේම, මීට ඉහතදී ඇඳිරි නීතිය ඉවත් කරනු ලැබූ දිස්ත්‍රික්ක ඒ අයුරින්ම පවත්වාගෙන යනු ලබයි.
මේ අනුව, හුදෙක්ම ප්‍රවාහන පහසුකම් සපයා ඇත්තේ රැකී රක්‍ෂා සඳහා පැමිණෙන අයවළුන් සඳහා පමණක් වන අතර පුද්ගලික අවශ්‍යතාවයන් සඳහා මෙම ප්‍රවාහන පහසුකම් ලබා නොගන්නා ලෙස ජනතාවට දන්වා සිටිනු ලැබේ.
ශ්‍රී ලාංකීය ජනතාව පසුගිය සති කිහිපය තුළ කොවිඩ් – 19 තුරන් කිරීම සඳහා විශාල කැපකිරීම් ප්‍රමාණයක් සිදු කරන ලදී. එසේම, හෙටින් ආරම්භ කරනු ලබන සතියේ ජනතාවගේ අරමුණ හා වගකීම විය යුත්තේ කොඩිඩ් ආසාදිතයෙක් නොවී සිටීමත් ත්‍රිවිධ හමුදාවට, ශ්‍රී ලංකා පොලීසියට හා සිවිල් ආරක්‍ෂක දෙපාර්තමේන්තුවට ඔහුන්ගේ රාජකාරි කරගෙන යාම සඳහා සහයෝගය ලබාදෙන ලෙසයි.
ලංකාවෙන් කොවිඩ්-19 තුරන් කරන්න විශාල කාලයක් ගතවේවි – සෞඛ්‍ය සේවා අධ්‍යක්‍ෂ ජෙනරාල්
කොවිඩ් – 19 සඳහා වූ සීමාවන් හෙට දිනයේ සිට රජය විසින් යම් ප්‍රමාණයකට නිදහස් කිරීමට නියමිතව ඇත. පූර්ව කොවිඩ් – 19 තුළ අප ජීවත් වූ ආකාරයත් මේ වන විට පූර්ව පශ්චාත් කොවිඩ් – 19 කාලය ගතකරමින් සිටින අතර, ඉදිරියේදී අප ජීවත් විය යුත්තේ කොවිඩ් – 19 පූර්ව කාලය තුළ හැසිරූ ආකාරයෙන් නොවේ.
අප සමාජය තුළට ආගන්තුක වූ වචන මෙන්ම ක්‍රියාකාරකම් කිහිපයක් එකතු විය. එසේම, මෙම ලිහිල් කිරීම සිදුකරනවා සේම කොවිඩ් – 19 පැතිරීම පාලනය කිරීමේ ක්‍රියාදාමය සිදුකිරීම අත්‍යවශ්‍ය වේ. මක්නිසාදයත් මෙයින් කිසිසේත්ම කොවිඩ් – 19 ශ්‍රී ලංකාව තුලින් සම්පූර්ණයෙන් තුරන් වූවා යැයි අදහස් නොවේ. මේ සඳහා විශාල කාලයක් ගත වේ. එනිසා මේ කාලය තුළ අප විසින් උගත චර්යාවන් හා ක්‍රමවේද, නීතින්, ප්‍රතිපත්තීන් හා සෞඛ්‍ය උපදෙස් තවදුරටත් ක්‍රියාත්මක වේ. එම නිසා පුද්ගලික අංශ, රාජ්‍ය අංශ, ව්‍යාපාර, ගමනාගමනය සහ අනෙකුත් සියළුම ආයතන වගකීමෙන් යුතුව ක්‍රියාකළ යුතු වේ.
ඉදිරියේදී ඔබ හට කැස්ස, ස්වසන අපහසුතා, උණ හෝ වෛරසය ආශ්‍රීත ඕනෑම මූලික රෝග ලක්‍ෂණයක් වේනම් නොපමාව හුදකලා රෝහල් ලෙස නම්කර ඇති රෝහල් 30 න් රෝහලක් වෙත වාර්ථා කරන ලෙසත්, සෞඛ්‍ය අංශ වෙතින් ලබා දී ඇති නීතීන්ට, ප්‍රතිපත්තීන් හා උපදෙස් වලට අනුකූලව ක්‍රියාකරන මෙන් ඉල්ලා සිටිනු ලැබේ. එසේම, අතිගරු ජනාධිපතිතුමාගේත්, අග්‍රාමාත්‍යතුමාගේත් සහ සෞඛ්‍ය අමාත්‍යතුමියගේත් උපදෙස් අනුව ත්‍රිවිධ හමුදාව, පොලීසිය හා සෞඛ්‍ය අංශ වලින් සිදුකරනු ලබන මෙම ක්‍රියාදාමය ඉදිරියටත් සිදුකරනු ලබයි.
සෞඛ්‍ය අමාත්‍යාංශය විසින් නිකුත් කර ඇති සෞඛ්‍ය නිර්ණායක අකුරටම පිළිපැදිය යුතුයි – නියෝජ්‍ය පොලිස්පති නීතිඥ අජිත් රෝහණ
හෙට දිනයේ කොළඹ දිස්ත්‍රික්කය, බස්නාහිර පළාත සහ පුත්තලම දිස්ත්‍රික්කය ඇඳිරි නීතිය පවත්වාගෙන යන අතරතුර එදිනෙදා කටයුතු ආරම්භ කරනු ලබයි. නිරෝධායන ප්‍රතිපත්ති වලට අනුකූලව නිරෝධායන රීතීන් වලට ගරු කරමින් ජන ජීවිතය යථා තත්ත්වයට පත් කිරීම, ආර්ථිකය ගොඩනැංවීම හා ආනයන අපනයන ක්‍රියාවලිය ශක්තිමත් කිරීම යන කාරණා මත මෙම තත්ත්වය ගොඩනංවා ඇත.
හෙට (11) දින රාජ්‍ය අංශයේ සේවකයින් තම සේවා ස්ථානයට පෙරවරු 08.30 ට පෙර වාර්ථා කළයුතු අතර පුද්ගලික අංශයේ සේවකයින් රාජකාරි ආරම්භ කිරීම පෙරවරු 08.30 ත් 10.00 ත් අතර කාලය තුළ වාර්ථා කිරීම උචිත වේ. එසේම, එම සේවකයින් නැවත රැගෙන යෑම වස් රාජ්‍ය සේවකයින් සඳහා පස්වරු 03.00 – 04.00 ත් අතර සහ පුද්ගලික අංශය සඳහා පස්වරු 04.00 – 05.00 ත් අතර කාලය තුළ පිටව යෑම නිර්දේශ කරනු ලබයි.
මෙම කාලයන්ට අනුගතව ඔබ ගමන් කරන්නේනම් වාහන තදබදය සහ වාහන පරික්‍ෂා කිරීමට අවශ්‍යනම් එය පහසුවක් වන බැවිණි. නමුත් සේවා මුර ලෙස රාජකාරි ඉටු කරනු ලබන රාජ්‍ය සහ පුද්ගලික ආයතන සඳහා මෙම රීතිය වලංගු නොවේ. එසේම, පුද්ගලික වාහන මඟින් සේවා ස්ථානයට ගමන් කරන්නේනම් එය සනාථ කළයුතු අතර බස්නාහිර පළාත තුළ පුද්ගලික අවශ්‍යතාවයන් සඳහා ගමන් කිරීමට අවසර ලබා නොදෙනු ඇත. එසේ සිදු කරන්නේනම් එය ඇඳිරි නීති කැඩීමක් වේ.
එසේම, 2019 – 04 – 17 දින කොවිඩ් වැළැක්වීම සඳහා වූ සෞඛ්‍ය අමාත්‍යංශය විසින් නිකුත් කරන ලද නිර්නායක කෙරෙහි සියළුදෙනා අවධානය යොමු කළයුතු වේ. ත්‍රී රෝද රථ, කුලී රථ හා පොදු ප්‍රවාහන සේවා ලබාගන්නේනම් (ත්‍රී රෝද රථයක දෙදෙනෙක් සහ මොටර් රථ සඳහා තිදෙනෙකු වශයෙන්) එය නිරෝධායන රීතීන්ට අනුකූලව සිදුකළයුතු වේ.
ආයතන ප්‍රධානීන් වෙත දන්වා ඇති ආකාරයට තම සේවකයින් එම පරිපාලන දිස්ත්‍රික්කය තුලින් ගෙන්වාගැනීමට කටයුතු කළයුතු අතර අත්‍යවශ්‍යතාවයක් වුවහොත් පමණක් පිටස්තර පරිපාලන දිස්ත්‍රික්කයක් වෙතින් සේවකයන් ගෙන්වාගත හැක. සියළුම රාජ්‍ය හෝ පුද්ගලික සේවකයන් සඳහා අනන්‍යතාවය ඔප්පු කළහැකි හැඳුනුම්පතක් තිබීම හා එදිනට රාජකාරි සඳහා සේවා ස්ථානයට වාර්ථා කළයුතු බවට ආයතනය විසින් ලබාදී ඇති අවසරපතක් (ඉලෙක්ට්‍රොනික, කෙටි පණිවිඩ හෝ වෙනත් ක්‍රම) තිබීම අනිවාර්ය වේ.
ඉදිකිරීම් සඳහා ලබාදී ඇති නිර්නායකයන්ට අනුව සිදුකළහැකි අතර සැලුන් සහ රූපලාවන්‍යාගාර අදාළ ප්‍රදේශයේ සෞඛ්‍ය වෛද්‍ය නිලධාරිගේ අවසරය මත පවත්වාගෙන යා හැක. එසේම, පිසූ ආහාර අලෙවි කරනු ලබන ස්ථාන (හෝටල් සහ තේ කඩ) විවෘත කිරීම සඳහා අවසර නොලැබෙන අතර ඩිලිවරි හෝ ඔන්ලයින් ක්‍රමයට ආහාර බෙදාහැරීම සඳහා අවසර ලැබෙනු ඇත. විශේෂයෙන් නවාතැන් පහසුකම් සහිත හෝටල් නීරෝධායන ප්‍රතිපත්තියට අනුව සිදුකළ හැකි අතර රෙස්ටූරන්ට් පවත්වාගෙන යාම සඳහා අවසර නොලැබෙනු ඇත.
නිෂ්පාදනාගාර, සාමාන්‍ය වෙළෙඳසැල් හා අනෙකුත් අත්‍යවශ්‍ය ස්ථාන සමාජ දුරස්ථභාවය පවත්වාගනිමින් ආරම්භ කළහැකි අතර සම්භාහන මධ්‍යස්ථාන, සතිපොළ, කායවර්ධනාගාර හා සමාජශාලා විවෘත කිරීම සඳහා අවසර නොලැබෙනු ඇත. එසේම, පුද්ගලික සෞඛ්‍ය මධ්‍යස්ථාන විවෘත කිරීම සෞඛ්‍ය අධ්‍යක්‍ෂ ජෙනරාල්වරයා විසින් ලබාදී ඇති නිර්නායකයන්ට අනුව සිදුකළ යුතු වේ.
මීට පෙර හඳුන්වා දී ඇති හැඳුනුම්පත් ක්‍රමවේදයට අනුව අත්‍යවශ්‍ය කරුණක් (ඖෂධ, ආහාර මිලදී ගැනීම) සඳහා ස්ථීර පදිංචි ස්ථානයේ සිට පයින් ගොස් ලඟම ඇති ස්ථානයෙන් අවශ්‍යතාවය ඉටුකරගත හැක. එසේ ක්‍රියා නොකරන පුද්ගලයින්ට නිරෝධායන රීතීන්ට අනුව නීතිමය පියවර ගනු ලබයි.
පෝලිම් සැදී සිදුකරනු ලබන ක්‍රියාවන් (බිල් ගෙවීම්, භාණ්ඩ මිලදී ගැනීම) සිදුකරනු ලබන ආයතන හා වෙළෙඳසැල් නිරෝධායන ක්‍රමවේදයට අනුව සමාජ දුරස්ථභාවය රැකෙන පරිදි හා සෞඛ්‍ය උපදෙස් අනුව සිදුකිරීම සඳහා ආයතන ප්‍රධානින් වගකිව යුතු වේ. එසේම, පරික්‍ෂා කිරීම සඳහා ඔබ ආයතනය වෙතට පැමිණෙන සෞඛ්‍ය නිලධාරි හා ආරක්‍ෂක අංශ නිලධාරින් වෙත සහයෝගය ලබාදෙන ලෙස දන්වා සිටිනු ලැබේ. බස්නාහිර පළාත තුළ හෙට දිනයේ පොලිස් නිලධාරින් 10,000 කට ආසන්න ප්‍රමාණයක් රාජකාරින් සඳහා යොදවනු ලැබේ.
