මහර ගැටුමට මුල පොලිස්පති මගේ උපදෙස් නොතකා හැරීමයි – නීතිපති
- RSL
- December 14, 2020
- පුවත් සහ වාර්තා
- featured
- 0 Comments
බන්ධනාගාරය තුළ සිරකරුවන් අඩු කිරීමට අවශ්ය පියවර ගැනීමට මාර්ගෝපදේශ සහ උපදෙස් අවස්ථා දෙකකදී තමන් විසින් පොලිස්පතිවරයාට ලබාදුන් බව නීතිපති දප්පුල ද ලිවේරා මහතා පැවසුවේය.
අද (14) දින නව නීතිපති දෙපාර්තමේන්තු කාර්යාල ගොඩනැගිල්ල විවෘත කිරීමේ අවස්ථාවට එක්වෙමින් නීතිපතිවරයා මේ බව සඳහන් කළ අතර එහි දී නීතිපතිවරයා කියා සිටියේ තමා විසින් ලබා දුන් එම උපදෙස් ක්රියාත්මක වුයේ නම් මහර බන්ධනාගාර ගැටුම සිදුනොවීමට ඉඩතිබූ බවයි.
තමා විසින් පළමුවරට මෙම උපදෙස් ලබා දුන්නේ පසුගිය අප්රේල් මාසයේදී බව ද නීතිපතිවරයා මෙහිදී කීවේය.
මෙහිදී මාධ්ය හමුවේ වැඩි දුරටත කරුණු දක්වමින් නීතිපතිවරයා කියා සිටියේ පොලිස්පතිවරයා විසින් තමන් විසින් ලබා දුන් මාර්ගෝපදේශ සහ උපදෙස් කිසිවක් ක්රියාවට නොනැගීමට හේතු කුමක්ද යන්න තමාට අපැහැදිලි බවයි.
“මම මේ වසංගත සමයේ අවස්ථා දෙකකදී බන්ධනාගාරයේ සිටින වැඩි පිරිස අඩු කරන්න කියලා පොලිස්පතිවරයාට උපදෙස් ලබා දුන්නා. මම අප්රේල් මාසයේදී ඉල්ලා සිටියා බන්ධනාගාර තුළ ඉතා තදින්ම මාර්ගෝපදේශ ක්රියාත්මක කරන ලෙසට. නමුත් පොලිස්පතිවරයා විසින් ඒ මාර්ගෝපදේශ හා උපදෙස් කිසිවක් ක්රියාවට නංවා නැහැ. ඊට හේතුව මට අපැහැදිලියි‘
මෙහිදී නීතිපතිවරයා කියා සිටියේ බන්ධනාගාර තුළ සිටින වැඩි පිරිස අඩු කිරීමට අමාත්යවරයා විසින් තමාගෙන් උපදෙස් ඉල්ලා සිටි බවයි.
‘අමාත්යවරයා විසින් මගෙන් ඉල්ලීමක් කළා පොලිසියට උපදෙස් ලබාදෙන්න කියලා බන්ධනාගාරයේ සිටින වැඩි පිරිස අඩු කිරීමට. මම ඒ අනුව සවිස්තරාත්මකව අදාළ උපදෙස් ලබා දුන්නා. එම උපදෙස් නොවැම්බර් මස අග වන විට ක්රියාවට නංවනු ලැබුවා. මගේ උපදෙස් අප්රේල් මාසයේදී ක්රියාත්මක කළා නම් මහර බන්ධනාගාරයේ ගැටුම ඇතිවෙන්නේ නැහැ‘ යැයි ද නීතිපතිවරයා ප්රකාශ කළේය.
