එක්සත් ජාතික පක්ෂය යළි ගොඩනැගීම සදහා රනිල් වික්‍රමසිංහ මහතා වහාම පක්ෂ නායකත්වයෙන් ඉල්ලා අස්වී පක්ෂ නායකත්වය කරු ජයසූරිය මහතාට පැවරිය යුතු බව එක්සත් ජාතික පක්ෂයේ කරුණ කණ්ඩායම සහ වෘත්තීය සංවිධාන අවධාරණය කරති. ඔවුන් පෙන්වා දෙන්නේ පසුගිය මහ මැතිවරණයේදී ජාතික වශයෙන් සියයට 3ක් හෝ ලබාගත නොහැකි වූ එජාප නායකයා ඉදිරි පළාත් සභා මැතිවරණය ජයග්‍රහණය කරන්නේ කෙසේද යන්න වහාම පැහැදිලි කළ යුතු බවයි.
‘රනිල් වික්‍රමසිංහ 1994 සිට පක්ෂ නායකත්වයේ එල්ලී සිටිනවා. ඇත්තටම ඔහුට එදා පක්ෂ නායකත්වය ලැබුණේ ඔහුගේ දක්ෂතාව නිසා නොවෙයි ප්‍රේමදාස, ලලිත් ඇතුළත් මුදලි සහ ගාමිණි දිසානායක ආදී ප්‍රබලයින් සහ අති දක්ෂයින් ඝාතනය වුණ නිසයි. ඊට පස්සේ දිගින් දිගටම සිදු වුණේ පක්ෂයේ සිටි ජ්‍යෙෂ්ඨයින් සහ දක්ෂයින් පක්ෂය හැර යාම. මුලින්ම පක්ෂයේ ප්‍රබයෝ චන්ද්‍රිකා යුගයේදී පක්ෂය හැරදාලා ශ්‍රී ලංකා නිදහස් පක්ෂයට එක් වුණා. ඊට පස්සේ මහින්ද රාජපක්ෂ යුගයේදී එක් වුණා. අද මහින්ද ළග ඉන්න කෙහෙළිය, ජොන්ස්ටන්, ලක්ෂ්මන් යාපා වාගේ ප්‍රබලයින් වගේම දයාසිරිත් එජාපයේ දක්ෂයින්. ඔවුන් සියලු දෙනාම එජාපයට අහිමි වුණේ රනිල් වික්‍රමසිංහගේ අදක්ෂකමත්, දක්ෂයින්ට තැනක් නොදී රෝයල් කල්ලියට සහ ඔහුගේ සමීපතමයින්ට පක්ෂයේ ප්‍රබල තැන් දීම නිසයි‘
අද සමග අදහස් දක්වමින් එක්සත් ජාතික පක්ෂය සමග දීර්ඝ කාලයක් කටයුතු කළ දේශපාලන විද්‍යා මහාචාර්ය වරයෙක් පැවසුවා.
ඔහු වැඩි දුරටත් පැවසුවේ රනිල් වික්‍රමසිංහගේ බල ලෝභය නිසා කරු ජයසූරිය මහතා වැනි කීර්තිමත් දේශපාලනඥයෙකු පවා කෙටි කාලයක් පක්ෂයට අහිමි වූ බවයි.
‘අපි හොදටම දන්නවා කරු ජයසූරිය මහතාට පක්ෂය තුළ සිදු වූ කෙනහිළි. රනිල් වික්‍රමසිංහ සහ සජිත් ප්‍රේමදාස අතර පැවැති බල අරගලයේදී රනිල් කරුව පාවිච්චි කළා මිස කරු ජයසූරිය මහතාට පක්ෂය නායකත්වය ලබාදීමට පියවර ගත්තේ නැහැ. ඔහුට අවංක වුවමනාවක් තිබුණා නම් එය ඉතාම පහසුවෙන් කරන්න තිබුණා. එසේ වුණා නම් සජිත් ප්‍රේමදාස වෙනත් පක්ෂයක් බිහිකරගෙන එජාපයේ ඡන්ද පදනමම අරගෙන ගිහින් එජාපය අනාථ කරන්නේ නැහැ‘ ඔහු වැඩි දුරටත් සදහන් කළා.
මෙහිදී මහාචාර්යවරයා අවධාරණාත්මකව කියා සිටියේ රනිල් වික්‍රමසිංහ මහතාට එක් දිනක් හෝ කල් නොදිය යුතු බවයි.
‘ඔහු මේ මොනවාද කියන කතා. වජිර අබේවර්ධන, අකිල කියන්නේ රනිල්ගේ රූකඩ මිස නායකයෝ නොමෙයි. මොන ප්‍රශ්න තිබුණත් ජාතික වශයෙන් පිළිගත හැකි නායකයෙක් වශයෙන් සැලකිය හැකිවන්නේ රවී පමණයි. ඒත් රනිල්ගේ යටිකූට්ටු වැඩ නිසා රවීට ඉහළට එන්න බැහැ. රනිල් බලන්නේ පක්ෂ නායකත්වයට තමන්ගේ බෑණා වන රුවන් විජේවර්ධන ගේන්න බැරි නම් වජිර, අකිල වාගේ රූකඩයක් ගේන්න. ඒකට කිසිසෙත් අවස්ථාව නොදිය යුතුයි. රනිල්ට ගෑවිලා තියෙන අයෙකුටවත් පක්ෂ නායකත්වය නොයා යුතුයි‘
මෙහිදී මහාචාර්යවරයා දැඩිව අවධාරණය කළේ පසුගිය මහ මැතිවරණයේදී ඡන්ද පොළට නොගිය 40 ලක්ෂයේ අති බහුතරය එජාප පාක්ෂිකයින් බවයි. ඔවුන් යළි ඡන්ද පොළට කැදවා ගැනීමට හැකි වඩාත් ආකර්ෂණීයම තුරුම්පුව කරු ජයසූරිය මහතා බව ඔහු අවධාරණය කළේය.
‘කරු ජයසූරිය මහතාට පොදුවේ සියලු දෙනාටම එකග විය හැකියි. සිංහල බෞද්ධ වේවා, සුළුජන වේවා, වෘත්තීය වේවා ඔහු සමග භේදයකින් තොරව ඕනෑම ප්‍රජා කණ්ඩායමකට එක්විය හැකියි. අකිලට, වජිරට, රුවන්ට එවැනි දේශපාලන පෞරුෂත්වයක් නැහැ. එය තිබෙන්නේ කරු ජයසූරියට පමණයි‘ ඔහු වැඩි දුරටත් සදහන් කළා.
මෙහිදී මහාචාර්යවරයා කියා සිටියේ මලයාසියාවේ මහතීර් මොහොමඩ් වැනි වයෝවෘධ නායකයෙකුට යළි අගමැති පදවියට පත්වීමට හැකියාව ලැබුණ බව අප අමතක නොකළ යුතු බවයි.
‘කරුගේ වයස ප්‍රශ්නයක් නොවෙයි. වත්මන් දේශපාලනය තුළ වුවත් මහින්ද රාජපක්ෂ, ගෝඨාභය රාජපක්ෂ නියෝජනය කරන්නේ මැදිවයස හෝ නොවෙයි. ඒත් ඔවුන් වටා වයස් භේදයකින් තොරව ජනතාව ඒකරාශී වෙනවා. කරුටත් ඒ දේශපාලන පෞරුෂත්වය නොඅඩුව තිබෙනවා. ඒ නිසා එජාපය වළ දැමීමට රනිල්ට ඇති වුවමනාව අපි මනාව වටහා ගත යුතුයි. ඔහු මේ උත්සාහා කරන්නේ එජාපය වළ දමා තමාගේ පුද්ගලික වෛරයක් පිරිමසා ගැනීමටයි. එයට කිසිසේත් ඉඩ නොදිය යුතුයි‘ ඔහු දැඩිව අවධාරණය කළා.
මේ අතර ප්‍රවීන දේශපාලන විශ්ලේෂක භාතිය බරුකන්ද මහතා සදහන් කළේ තවත් මාස කිහිපයකින් පැවැත්වීමට නියමිත පළාත් සභා මැතිවරණයේදී එජාපයට තරග කිරීමට අපේක්ෂකයෙක් පවා සොයා ගත නොහැකි වන බවයි.
‘එජාපයේ සියලුම දේශපාලන ව්‍යුහයන් බිද වැටිලා. ගම් මට්ටමින් සංවිධානය ජාලය සම්පූර්ණයෙන්ම බිද වැටිලා තියෙන්නේ. ඒ නිසා ඉතාම පැහැදිලිව ඉදිරි පළාත් සභා ඡන්දයේදී එජාපයට අපේක්ෂකයෙක් පවා සොයා ගැනීමට නොහැකි වෙනවා. මොකද එජාප වෙනුවෙන් එක රුපියලක් පවා වැය කිරීම නිෂ්ඵල දෙයක් බව ඕනෑම කෙනෙකු දන්නවා. ඒ නිසා රනිල් තවත් කල් ගැනීම ඇත්තටම එජාපයේ මළ ගම නිල වශයෙන් ප්‍රකාශ කිරීමක්. ඒ නිසා හොදම පියවර වන්නේ කරු ජයසූරියට පක්ෂ නායකත්වය දී රනිල් සහ රනිල්ගේ සහචරයින් දේශපාලනයෙන් විශ්‍රාම ගැනීමයි. නැතිනම් මුල්ලකට වී බලා සිටීමයි‘ භාතිය බරුකන්ද වැඩි දුරටත් පැහැදිලි කළා.
මේ සම්බන්ධයෙන් අප එක්සත් ජාතික පක්ෂයට සහාය පළ කළ නීතිඥයින්, මාධ්‍ය වේදීන් සහ වෘත්තිකයින්ගෙන් කළ විමසීම්වලදී ඔවුන් දැඩිව අවධාරණය කළේ රනිල් වික්‍රමසිංහට ලැජ්ජාවක් කියා දෙයක් ගෑවී හෝ තිබේ නම් ඔහු පළාත් සභා මැතිවරණය නොව මහ මැතිවරණයේ පළමු ප්‍රතිඵලය නිකුත් වූ මොහොතේදී පක්ෂ නායකත්වයෙන් පමණක් නොව දේශපාලනයෙන් පවා සමුගත යුතුව තිබූ බවයි.
‘පසුගිය මහ මැතිවරණයේදී රනිල් වික්‍රමසිංහගේ මනාප ඡන්ද පවා ගණන් කළේ නැහැ. ඒකෙන්ම පේනවා ඔහු දේශපාලනිකව කොතරම් අවලංගු කාසියක් බවට පත්ව තිබේද කියලා. 1960 මාර්තු මැතිවරණයෙන් ආචාර්ය විජයානන්ද දහනායක පරාජයට පත් වුණාට පස්සේ හිටපු ආණ්ඩුවේ අගමැතිවරයෙක් ලැබූ නින්දා සහගතම පරාජයට තමයි පසුගිය මහ මැතිවරණයේදී රනිල් මුහුණ දුන්නේ. ඔහු දැනවත් තමාට ඇති ඇත්ත වටිනාකම වටහා ගත යුතුයි. දැන් රනිල් අයිති ඉතිහාසයේ කුණු බක්කියට මිස වෙන තැනකට නොවෙයි. ඔහු පක්ෂ නායකත්වයෙන් පමණක් නොවෙයි දේශපාලනයෙන් පවා විශ්‍රාම යා යුතුයි. පක්ෂ නායකත්වය පක්ෂයේ ජ්‍යෙෂ්ඨයා වන කරුට පවරා ඔහු ගෞරවනීය ලෙස විශ්‍රාම යා යුතුයි. එසේ නැතිව අකිල, වජිර හෝ රුවන් වාගේ රූඩක දාලා පක්ෂ පාලනය කිරීම ගැන සිහින නොදැකිය යුතුයි‘ එජාපය සමග සමීපව කටයුතු කළ ජ්‍යෙෂ්ඨ නීතිඥයෙකු සදහන් කළා.
සටහන – රුවන් ලොකු විතානගේ
