ප්‍රමාණවත් නෑ.
මහජන සම්බන්ධතාවයක් ඇති ජනතාවගේ දුක හදුනන අයෙකු ඒ සඳහා තෝරා ගත යුතුයි – කැළණිය රජමහා විහාරාධිපති අති පූජ්‍ය කොල්ලුපිටියේ සංඝරක්ඛිත නායක හිමියෝ අවධාරණය කරති.
පාර්ලිමේන්තුවට කෙනෙකු තෝරා ගැනීමේදී උගත්කමත් දක්ෂකමත් ප්‍රමාණවත් නොවන බවත් මහජන සම්බන්ධතාවයක් ඇති ජනතාවගේ දුක හදුනන අයෙකු ඒ සඳහා තෝරා ගත යුතු බවත් කැළණිය රජමහා විහාරාධිපති අති පූජ්‍ය කොල්ලුපිටියේ සංඝරක්ඛිත නායක හිමියෝ අවධාරණය කරති.
ශ්‍රී ලංකා පොදුජන පෙරමුණේ දිස්ත්‍රික් නායක ප්‍රසන්න රණතුංග මහතා ඇතුලු අපේක්ෂකයන්ට ආශිර්වාද කිරීම සඳහා අද ( 08 ) පැවැති විශේෂ ආගමික වැඩසටහනකදී උන්වහන්සේ මේ බව අවධාරණය කලහ. කැළණිය රජමහා විහාරස්ථානයේදී මෙම ආශිවාර්ද පූජාව පැවැත්විණ.
මෙහිදී වැඩිදුරටත් සිය අනුශාසනාව කල සංඝරක්ඛිත නායක හිමිපාණන් වහන්සේ මෙසේද කීහ.
” ප්‍රසන්න රණතුංග ඇමතිතුමා වගේම මෙවර පොදුජන පෙරමුණෙන් ඉදිරිපත් වන අපේක්ෂකයන් බොහෝදෙනෙක් කැළණිය පුදබිමට නිරන්තරයෙන් පැමිණ ආශිර්වාද ලබාගන්න අයයි. දේශපාලනික අරමුණු වලින් තොරව අධ්‍යාත්මික ජීවිතයේ දියුණුව උදෙසා පුද පූජා පවත්වන අය බෞද්ධයෝ හැටියට කැළණිය පුදබිමෙන් ලැබෙන ආශිර්වාදය පිළිබඳව අපට දැඩි විශ්වාසයක් තිබෙනවා. අද මේ පිංකම කරන්නෙත් ඒ අරමුණු පෙරදැරිවයි.
ගම්පහ දිස්ත්‍රික්කය මේ ලංකාවේ දිස්ත්‍රික්ක අතර තිරණාත්මක දිස්ත්‍රික්කයක්. මේ දිස්ත්‍රික්කය නියෝජනය කරන පිරිස එක්සිත්ව සමගියෙන් සාමදානයෙන් රටට වැඩදායි මෙහෙවරක් කරන බව අපිට විශ්වාසයි. ගම්පහ ඔබට ලංකාවේ අනෙකුත් දිස්ත්‍රික්ක වලට ඕන කරන මගපෙන්වීම කලහැකි බව අප දන්නවා. කවදාවත් මේ දිස්ත්‍රික්කයේ දියුණුව සඳහා ප්‍රසන්න රණතුංග ඇමතිතුමා කල මෙහෙවර මා කෘතවේදීව සිහිපත් කරනවා. දිස්ත්‍රික්කයේ අද දියුණුවක් සිදුවුනානම් ඒ සිදුවුනේ ඔබතුමාන්ලාගේ කැපවීම නිසයි.
උගත්කමත් දක්ෂකමත් විතරක් කෙනෙකු තෝරාගැනීමේදී ප්‍රමාණවත් වන්නේ නෑ. උගතුන් ඉන්නවා. දක්ෂ අය ඉන්නවා. නමුත් මහජන සම්බන්ධතාවය නැතිනම් ඒ අය ජනතාව නියෝජනය කරන්න සුදුසු අය ලෙස මා දකින්නේ නෑ. ජනතාවගේ දුක තේරෙන කෙනෙක් තමයි මන්ත්‍රණ සභාවට යන්න ඕනෑ. දුක තේරෙන කෙනෙකුට පමණයි ඒ දුකින් ඒ අය ගලවා ගත හැක්කේ. ඒ වගේ කෙනෙකුට පමණයි ඒ ඕනෑකම තියෙන්නේ.
අපි බොහොම භාග්‍යවතන්තයි ප්‍රසන්න රණතුංග වැනි අය අපේ දිස්ත්‍රික්කයේ ඉදිරිපත් විම නිසා. ඔබට ප්‍රදේශයට ජනතාවට යමක් කරන්න ඕනෑකම තියෙන අපේකම රැකගන්න හැකියාව තිබෙනවා. අලුත් රටක් නිර්මාණය කරන්න අලුත් ගමනක් යන්නට ඒ වගේම ලෝකයේ අනිකුත් ජාතීන් අතර ගරුත්වය ආරක්ෂා කරන ජාතියක් ගොඩනැගීමේ උසස් මෙහෙවරක නියලී සිටින ජනාධිපතිතුමා ඇතුලු ඔබ සැමදෙනාගේ කැපවීම නවදේශයක ආරම්භයක් බව අපගේ විශ්වාසයයි. ජනාධිපතිතුමාගේ නායකත්වය යටතේ මේ රට නව මාර්ගයකට ගෙන යාමට සියලුදෙනාට හැකිවේවා යැයි ප්‍රාර්ථනා කරනවා. “
