සමගි ජන බලවේගයේ නායක සජිත් ප්රේමදාස මහතා උතුරේදී සිදු කරන ප්රකාශයන්ට වඩා හාත්පසින්ම වෙනස් කතාවක් දකුණේදී ප්රකාශ කරන බවත් තමන් උතුරට එකක් දකුණට එකක් කියන නායකයෙක් නොවන බවත් ශ්රී ලංකා පොදුජන පෙරමුණේ නායක අග්රාමාත්ය මහින්ද රාජපක්ෂ මහතා පවසයි.
ඊයේ (22) පස්වරුවේ හෝමාගම ප්රදේශයේ පැවති හමුවක් අමතමින් අමාත්යවරයා මේ බව සදහන් ප්රකාශ කළේය.
මෙහිදී වැඩි දුරටත් අදහස් දැක්වූ අග්රාමාත්යවරයා මෙසේද කීවේය.
‘ පසුගිය දා උතුරු ප්රදේශයේ පැවති ජන හමුවකදී සජිත් ප්රේමදාස මහතා කියනවා දහතුන්වැනි සංශෝධනය වෙනසක් නොමැතිව ආරක්ෂා කරමින් දෙමළ ජනතාවට සමාන අයිතීන් සමග විසඳුම් දීමට තමන් සූදානම් බව. උතුරු නැගෙනහිර ඒකාබද්ධ කොට විසඳුමක් ලබා දෙන බවත් සජිත් ප්රේමදාස මහතා කියනවා. නමුත් සජිත් ප්රේමදාස මහතා දකුණේ ජනතාවට කියන්නේ මේ කතාවේ අනික් පැත්ත. ඔහු තමන්ගේ ඇත්ත ප්රතිපත්තිය වසන් කරමින් සිටිනවා.
මෙවැනි දෙබිඩි ප්රතිපත්තියක් සහිත පුද්ගලයින් කිසිසේත්ම විශ්වාස කළ නොහැකියි. මේ වාගේ දෙබඩි ප්රතිපත්තිය නිසා තමයි එක්සත් ජාතික පක්ෂය දෙකට කැඩිලා ගියේ.
එදා රණවිරුවන් කළ කැපකිරීම නොවන්නට අද අපට මෙවැනි මැතිවරණයක් පැවැත්වීමට හැකියාවක් ලැබෙන්නේ නැහැ. ඒ සා විශාල කැප කිරීමක් සිදු කළ ජාතියක් වශයෙන් මෙවැනි දෙබිඩි ප්රකාශ සිදු කිරීම හෙළා දැකිය යුතුයි.
අද සමහරු කියනවා ගෝඨාභය රාජපක්ෂ මහතා සමග වැඩ කිරීමට හැකි බව. ඒක මහ විහිළු කතාවක්. ගෝඨාභය රාජපක්ෂ ජනාධිපතිවරයාගේ වැඩපිළිවෙළ ජනතාව අතරට ගෙන ගිය නායකයෝ එම වැඩපිළිවෙළ ක්රියාවට නැංවීමට සුදුසුම පිරිසයි. ඒකට තවත් අය අවශ්ය නැහැ‘‘
මෙම අවස්ථාවට බන්දුල ගුණවර්ධන, දිනේෂ් ගුණවර්ධන, ගාමිණි ලොකුගේ යන අමාත්යවරුන් ඇතුළු පිරිසක් සහභාගි වූහ.
