සෞඛ්‍ය අංශ විසින් නිකුත් කර ඇති නිවැරදි සෞඛ්‍ය උපදෙස් පිළිනොපැද්දොත් මෙරට කොවිඩ්-19 දෙවැනි රැල්ලක අවදානමක් ඇති විය හැකි බවට වසංගත රෝග විද්‍යා අංශයේ ප්‍රධාන වසංගත රෝග විද්‍යාඥ වෛද්‍ය සුදත් සමරවීර මහතා අනතුරු ඇගයීමක් කළා.
අද (01) පැවැති මාධ්‍ය හමුවකදීයි සමරවීර මහතා මේ බව ප්‍රකාශ කළේ.
මෙහිදී වැඩි දුරටත් අදහස් දැක්වූ වසංගත රෝග විද්‍යා අංශයේ ප්‍රධාන වසංගත රෝග විද්‍යාඥ වෛද්‍ය සුදත් සමරවීර මහතා කියා සිටියේ බොහෝ විදේශීය රටවල රෝගී තත්ත්වය පාලනය වීමත් සමග පනවා තිබු පාලන නීති රීති ලිහිල් කළ පසු එම රටවල්වල කොවිඩ්-19 දෙවන රැල්ලක් ඇති වූ බවයි. .
‘ලෝකයේ බොහෝ රටවල් සිදුකළ ආකාරයට මේ වන විට ලංකාවෙත් කොවිඩ් වසංගතය පාලනය කිරීම සදහා ක්‍රියාත්මක කළ යම් යම් සීමාවන් ලිහිල් කරලා තිබෙනවා. ඒත් අපිට නිරීක්ෂණය වන්නේ ජනතාව ක්‍රමයෙන් ඒවා අනුගමනය කිරීමෙන් ඈත් වන බවයි. නැති නම් ඒ ගැන අවධානය අඩුකරන බවයි. මේ තත්ත්වය තුළ ශ්‍රී ලංකාවේද කොවිඩ්-19 දෙවැනි රැල්ලක් ඇති වීමේ අවධානමක්රු තිබෙනවා.
එම නිසා මීටරයක දුර පවත්වා ගැනීම, මුඛ ආවරණ පැළඳීම සහ දෙඅත් සබන් යොදා සේදීම අනිවාර්යයයෙන් සිදුකළ යුතුයි. එම නීති තව දුරටත් වලංගුව පවතින බව අප අමතක කළ යුතු නැහැ. මම මෙහිදී අවධාරණය කරන්නේ සෞඛ්‍ය අංශ විසින් හදුන්වා දුන් නිවැරදි සෞඛ්‍ය පුරුදු පිළිපදින්නේ නම් කොවිඩ් දෙවන රැල්ලක් ගැන භීතියක් ඇති නොවන බවයි‘‘
