එක්සත් ජාතික පක්ෂයේ හිටපු පාර්ලිමේන්තු මන්ත්රී පාලිත තෙවරප්පෙරුම මහතා විසින් මහ මැතිවරණයට තරග කිරීම සඳහා වන අපේක්ෂකත්වයෙන් ඉල්ලා අස්වීමට අදාළ ලිපිය මැතිවරණ කොමිසමට භාර දුන්නත් එය භාර ගැනීම මැතිවරණ කොමිෂමේ සභාපතිවරයා විසින් ප‍්‍රතික්ෂේප කර තිබෙනවා.
අදාළ ඉල්ලා අස්වීමේ ලිපිය භාර ගැනීම ප‍්‍රතික්ෂේප කිරීමට හේතු වශයෙන් මැතිවරණ කොමිසමේ සභාපති මහින්ද දේශප්‍රිය මහතා සඳහන් කර ඇත්තේ පවතින නීතිය අනුව අපේක්ෂකත්වය ලබා ඇති අයෙකුට ඉන් ඉල්ලා අස් වීමට නොහැකි බවයි.
තම ඉල්ලා අස්වීමේ ලිපිය භාර ගැනීම මැතිවරණ කොමිෂමේ සභාපතිවරයා විසින් ප‍්‍රතික්ෂේප කිරීමෙන් පසු මාධ්‍ය හමුවේ කරුණු දැක්වූ පාලිත තෙවරප්පෙරුම මහතා කියා සිටියේ තමන්ට අපේක්ෂකත්වයෙන් ඉල්ලා අස්වීමට නොහැකි නිසා පෙරටත් වඩා වැඩි උනන්දුවකින් මැතිවරණ සටනට මුහුණ දී එය ජයග්‍රහණය කිරීමට නැවත තීරණය කළ බවයි. පාලිත තෙවරප්පෙරුම මහතාගේ මේ ක‍්‍රියාව සම්බන්ධයෙන් සමාජ මාධ්‍ය තුළ මිශ‍්‍ර ප‍්‍රතිචාර පළ වෙනවා. මීට සති කිහිපයකට පෙර සමගි ජන බලවේගයේ ප‍්‍රබලයෙකු වන හිටපු ඇමැති මංගල සමරවීර මහතා ද මැතිවරණ ක‍්‍රියාවලියෙන් ඉවත් වුණා.
