එක්සත් ජාතික පක්ෂ නායක රනිල් වික්‍රමසිංහ මහතා ලබන පළාත් සභා මැතිවරණය තෙක් පක්ෂ නායකත්වය දරනු ඇති බව එජාප මහ ලේකම් අකිල විරාජ් කාරියවසම් මහතා කියයි. එජාප මහ ලේකම්වරයා කියන්නේ පළාත් සභා මැතිවරණය ජයග්‍රහණය කිරීමෙන් අනතුරුව වික්‍රමසිංහ මහතා නායකත්වයෙන් ඉවත්වනු ඇති බවයි.
එජාප මහ ලේකම්වරයා මෙසේද කීවේය. ‘පක්ෂ නායකත්වය සම්බන්ධයෙන් ඊයේ (15) සිරිකොත මූලස්ථානයේ පැවැති සාකච්ඡාවේදී නායකතුමා තම ස්ථාවරය පැහැදිලි කළා. ඉදිරි පළාත් සභා මැතිවරණය සදහා එක්සත් ජාතික පක්ෂයට නායකත්වය දෙන්නේ තමා බව රනිල් වික්‍රමසිංහ මහතා සදහන් කළා. එය ජයග්‍රහණය කිරීම සදහා නව යාන්ත්‍රණයක් සකස් කිරීමට පියවර ගනිමින් සිටින බව ද එතුමා සදහන් කළා. පළාත් සභා මැතිවරණය ජයග්‍රහණය කළ පසුව පක්ෂ නායකත්වය සුදුසු කෙනෙකුට පවරා තමා ඉවත් වන බවයි එතුමා ප්‍රකාශ කළේ‘
වසර ගණනාවක් කල් දමමින් පවතින පළාත් සභා මැතිවරණය මේ වසර අවසානයේ හෝ ලබන වසර මුල් භාගයේ පැවැත්වෙනු ඇති බව විශ්වාස කෙරේ.
