කොවිඞ් 19 වසංගතයට මුහුණදීම සඳහා විදේශ රටවලින් හා සංවිධානවලින් ඇමෙරිකානු ඩොලර් මිලියන 252ක් හෙවත් රුපියල් කෝටි 7,000ක වටිනාකමින් යුත් ණය හා ආධාර ශ්රී ලංකාවට ලබා දුන් බව අග්රාමාත්ය මහින්ද රාජපක්ෂ මහතා ඊයේ (01) පැවැති කැබිනට් මණ්ඩල රැස්වීමේදී හෙළිකළ බව කැබිනට් ප්රකාශක, අමාත්ය බන්දුල ගුණවර්ධන මහතා පැවසීය.
ඇමති බන්දුල ගුණවර්ධන මහතා මේ බව පැවසුවේ රජයේ ප්රවෘත්ති දෙපාර්තමේන්තුවේදී අද (2) පැවති කැබිනට් තීරණ දැනුම්දීමේ මාධ්ය හමුවේදීය.
මෙම සමහර මුදල් ලබාගැනීම සඳහා අවශ්ය සේවා හා භාණ්ඩ ලබාගැනීමෙන් පසු බිල්පත් ඉදිරිපත් කළ යුතු බව කී ඇමතිවරයා මේවා තවමත් ගිවිසුම් පමණක් යැයි ද කීවේය.
කොවිඞ් 19 වසංගතයට මුහුණදීම සඳහා ලැබුණු විදේශ ණය ආධාර පිළිබඳ සවිස්තරාත්මක වාර්තාවක් මුදල් අමාත්යවරයා ලෙස අග්රාමාත්ය මහින්ද රාජපක්ෂ මහතා විසින් කැබිනට් මණ්ඩලයට ඉදිරිපත් කළ බවත් ඒවා විනිවිදභාවයෙන් යුතුව භාවිතා කරන ආකාරය මෙන්ම වැය කිරීමට බලාපොරොත්තු වන ව්යාපෘති සම්බන්ධයෙන් ද කරුණු දැක්වූ බව කියා සිටියේය.
මෙහිදී අමාත්ය බන්දුල ගුණවර්ධන මහතා මෙසේද පැවසීය,
‘කොඩිව් වසංගතයට මුහුණ දීම සදහා ශ්රී ලංකාවට ද්රව්යමය හා මූල්යමය ආධාර ලෙස පසුගිය මැයි මස 22 වැනිදා වන විට ලැබී ඇති මුළු විදේශ ණය ප්රමාණය ඇමෙරිකානු ඩොලර් මිලියන 173.6ක් වන අතර ප්රදාන ලෙස ඇමෙරිකානු ඩොලර් මිලියන 75 හා ඇමෙරිකානු ඩොලර් මිලියන 4.2ක් වටිනා භාණ්ඩ මෙරටට ලැබී ඇතැයි අග්රාමාත්යත්රමා කැබිනට් මණ්ඩලයට දැනුම් දුන්නා.
මේ ආධාර ලෝකයේ විවිධ රටවලින් ලැබී තිබෙනවා. ඒ වගේම ජාත්යන්තර මූල්ය අරමුදල, ලෝක බැංකුව, ආසියානු සංවර්ධන බැංකුව, ලෝක සෞඛ්ය සංවිධානය වැනි ආයතන ද ණය සහ ආධාර ලබාදීමට එකග වී තිබෙන බවයි අගමැතුමා කැබිනට් මණ්ඩලයට ප්රකාශ කළේ‘
මෙහිදී අමාත්යවරයා වැඩි දුරටත් සදහන් කළේ මේ ආධාර තවමත් රජයට ලැබී නැති බවයි.
‘මේ සියල්ල එකගවීම් පමණයි. කිසිම ආධාරයක් තවමත් රජයට ලැබී නැහැ‘ යැයි ද බන්දුල ගුණවර්ධන මහතා පැවසීය.
