එතෙර අපි සංවිධානයේ විශේෂ මාධ්‍ය සාකච්ඡාවක් අද (29) ජනතා විමුක්ති පෙරමුණේ ප්‍රධාන කාර්යාලයේදී පැවැති වුණා. එහිදී එම සංවිධානයේ සභාපති හිටපු පාර්ලිමේන්තු මන්ත්‍රී සුනිල් හදුන්නෙත්ති මහතා විසින් දක්වන ලද සියලු අදහස් කිසිදු වාරණයකින් තොරව අපි පළ කරනවා.
මීට මාස දෙකකට කලින් කොරෝනා තත්වය වර්ධනය වන විට විදේශගත ශ්‍රී ලාංකිකයින් මුහුණ දෙන ගැටලු ගැන අපි ආණ්ඩුවේ අවධානය යොමු කළා. විශේෂයෙන්ම ලංකාවට එන්න කැමති අය ගෙන්වා ගැනීමත් එම රටවලදීම ඔවුන් මුහුණදී ඇති ගැටලුවලට විසදුම් ලබාදිය යුතු බවත් අපි අවධාරණය කළා. ආණ්ඩුව ඈලිමෑලි ස්වභාවයෙන් තමයි කටයුතු කළේ. ලංකාවට ගෙන්වා ගැනීම සිදුකළෙත් දේශපාලකයින්ගේ හිතවත්කම අනුවයි. අදාල රට තීරණය කෙළෙත් දේශපාලකයින්ගේ නෑදෑයන් ඉන්න රටවල් අනුවයි.
අලුත්ම තත්වය වුනේ පසුගිය 19වෙනිදා කුවේට් සිට ගෙනා පිරිස සම්බන්ධවයි. එම පරිස අතර වැඩි ප්‍රමාණයක් කොරෝනා රෝගීන් වාර්තාවීමත් සමග මෙය ආන්දෝලනයක් වුනා. කැබිනට් අමාත්‍ය මහින්දානන්ද අලුත්ගමගේ අමාත්‍යවරයා බරපතල ප්‍රකාශයක් කළා කුවේට් රටෙන් මිනිස් බෝම්බ ලෙස ආසාධිතයින් මෙරටට එවලා තියෙනවා කියලා.
කුවේට් රාජ්‍යයෙන් හිතාමතා රෝගීන් තෝරාගෙන මෙරටට එව්වා කියලා හිතාමතා ප්‍රකාශයක් සිදුකොට තිබෙනවා. එම බරපතල ප්‍රකාශය එතෙර අපි සංවිධානය ලෙස දැඩි පිළිකුලෙන් යුතුව හෙලා දකිනවා. ඒ වගේම එය ශ්‍රී ලාංකික ජනතාවට කළ අපහාසයක්. ඒ වගේම රාජතාන්ත්‍රික වශයෙන් අනාගතයේදී ගැටලු ඇතිකරන ප්‍රකාශයක්. අපි මේ ගැන විදේශ කටයුතු ඇමතිවරයාට දැනුම් දුන්නා.
කොරෝනා රෝගය කිසිවෙක් කැමැත්තෙන් ඇඟට ගන්නේ නැහැ. ආසාධනය වන්නේ නොදැනුවත්ව. ඒ වගේම කිසිම රෝගියෙක් රෝහල්වලින් ප්‍රතික්ෂේප කරන්නේ නැහැ. ලෙඬේ හදාගත්ත බෝම්බ හැටියට දැක්කේ නැහැ. එනිසා තමයි ඇමතිවරයාගේ ප්‍රකාශය බරපතල වන්නේ. එතෙර සිටින ශ්‍රී ලාංකිකයින් ඩොලර් කෝටි 700ක් විතර විදේශ විණිමයක් රටට ගේනකොට ඔවුන් රට විරුවෝ. නමුත් ලෙඩක් හැදිලා කරදරයකට පත්ව ආවොත් ඔවුන් මිනිස් බෝම්බ වෙනවා.
ආණ්ඩුවට දැන් අවශ්‍ය වෙලා තිබෙන්නේ ලංකාවේ මේ රෝගය නැහැ කියලා පෙන්වන්න. ඒ ඡන්ද ව්‍යාපාරය වෙනුවෙන්. පිටරටක ඉඳන් කෙනෙක් ආවත් සතුරෙක් ලෙස පේන්නේ ඒ නිසයි. ඡන්දය තිබිය යුතු බව ඇත්ත නමුත් ශ්‍රී ලාංකිකයින් කුමන රටක සිටියත් කොරෝනා තත්වයෙන් පීඩාවට පත්ව සිටිනවානම් ඔවුන් රැකබලාගන්න එක ආරක්ෂා කරන එක ආණ්ඩුවේ වගකීමක්. එය මනුෂ්‍යත්වයේ කටයුත්තක්. එනිසා තමයි එතෙර අපි සංවිධානය මුල සිටම විදේශගත ශ්‍රී ලාංකිකයින් වෙනුවෙන් මැදිහත් වුණේ.
කුවේට් රජය පොදු සමාකාලයක් ලබාදෙන්න කටයුතු සම්පාදනය කරන විට එතෙර අපි කුවේට් ශාඛාව ලිඛිතව තානාපතිවරයාට දැනුම් දුන්නා ආහාරපාන, රැකියා සහ නවාතැන් ප්‍රශ්න, වීසා ප්‍රශ්න තිබෙන අය ඉන්නවා පොදු සමා කාලය තුල ගැටලු සහිත පුද්ගලයින් ලංකාවට ගෙන්වාගැනීමට සහය දෙන්න කියලා. අපි ඒබව දැනුවත් කළේ අප්‍රේල් 12වෙනිදා.
කුවේට් රජය අවශ්‍ය ලියකියවිලි සකස් කරලා දීලා, ටිකට් හදල දීලා කුවෙට් රජයේ වියදමෙන් ලාංකිකයින් මෙරටට එවන්න යෝජනා කළා. ඒ වගේම අපි කිව්වා පොදු සමාකාලය දීර්ඝ කරගන්න සාකච්ඡා කරන්න කියලා. එහි ප්‍රතිඵලයක් ලෙස එම කාලය මැයි 31 දක්වා දීර්ඝ කළා. අපි තානාපති කාර්යාලය සමඟ සහයෝගයෙන් වැඩ කළා. ලියාපදිංචි කටයුතුවලට අපි සහය දුන්නා. පොදු සමා කාලය ආරම්භ වෙනකොට අප්‍රේල් 21දා වන විට ලියාපදිංචි වෙලා සිටියේ 466දෙනයි. ඒ වෙනකොට කුවේට් රටේ හිටපු රෝගීන් ගණන 1995දෙනයි.
එවිට ශ්‍රී ලාංකිකයින්ට රෝගය වැළදිලා කියලා වාර්තා වෙලා තිබුණේ නෑ. එදා ලියාපදිංචි අය ගෙන්වා ගත්තා නම් ලංකාවට එන්නේ නිරෝගී මිනිස්සු. එදා අවධානමක් නැති අවස්ථාවක්. නමුත් මැයි 19දින ගෙන්වන විට කුවේට්හි රෝගීන් 16784ක් වාර්තා වෙලා තිබුණා. රෝගීන් විශාල ප්‍රමාණයකට වර්ධනය වූ පසු තමයි ලංකාවේ අය ගෙන්වා ගන්න ආණ්ඩුව කටයුතු කළේ. එතෙක් කල් අපේ රටේ ජනතාව හිටපු ස්ථානවල විශාල ගැටලු තිබුණා. වෙනත් රටවල අයත් එක්ක එකට රඳවා තිබුණා. කලින් ගත යුතු තීරණය ආණ්ඩුව ගත්තේ නැහැ.
මැයි 19 කුවේට් පිරිස ලංකාවට ගෙන්වා ගන්න තීරණය කළේ කුවේට රජය නෙවෙයි. ශ්‍රී ලංකාවේ තානාපතිතුමාගේ සම්පූර්ණ අධීක්ෂණය යටතේ පිරිස තෝරගත්තා. එම පිරිස ගුවන්යානයට ගොඩවෙන තුරු තානාපති නිලධාරීන් සිටියා. අපිට වාර්තා වෙන විදියට අවශ්‍ය වෛද්‍ය පරීක්ෂණවලින් අනතුරුව තමයි මේ පිරිස ගුවන්යානයට ගොඩවෙන්නේ. කිසිවෙක් රෝගීන් බවට හඳුනාගෙන තිබුණේ නැහැ.
ඒ වගේම කුවේට් රජය අවසරය ලබාදී තිබුණා ඕනෑම රටකට තමන්ගේ වෛද්‍ය කණ්ඩායම් යවලා අවශ්‍ය පරීක්ෂණ කරලා තමන්ගේ රටේ ජනතාව රැගෙන එන්න. නමුත් අපේ රට මැදිහත් වුනේ නැහැ. ඒ නිසා රෝගීන් මේ රටට එවලා තියෙනවා කියලා ආණ්ඩුව හදන බොරු මතය අපි බැහැර කරනවා.
අනෙක් කාරණය තමයි ඔවුන් කුමන තත්වයෙන් ආවත් අපේ රටේ ජනතාව. ඔවුන් අපි භාරගත යුතුයි. ආණ්ඩුව දැන් පැහැදිලි කළ යුතුයි මෙම ජනතාවට රෝගී තත්වය වැළඳුනේ කුමන තත්වයක් යටතේද කියලා. මහින්දානන්ද ඇමතිවරයා කරන ආකාරයේ වැරදි මතයක් ජනගත කරමින් නොව පිළිගත හැකි සාක්ෂි සහ විද්‍යාත්මක පදනමක් සහිතව ආණ්ඩුව වගකීම්සහගතව කරුණු ඉදිපත් කළ යුතුයි. මෙම ප්‍රකාශයේ බරපතල කම ගැන විදේශ කටයුතු ඇමතිවරයාට ලිඛිතව දැනුම් දුන්නා.
ආණ්ඩුව දැන් මෙම කුවේට් ප්‍රශ්නය යොදා ගනිමින් විදේශ රටවල සිටින ලාංකිකයින් ගෙන්වා ගැනීම නවතා දැමීමට උත්සහ කරමින් ඉන්නවා. රටවල් විශාල ගණනක අපේ රටේ ජනතාව ගැටලුවලට මුහුණ දෙමින් සිටිනවා. බොහෝ පිරිසක් අසරණ වෙලා. කෑම, වතුර නවාතැන් ප්‍රශ්න නිසා පීඩාවට ලක්වෙලා තිබෙනවා. එසේ පීඩාවට පත්වෙලා ඉන්න බොහෝ පිරිසක් අපිට කතා කරනවා. විඩියෝ ඡායාරූප එවලා තිබෙනවා. ඒ අයගේ සත්‍ය තත්වය එම විඩියෝපටවලින් අවබෝධ කරගන්න පුළුවන්.
ආණ්ඩුවට යෝජනා කිහිපයක්…
විදේශගත ශ්‍රී ලාංකිකයින් ලංකාවට කැඳවීම පටු විදියට සලකන්න එපා. ලංකාවේ ජනතාව පිටරටවල්වලට ගිහින් දුක්මහන්සි වෙලා මුදල් උපයලා ලංකාවට එවන්නේ ඔවුන්ගේ දරු පවුල් වෙනුවෙන් පමණක් නෙවෙයි. ලංකාවේ භාණ්ඩාගාරයට ඔවුන් සල්ලි එවලා විශාල දායකත්වයක් දක්වලා තිබෙනවා. අද ඔවුන් විවිධ රටවල්වල කොරෝනා තත්වය නිසා අපහසුතාවයට පත් වෙලා ඉන්නවා. ඔවුන් ලංකාවට කැඳවිය යුතුයි.
එතෙර අපි සංවිධානය අපි සූදානම් කඩිනම් ඒකාබද්ධ යාන්ත්‍රණයක් හදලා එය ක්‍රියාත්මක කරන්න ආණ්ඩුවට සහය දෙන්න. එතෙර අපි සංවිධානයේ ශාඛා තිබෙන හැම රටකදීම අපි එම රටවලදී මේ ක්‍රියාවලියට සහය දෙන්න සූදානම්. ලංකාවට ගෙන්වා ගැනීමෙන් පසු ඔවුන්ට ලංකාව තුලදී අවශ්‍ය කටයුතු සම්පාදනය කරන්න සහය දෙන්න අපි සූදානම්.
මුදල් පිළිබඳ ප්‍රශ්නයක් තිබෙනවා නම් අපි යෝජනා කරනවා 1991දී කුවේට් යුද්ධය වෙලාවේදී වන්දි ගෙවපු වන්දි අරමුදල තිබෙනවා එය යොදා ගන්න පුළුවන්. කෝටි 400ක පමණ මුදලක් එහි තිබෙනවා. ලංකාවේ ජනතාවගෙන් ඉල්ලීමක් කළොත් ජනතාව උදව් කරන්න කැමතියි. ඒ වගේම ලාංකිකයින් සිටින විවිධ රටවල පුද්ගලික ආයතන ඔවුන් මෙරටට ගෙන්වා ගැනීමට සහය දෙන්න සූදානමින් ඉන්නවා. එවැනි උදාහරණ අපි හඳුනාගෙන තිබෙනවා. ඇතැම් අය මුදල් හොයාගෙන තිබෙනවා. ඒ වගේම ලංකාව තුළ නිරෝධායන මධ්‍යස්ථාන හොයාගන්න අපිට උදව් කරන්න පුළුවන්.
ඇතැම් විගාමික මධ්‍යස්ථාන නිරෝධායන මධ්‍යස්ථාන ලෙස භාවිතා කරන්න පුළුවන්. අවශ්‍යතාවය අනුව සොයාබලා දැනට පාවිච්චි නොකරන හෝටල් භාවිතා කරන්න පුළුවන්. ඇතැම් අය දැනටත් වෙනත් රටවල ඉන්නේ තමන්ගේ මුදල් වියදම් කරලා. ඒ යම් මුදලක් වියදම් කරන්න සූදානම් නිරෝධායනය වෙන්න. ඒ වගේම එතෙර අපි ඩුබායි ශාඛාව සූදානමින් ඉන්නවා එරට සුරක්ෂාගාරයක් සඳහා කුලියට නිවාස සංකීරණයක් ලබාගන්න. ආණ්ඩුවට උනත් එවැනි නිවාස කුලියට ගන්න පුළුවන්. ලංකාවට ගෙන්වන තුරු නවාතැන් පහසුකම් ලබාදෙන්න එම මධ්‍යස්ථානවලදී පුළුවන්.
ඒ වගේම ආහාර සහ ජලය පහසුකම් නොමැති විශාල පිරිසක් වාර්තා වෙනවා. ඔවුන්ට සුභසාධන පහසුකම් ලබාදිය යුතුයි. ඇතැම් තානාපති කාර්යාල අපහසුතාවයට පත්වෙලා මුදල් නොමැති කමින්. ඒ නිසා තමයි අපි යෝජනා කරන්නේ කඩිනම් ඒකාබද්ධ යාන්ත්‍රණයක් අවශ්‍යයි කියලා. ඒ වගේම වෛද්‍ය කණ්ඩායම්වල අවශ්‍යතාවය තිබෙනවා. විවිධ ලෙඩ රෝගවලට ලක්වෙලා වෛද්‍ය පහසුකම් නොමැති නිසා අපහසුතාවයට පත්වෙලා ඉන්නවා. ඒ සඳහා ස්වේච්ඡා කණ්ඩායම් අවශ්‍යයි.
ඒ වගේම මේ අය ලංකාවට ගෙන්වීමේ කාලසටහනක් සකස් කළ යුතුයි. එවිට ලංකාවට එන්න බලාපොරොත්තුවෙන් ඉන්න අයට බලාපොරොත්තුවක් හැදෙනවා. ඒ වගේම ප්‍රමුඛතා ලැයිස්තුවක් සකස් කරන්න කියලා අපි යෝජනා කරනවා. අපේ ආර්ථිකය ශක්තිමත් කරපු මේ ජනතාව නිසා අපි ජීවත් වෙලා තිබෙනවා. රටේ යම් යම් සංවර්ධන කටයුතුවලට ඔවුන් දායක වෙලා තිබෙනවා. මේ අය අපේ රටේ පුරවැසියන්. අපේ රටේ ජනතාවගෙන් ඉල්ලනවා අපේ මනුෂ්‍යත්වයේ දෑත් ඔවුන්ට දිගු කරමු කියලා.
