අධි සම්ප්‍රේෂණයක් සහිත ඩෙල්ටා ප්‍රභේදය ලැව් ගින්නක් මෙන් රට පුරා පැතිර යන හෙයින් හැකි ඉක්මනින් තමන්ට හිමි කොවිඩ් එන්නත ලබා ගන්නා ලෙස රජය පොදු ජනතාවගෙන් ඉල්ලා සිටියේය.
අද (07) නිවේදනයක් නිකුත් කරමින් රජයේ ප්‍රවෘත්ති දෙපාර්තමේන්තුව ජනතාවගෙන් ඉල්ලා සිටින්නේ සෞඛ්‍ය උපදෙස් හා භාවිතයන් දැඩි ලෙස පිළිපදින ලෙසයි.
වෛරසයෙන් ආරක්ෂා වීම සඳහා ජනතාව විසින් අනුගමනය කළ යුතු පහත දැක්වෙන උපදෙස් මෙම මාධ්‍ය නිවේදනය මගින් යළි අවධාරණය කර ඇත.
- අත්‍යවශ්‍ය කටයුතු සඳහා පමණක් නිවසින් බැහැර වන්න.
- මංගල උත්සව, අවමංගල්‍ය උත්සව සහ මිනිසුන් විශාල වශයෙන් එකතු වන උත්සව වලට සහභාගී නොවීම හැකිතාක් සීමා කරන්න.
- පොදු ස්ථාන නැරඹීමට සහ එළිමහනේ සංචාරය කිරීමේදී සැම විටම මුඛ ආවරණයක් පළඳින්න.
- වාතාශ්‍රය නොමැති කාමර, ශාලා, විදුලි සෝපාන සහ වාහන සඳහා විශාල වශයෙන් එකතු වීමෙන් වළකින්න.
- නිතරම සබන් යොදා අත් හොඳින් සෝදන්න.
- අන් අය සමඟ සම්බන්ධතා පැවැත්වීමේදී මීටර් දෙකක සමාජ දුරස්ථභාවයක් පවත්වා ගන්න.
- ඔබට නිදන්ගත රෝග තිබේ නම් රැකියාවට නොයන්න.
