උතුරු කොරියානු නායක කිම් ජොන් උන් ඔහුගේ පරීක්ෂණ චාරිකා වලදී බොහෝ විට දුම් පානය කරනු දක්නට ලැබේ
උතුරු කොරියාව ගැන අපට නිතර නිතර අසන්නට ලැබෙන්නේ අවි ආයුධ, මිසයිල අත්හදා බැලීම් ගැන. නැති නම් ලෝකෙට ලොක්කා ඇමෙරිකාවට කරන නිමක් නැති තර්ජන ගැන. ඒත් උතුරු කොරියාව මුහුණ දෙන බරපතළ සමාජ හා සෞඛ්‍ය අර්බුදයක් ගැන දැන් ජාත්‍යන්තර මාධ්‍යවල අවධානය යොමු වෙලා. ඒ තමයි ‘අසීමිත ලෙස උතුරු කොරියානු පිරිමි කරන දුම්පානය‘
ලෝක සෞඛ්‍ය සංවිධානයේ දත්ත වලට අනුව, උතුරු කොරියාවේ පිරිමින්ගෙන් අඩකට ආසන්න ප්‍රමාණයක් දුමපාලනය කරනවා. වාසනාවට මෙන් උතුරු කොරියානු කාන්තාවන් දුම්පානය කරන්නෙම නැහැ. ඊට හේතුව නීතිය මගින් ම කාන්තාවන්ට දුම්පානය කිරීම තහනම් කිරීමයි.
මේ වන විට තම පුරවැසි පිරිමින්ගේ මේ අසීමිත දුම්පානයට එරෙහිව, නමුත් නිතර නිතර දුම්පානය කරන උතුරු කොරියානු නායකයා දැඩි පියවර ගැනීමට සූදානම් වෙනවා.
මෙම මස මුලදී සම්මත කරන ලද නීතියක් මගින් උතුරු කොරියාවේ පොදු ස්ථානවල දුම්පානය තහනම් කර ඇති අතර ජනතාවට “වඩා සංස්කෘතික හා සනීපාරක්ෂක” පරිසරයක් ලබා දීම සඳහා නීති රීති නියම කර තිබෙනවා.
එහෙත් රාජ්‍ය මාධ්‍ය බොහෝ විට උත්තරීතර නායක කිම් ජොන් උන් සිගරට් අතේ තබාගෙන සිටින ආකාරය පෙන්වනවා.
‘ඉතින් රටේ දුම්වැටි විරෝධී ක්‍රියාමාර්ග මගින් අත්කරගන්නේ කුමක්ද?‘
නව නීතිය පවසන්නේ කුමක්ද?
නොවැම්බර් මස මුලදී සම්මත කරන ලද ‘දුම්කොළ තහනම් කිරීමේ නීතිය‘ මගින් සියලුම ආයතන, සංවිධාන සහ පුරවැසියන් “ජනතාවගේ ජීවිත හා සෞඛ්‍යය ආරක්ෂා කිරීමේදී අනුගමනය කළ යුතු” නීති රීති දක්වා තිබෙනවා.
නව නීතිය මගින් “දුම්වැටි නිෂ්පාදනය හා විකිණීම සහ දුම්කොළ භාවිතය පිළිබඳ නීතිමය හා සමාජීය පාලනයන් රාජ්‍ය දුම්කොළ තහනම් කිරීමේ ප්‍රතිපත්තියට අනුව දැඩි කරයි”.
“දේශපාලන හා දෘෂ්ටිවාදාත්මක අධ්‍යාපනය” සඳහා අදහස් කරන ප්‍රදේශ, සිනමා ශාලා, අධ්‍යාපන ඒකක, මහජන සෞඛ්‍ය පහසුකම් සහ පොදු ප්‍රවාහන වැනි ස්ථානවල දුම්පානය තහනම් කර ඇති ස්ථාන ද එහි සඳහන් වෙනවා. නීතියට එරෙහි වන්නන්ට දෙන දඩුවම් ගැන එහි සදහන් වන නමුත් රාජ්‍ය මාධ්‍ය ඒවා මොනවාදැයි පවසන්නේ නැහැ.
නව නීතිය සම්මත වී දින කිහිපයකට පසු, රාජ්‍ය ප්‍රවෘත්ති ඒජන්සිය KCNA ලොව පුරා සිටින වෛද්‍යවරුන් සහ විශේෂඥයන්”උපුටා දක්වමින් වාර්තා කළේ, දුම් පානය කරන්නන්ට කොරෝනා වෛරසය වැළඳීමේ වැඩි අවදානමක් ඇති බවයි.
දුම්වැටි විරෝධී ව්‍යාපාර ආරම්භ වූයේ කවදාද?
2005 දී අනුමත කරන ලද ‘දුම්කොළ පාලනය පිළිබඳ ලෝක සෞඛ්‍ය සංවිධානයේ රාමු සම්මුතියට (WHO Framework Convention on Tobacco Control, which it ratified in 2005) අත්සන් තැබීමෙන් පසුව උතුරු කොරියාවේ දුම්වැටි විරෝධී වැඩසටහන් සාමාන්‍ය සිදුවීමක් බවට පත් විය.
දුම්කොළ පාලන නීතියේ කොටසක් ලෙස, සිගරට් ඇසුරුම් කිරීම සඳහා අනතුරු ඇඟවීමේ ලේබල් සහ පොදු ස්ථානවල දුම්පානය තහනම් කිරීමට පියවර ගත්තා.
දුම්පානය කරන්නන් මෙම භාවිතයේ “හානිකර බව” දැනුම් දීම සඳහා 2019 දී “කඩිනම්” ව්‍යාපාරයක් සිදු කළ බව KCNA වාර්තා කරනවා. විදේශීය නිෂ්පාදිත දුම්කොළ ආනයනය සීමා කිරීමට පියවර ගෙන ඇති බව රාජ්‍ය මාධ්‍ය පවසනවා.
කොරියානු මධ්‍යම රූපවාහිනිය උදේ සහ සවස දුම් පානය කරන අය “විශ්වාස කළ නොහැකි” පුද්ගලයන් ලෙස විස්තර කර ඇති බව සෝල්හි ඩේලි එන්කේ වෙබ් අඩවිය – Daily NK website වාර්තා කරනවා.
මෙම වසරේදී දුම්පානයෙන් ඇති විය හැකි අනතුරු පිළිබඳ තොරතුරු සපයන වෙබ් අඩවියක් දියත් කර තිබීම ද විශේෂත්වයක්. “දුම්පානයට එරෙහි ව්‍යාපාර වලදී විද්‍යාව සහ තොරතුරු වැදගත්” යැයි ප්‍රචාරක ව්‍යාපෘතිය භාර ප්‍රධානියෙක් සදහන් කළා.
අසීමිතව දුම්පානය කරන නායකයෙක් …
නමුත් උතුරු කොරියානු නායක කිම් ජොන් උන් අධික ලෙස දුම් පානය කරන්නෙකු වන අතර, ඔහුගේ සංචාර වලදී ඔහු අධික ලෙස දුම්පානය කරනු දැකගත හැකියි.
එක්සත් ජනපද ජනාධිපති ඩොනල්ඩ් ට්‍රම්ප් සමඟ ඔහුගේ දෙවන සමුළුව සඳහා වියට්නාමයට දුම්රියෙන් යන අතරතුර (2019 පෙබරවාරි මාසයේදී) ඔහු අඛණ්ඩව දුම්පානය කරනු දැකගත හැකි වුණා. ඔහුගේ සහෝදරිය කිම් යෝ-ජොං ඔහු වෙනුවෙන් අළු බඳුනක් තබා ගත්තා.
කිම්ගේ බිරිඳ රි සොල්-ජු ඔහුගෙන් දුම්පානය නතර කරන ලෙස ඉල්ලා සිටි නමුත් ඔහු එයට කන් නොදෙන බවයි ජාත්‍යන්තර මාධ්‍ය කියන්නේ.
කාන්තාවන් දුම් පානය නොකරන බව ඇත්තද?
වසර ගණනාවක් තිස්සේ උතුරු කොරියාවේ දුම්පානය ඉහළ මට්ටමක පවතින අතර එහි පහළ යාමක් තවමත් නිවැරදිව දැකගත නොහැකියි. 2019 සඳහා ලෝක සෞඛ්‍ය සංවිධානයේ වාර්තාවක් පවසන්නේ රටේ වයස අවුරුදු 15 ට වැඩි පිරිමින්ගෙන් 46.1% ක් දුම් පානය කරන බවයි.
දත්ත වලට අනුව, කිසිදු කාන්තාවක් දුම් පානය කරන්නේ නැහැ ! එයට හේතුව උතුරු කොරියානු සමාජයේ දුම්පානය කරන කාන්තාවන් පහත් කොට සැලකීමයි.
“දකුණු කොරියාවට සාපේක්ෂව කාන්තාවන් ප්‍රසිද්ධියේ, විශේෂයෙන් තරුණ කාන්තාවන් දුම් පානය කිරීම උතුරු කොරියාවේ සංස්කෘතික හා සමාජීය වශයෙන් තහනම්. තත්ත්වය එසේ වුවත් උතුරු කොරියාවේ සමහර විවාහක හෝ වැඩිහිටි කාන්තාවන් පෞද්ගලිකව දුම් පානය කරනවා” යනුවෙන් එක්සත් ජනපදයේ කොරියානා කනෙක්ට් CoreanaConnect හි අධ්‍යක්ෂ ජේම්ස් බන්ෆිල් පවසනවා.
“උතුරු කොරියාවේ දුම්පානය පිරිමි පාරිභෝගිකයින් විසින් නිර්වචනය කර තිබෙනවා. උතුරු කොරියාවේ පිරිමි සමාජ, වැඩ සහ මිලිටරි සංස්කෘතියේ දුම්පානයට භූමිකාවන් තිබෙනවා. අධික දුම්පානය සහ ඇබ්බැහි වීම පිරිමින්ට සංස්කෘතික වශයෙන් පිළිගත හැකියි” යනුවෙන් විශේෂඥයෙකු සහ මාධ්‍යවේදියෙකු වන මින් චාවෝ චෝයි පවසනවා.
ඇත්ත වශයෙන්ම, කාන්තාවන් දුම්පානයෙන් අධෛර්යමත් කිරීම සඳහා වන රාජ්‍ය ව්‍යාපාර සඳහා කාන්තාවන් යොදා ගැනීම සුලභව සිදුවෙනවා.
රාජ්‍ය රූපවාහිනිය වරක් “අතිරේක ගුණාත්මක බවින් යුත් ජීවිතයට තර්ජනයක් වන ජීවිතයක්” නමින් වැඩසටහනක් විකාශය කළ අතර එහිදී කාන්තාවන් පිරිමි දුම් පානය කරන්නන්ට බැණ වැදුණු අතර ‘ඔවුන් පවුල් ජීවිතය සහ රාජ්‍ය පවුල් කළ අසමතුන් ලෙස‘ නම් කිරීම සිදු වුණා.
Tobacco Atlas විසින් රැස් කරන ලද දත්ත වලට අනුව සෑම වසරකම දුම්කොළ භාවිතය නිසා ඇතිවන රෝගාබාධ හේතුවෙන් උතුරු කොරියාවේ පුද්ගලයින් 71,300කට අධික පිරිසක් මිය යනවා. මේ තත්ත්වය උතුරු කොරියාවට සමාන මිලියන 25කට වැඩි ජනගහනයක් සිටින ඔස්ට්‍රේලියාව හා සසදා බලන විට එරටින් වාර්තා වන්නේ 22,200කට ආසන්න මරණ සංඛ්‍යාවක්.
ඉතින් මෙම උද්ඝෝෂණ අත්කර ගෙන ඇත්තේ කුමක්ද?
සමහර සෞඛ්‍ය විශේෂඥයින් සිතන්නේ උතුරු කොරියානු රජයේ මෙම මුල පිරීම් බලපෑමක් ඇති කරන බවයි.
“නවතම සංඛ්‍යා ලේඛන අනුව උතුරු කොරියානු වැඩිහිටි පිරිමින්ගෙන් අඩකටත් වඩා අඩු හෝ 46.1% ක් දුම් පානය කරන්නන් බව හදුනාගෙන තිබෙනවා. මෙය 2009 දී 52.3% සිට පහත වැටී තිබීම විශේෂත්වයක්. පසුගිය වසර 13 කට වැඩි කාලයක් තිස්සේ උතුරු කොරියාවට ගිය සංචාර 20කට වැඩි සංඛ්‍යාවක් තුළ, පියොංයැං හි දුම් පානය කරන්නන් පහළ යමින් තිබෙන බව මම දැක්කා. විශේෂයෙන් තරුණ පිරිමින් තුළ ඒ පහළ වැටීම මම නිරීක්ෂණය කළා‘ යැයි හාවඩ් වෛද්‍ය විද්‍යාලයේ කොරියාවේ සෞඛ්‍ය ප්‍රතිපත්ති ව්‍යාපෘතියේ අධ්‍යක්ෂ කී බී පාක් බීබීසී අධීක්ෂණ ආයතනයට පැවසුවා.
නමුත් උතුරු කොරියාවේ සිගරට් පහසුවෙන් ලබා ගත හැකිවීම සහ දැරිය හැකි මිලකට අලෙවි කිරීමට ගැලුවක් බව පෙනෙනවා.
“බොහෝ ජාතීන් මෙන්, උතුරු කොරියාව ද දුම්පානය නැවැත්වීම වැනි නවීන සෞඛ්‍ය ප්‍රතිපත්ති ඇතුළත් නවීනත්වය පිළිබඳ තමන්ගේම සංකල්පයක් කරා ගමන් කරනවා. පාලන තන්ත්‍රයේ අභිලාෂයන් සහ යථාර්ථයේ සිදුවන දේ අතර වෙනස බොහෝ විට විශාල යි. එම බෙදීම රටේ දුම්පානය තුළ දැකිය හැකියි. එහි වර්ධනය වන දුම් පානය කිරීමේ සංස්කෘතියට එදිරිව ප්‍රතිපත්ති තුළ එය පැහැදිලිව දැකගත හැකියි ”මින් චාවෝ චෝයි පවසනවා.
සමහර විශ්ලේෂකයින් සිතන්නේ පුරුද්දට පයින් ගැසීමට වඩා ශක්තිමත් වැළැක්වීමක් අවශ්‍ය බවයි.
“දුම්වැටි විරෝධී ව්‍යාපාර බොහෝ විට නිශ්චිත ස්ථානවල දුම්පානය අඩු කිරීම අරමුණු කර ගෙන තිබෙනවා. පූර්ණ අධිෂ්ඨාන ශක්තිය හැරුණු විට, උතුරු කොරියාවේ පුද්ගලයෙකුට දුම්පානයෙන් ඉවත්වීමට උපකාර කිරීමට බොහෝ යාන්ත්‍රණ නැහැ‘ බැන්ෆිල් මහතා පවනෙවා.
‘ නිතරම, යන යන තැන සිගරැට්ටුවක් දල්වා ගෙන සිටින උතුරු කොරියානු නායකයා මීට වඩා හොඳ ආදර්ශයක් ලබා දෙනවා නම් එය කෙතරම් ප්‍රබල පණිවිඩයක් වනු ඇත්දැයි සිතා බලන්න. ඇත්ත වශයෙන්ම එය කවදා හෝ සිදුවනු ඇත්දැයි සිතාගත නොහැකියි‘
බී.බී.සී වාර්තාවක් ඇසුරිණි – සකස් කළේ – තීක්ෂණ වෙළෙන්එගොඩ
