මධ්‍යසාර භාවිතය හා සම්බන්ධ සෞඛ්‍ය ගැටලු විසඳීමට ශ්‍රී ලංකාව වාර්ෂිකව රුපියල් බිලියන 237ක් වැය කරන බව මධ්‍යසාර හා මත්ද්‍රව්‍ය තොරතුරු මධ්‍යස්ථානය (Alcohol and Drug Information Centre – ADIC) පවසයි.
එහි විධායක අධ්‍යක්ෂ සම්පත් ද සේරම් ප්‍රකාශ කළේ ශ්‍රී ලංකාවේ මත්පැන් පානය දිනකට පුද්ගලයන් 50 දෙනෙකුගේ මරණ සඳහා වගකිව යුතු බවත්, එය වාර්ෂිකව ජීවිත 15,000ත් 20,000 ත් අතර සංඛ්‍යාවක් වන බවත්ය.
වාර්ෂිකව මිලියන තුනකට ආසන්න අකල් මරණ සංඛ්‍යාවක් මධ්‍යසාර භාවිතය හේතුවෙන් සිදුවන බවට ගෝලීය ඇස්තමේන්තු අනුව පෙනී යන බව පෙන්වා දුන් ඔහු මෙම මරණ වලින් 10 න් 8 ක්ම වළක්වා ගත හැකි අතර බෝ නොවන රෝග (non-communicable diseases – NCDs) සමඟ සම්බන්ධ වන බව ද පෙන්වා දුන්නේය.
ශ්‍රී ලංකාව තුළ, හෘද රෝග, පිළිකා සහ ශ්වසන රෝග වැනි NCD සඳහා ප්‍රමුඛතම දායකත්වය සපයන්නේ මත්පැන් ය.
2022 දී රජය මධ්‍යසාර බදුවලින් රුපියල් බිලියන 165ක ආදායමක් උපයා ඇති නමුත් මධ්‍යසාර පරිභෝජනයේ සමස්ත ආර්ථික පිරිවැය රුපියල් බිලියන 237ක් වන අතර ඒය මධ්‍යසාර බදු වශයෙන් උපයා ඇති ආදායම ඉක්මවයි.
එක්සත් ජාතීන්ගේ සංවර්ධන වැඩසටහනේ (UNDP) වාර්තාවකින් හෙළි වූයේ මත්පැන් භාවිතය හා සම්බන්ධ මූල්‍ය හා සෞඛ්‍ය පිරිවැය ආර්ථිකයට සහ මහජන සෞඛ්‍යයට ඇති පුළුල් බලපෑම පිළිබඳ කනස්සල්ල මතු කරමින් ඕනෑම විභව ආදායමක් යටපත් කරන බවයි.
මධ්‍යසාර කර්මාන්තය ළමයින් සහ තරුණයින් ඇතුළු සියලුම ජනතාව ඉලක්ක කර ගනිමින් සදාචාර විරෝධී සහ නීති විරෝධී ලෙස තම නිෂ්පාදන ප්‍රවර්ධනය කිරීම දිගටම කරගෙන යන බව පෙන්වා දුන් ද සේරම් මහතා රජය මෙන්ම ජනමාධ්‍ය ඇතුළු බලපෑම් කණ්ඩායම් ද මේ සම්බන්ධයෙන් දැඩි අවධානයක් යොමුකරමින් මැත්පැන් භාවිතයෙන් ජනතාව ගළවා ගැනීමට පියවර ගත යුතු බව ද අවධාරණය කළේය.
