පියයුරු පිළිකා ගැන මේ තොරතුරු ඔබ දැන සිටියා ද?

ජීවිත අවදානමක් සහිත බෝ නොවන රෝග අතර පිළිකාව ප්‍රධාන තැනක් ගනී. ඒ අතරින්, ලෝකයේත්, ශ්‍රී ලංකාවේත් කාන්තාවන් අතර බහුලව දක්නට ඇත්තේ පියයුරු පිළිකා ය.

පියයුරු පිළිකාව හේතුවෙන් වසරකට ශ්‍රී ලංකාවේ කාන්තාවන් 1000කට ආසන්න සංඛ්‍යාවකගේ ජීවිත අහිමි වන අතර, මුල් අවධියේදී හඳුනා ගැනීමෙන් පියයුරු පිළිකා සම්පූර්ණයෙන් ම සුව කළ හැකි බව වෛද්‍ය මතය වේ.

පියයුරු පිළිකා කාන්තාවන්ට ආවේණික රෝගයක් ලෙස බොහෝ දෙනෙකු විශ්වාස කළ ද, එය පිරිමින්ටත් වැළඳෙන බව ඔබ දන්නවා ද?

පියයුරු පිළිකා පිළිබඳ දැනුවත් කිරීමේ මාසය ලෙස ඔක්තෝබර් මාසය නම් කර තිබේ.

‘කාන්තාවන් අතර බහුල ම සහ ලෝකයේ බහුල ම පිළිකාව’

“ඔක්කොම පිළිකාවලින් අපේ රටේත්, ලෝකයේත් වැඩිපුර ම තියෙන්නේ පියයුරු පිළිකාව. කාන්තාවන්ගේ බහුල ම සහ ලෝකයේ බහුල ම පිළිකාව තමයි, පියයුරු පිළිකාව කියලා කියන්නේ,” යැයි ජාතික පිළිකා මර්දන වැඩසටහනේ ප්‍රජා වෛද්‍ය විශේෂඥ හසරැලි ප්‍රනාන්දු පැවසීය.

වෛද්‍යවරිය පැවසූ ආකාරයට 2021 වසරේ අවසන් වරට එක් රැස් කර ගන්නා ලද දත්තවලට අනුව මෙරටින් පියයුරු පිළිකාවට ගොදුරු වූ කාන්තාවන් 5,485 දෙනෙකු හඳුනාගෙන ඇති අතර පිරිමින් 124 දෙනෙකුට පියයුරු පිළිකා රෝගය වැළඳී තිබේ.

රෝග ලක්ෂණ මොනවා ද?

“පියයුරක ගැටිත්තක් එන්න පුළුවන්, එහෙම නැති නම් හැඩයේ හෝ ප්‍රමාණයේ වෙනසක් වෙන්න පුළුවන්, සමේ පාටේ වෙනසක්, රතු පාට වීමක් වගේ හෝ සම ඝන වීමක් වෙන්න පුළුවන්, පියයුරුවල වේදනාවක් ඇති වෙන්න පුළුවන්, වළ ගැසීමක් එන්න පුළුවන්, එහෙම නැතිනම් තන පුඩුවල ඇති වෙන වෙනස්කමක් වෙන්න පුළුවන්, ගිලීයාමක් වෙන්නත් පුළුවන්. නැතිනම් තන පුඩුවලින් අසාමාන්‍ය ශ්‍රාවයක් එන්න පුළුවන්, පියයුරේ ඇරෙන්න කිහිල්ලේ ඇති වන ගැටිත්තක් පියයුරු පිළිකාවක මූලික ලක්ෂණයක් වෙන්න පුළුවන්.”

වෛද්‍ය හසරැලි ප්‍රනාන්දු පියයුරු පිළිකා රෝගයේ සුලබ රෝග ලක්ෂණ එලෙස විස්තර කළා ය.

“කාන්තාවක් වීම කියන එක ම අවදානමක් වෙනවා,” යැයි වෛද්‍යවරිය පියයුරු පිළිකා අවදානම සහිත පුද්ගලයන් ගැන විස්තර කරමින් පැවසුවා ය.

පිරිමි පුද්ගලයන්ට වඩා කාන්තාවන්ට පියයුරු පිළිකා වැළඳිමේ අවදානම සිය ගුණයකින් පමණ වැඩි බව ද ඇය සඳහන් කළා ය.

“වයස අවුරුදු 50ට වැඩි කාන්තාවන්ට අවදානම වැඩි යි. එකේ තේරුම 50ට අඩු අයට හැදෙන්නේ නැහැ කියන එක නෙමෙයි. සංඛ්‍යාත්මකව ගත්තා ම 50ට වැඩි අයට තමයි බහුතරයක් හැදිලා තියෙන්නේ.”

“අනිත් එක තමයි පවුලේ කාට හරි තිබුණා නම්, ඒක මව් පර්ශවයේ, පිය පර්ශවයේ දෙන්නගෙන් ඕන කෙනෙක්ගේ වෙන්න පුළුවන්. එහෙම කාට හරි ඥාතියෙකුට තිබුණා නම් එතනදිත් අවදානම වැඩි වෙනවා. එතනදි ඥාතියාට අවුරුදු 35න් 40න් වගේ හැදුණා නම් ඒ අවදානම වැඩි යි, අවුරුදු හැත්තෑවේ කෙනෙකුට හැදුණා ට වඩා,” යැයි ඇය පැවසීය.

පවුල් ඉතිහාසය හැරුණු විට දුම් පානය, මත්පැන් භාවිතය මෙන් ම හෝර්මෝන ප්‍රතිකාර දීර්ඝ කාලීනව ලබා ගැනීම ආදී ක්‍රියාකාරකම්වලින් ද පියයුරු පිළිකාවට ගොදුරු විමේ අවදානමක් ඇතැයි ප්‍රජා වෛද්‍ය විශේෂඥවරිය පෙන්වා දුන්නා ය.

දරුවන් නොමැති කාන්තාවන් මෙන් ම අවුරුදු 30ට පෙර දරුවන් පිළිසිඳ නොගත් කාන්තාවන් ද අවදානම් කණ්ඩයට අයත් බව ද වෛද්‍යවරිය පැවසුවා ය.

කෙසේ වෙතත්, යමෙකු පියයුරු පිළිකාවට ගොදුරු වූ හේතුව කුමක් දැයි නිශ්චිතව කිව නොහැකි බව ද ඇය සඳහන් කළා ය.

ස්වයං පියයුරු පරීක්ෂාව වැදගත් ඇයි?

“අවුරුදු 20ට වඩා වැඩි නම් හැම කාන්තාවක් ම මාසයකට සැරයක් ස්වයං පියයුරු පරීක්ෂාව කර ගන්න ඕනේ. ස්වයං පියයුරු පරීක්ෂාව කියන්නේ තමන් ම තමන්ගේ පියයුරු පරීක්ෂා කර ගැනීම. ඒකේ පියවර කිහිපයක් තියෙනවා. එකක් පියවි ඇසින් බලලා පරීක්ෂා කරන්න පුළුවන්, අනිත් එක අතින් අල්ලා බලලා පරීක්ෂා කරන්න පුළුවන්. මේක කණ්ණාඩියක් ඉස්සරහ කරන්න ඕනේ, පොඩි කාලයක් ඇතුළත කර ගන්න පුළුවන්.”

ස්වයං පියයුරු පරීක්ෂාව පිළිබඳ විස්තර තමන්ගේ පවුල් සෞඛ්‍ය සේවිකාවගෙන් හෝ ජාතික පිළිකා මර්දන වැඩසටහනේ වෙබ් අඩවියට පිවිස එහි “ඔබ විසින්, ඔබ වෙනුවෙන්” යන භාෂා තුනකින් සකසා ඇති පියයුරු පිළිකා ස්වයං පරීක්ෂණ අත්පොතෙහි උපදෙස්වලට අනුව තමන්ට ම පරීක්ෂා කර ගත හැකි ය.

මාසයකට වරක් කරන පරීක්ෂාව මගින් තමන්ගේ ශරීරයේ පියයුරුවල ස්වභාවය ගැන තමන්ට අදහසක් ඇති වන බවත් පියයුරුවල යම් වෙනසක් ඇති වුවහොත් තමන්ට ම එය හඳුනා ගැනීමේ හැකියාව ලැබෙන බවත් ජාතික පිළිකා මර්දන වැඩසටහනේ ප්‍රජා වෛද්‍ය විශේෂඥ හසරැලි ප්‍රනාන්දු කියා සිටියා ය.

රෝග ලක්ෂණ තිබේ නම් කළ යුතු දේ

යම් පුද්ගලයෙකු ස්වයං පරීක්ෂාව හරහා පියයුරු පිළිකා රෝග ලක්ෂණ ඇති බව හඳුනා ගතහොත් ගත යුතු පියවර සම්බන්ධයෙන් ද බීබීසි සිංහල සේවය විශේෂඥ වෛද්‍යවරියගෙන් විමසීමක් කළේ ය.

“මොනවා හරි තිබුණා වුණත්, නැති වුණත් අවුරුදු 35-40 වෙද්දි සෞඛ්‍ය වෛද්‍ය නිලධාරී කාර්යාලවල තියෙන ස්වනාරී සායනයේදී කාන්තාවන් සායනික පියයුරු පරීක්ෂාවට ලක් කරනවා. ඒ හැර අපි දැනුවත් කරනවා අවුරුදු 20 ඉඳන් 40 වෙනකම් අඩු තරමින් අවුරුදු 3කට සැරයක්වත් එහෙම පෙන්න ගන්න කියලා. අවුරුදු 40ට වැඩි නම් වාර්ෂිකව පෙන්න ගන්න කියලා.”

“සුව දිවි සායන කියලා හොස්පිටල්වල තියෙනවා ක්ලිනික් එකක්. ඒකට ගිහිල්ලා පෙන්නන්නත් පුළුවන්. ඒ හැර පිළිකා කලින් හඳුනා ගැනීමේ මධ්‍යස්ථාන කියලා දැනට ලංකාවේ මධ්‍යස්ථාන 5ක් තියෙනවා. නාරාහේන්පිට, රත්නපුර, මාතර, ගාල්ල, යාපනය, මඩකලපුව, මේවා සතියේ දවස් 5 ම වැඩ කරනවා. එතනට කවුරුත් යොමු කිරිමක් අවශ්‍ය වෙන්නේ නැහැ. තමන්ට සැකයක් තියෙනවා නම් පෙන්න ගන්න පුළුවන්.”

මෙම සියලු සේවාවන් අදාළ රජයේ සායනවලින් නොමිලේ සිදු කරනු ලබන බව ද විශේෂඥ වෛද්‍ය හසරැලි ප්‍රනාන්දු පැවසුවා ය.

‘වැරදි උපදෙස් මරණයට අත වැනීමක් වෙන්න පුළුවන්’

“මොකක් හරි වෙනසක් තිබුණොත් ගෙදර මිනිස්සුන්ගෙනුයි, එහා ගෙදර එක්කෙනාගෙනුයි උපදෙස් ගන්නේ නැතුව වෛද්‍යවරයා වෙත යොමු වීම තමයි වැදගත් වෙන්නේ. වෙන වෙන ප්‍රතිකාර කර කර ඉඳලා පස්සේ ආවොත් කරන්න දෙයක් නැහැ.”

“පියයුරු පිළිකාව කියන්නේ මැරෙන්න ඕන ලෙඩක් නෙමෙයි. කලින් හඳුනා ගත්තා ම හොඳ කරන්න පුළුවන් ලෙඩක්. ඒක නිසා බය වෙලා, හැංගිලා ඉන්නේ නැතුව වහා ම ප්‍රතිකාර සඳහා යොමු වෙන්න ඕනේ. අනිත් එක කාන්තාවන්ගේ ප්‍රශ්නයක් තමයි, අනිත් අයගේ වැඩ ඔක්කෝම ඉවර වෙලා තමයි තමන් ගැන බලන්නේ. එහෙම පරක්කු වෙලා ගියොත් ඉතින් මරණයට අත වැනීමක් වෙන්න පුළුවන්,” යැයි ජාතික පිළිකා මර්දන වැඩසටහනේ ප්‍රජා වෛද්‍ය විශේෂඥ හසරැලි ප්‍රනාන්දු වෛද්‍යවරිය වැඩිදුරටත් අනතුරු ඇඟවූවා ය.

Source: bbc sandesaya