මූල්‍ය අර්බුදයකට මුහුණ දෙන ශ්‍රී ලංකාවට ආහාර, ඖෂධ සහ අනෙකුත් අත්‍යවශ්‍ය ද්‍රව්‍ය ප්‍රසම්පාදනය කිරීම සඳහා ඉන්දියාව ඩොලර් බිලියනයක ණය පහසුකමක් ලබා දී ඇත.
ඉන්දීය රාජ්‍ය බැංකුව (SBI) සහ ශ්‍රී ලංකා රජය අතර ණය පහසුකම් සඳහා ගිවිසුමක් බ්‍රහස්පතින්දා නවදිල්ලියේ දී අත්සන් කරන ලදී.
ඉන්දීය මුදල් අමාත්‍ය නිර්මලා සීතාරාමන්, ඉන්දීය විදේශ කටයුතු අමාත්‍ය එස් ජයශංකර් සහ ඉන්දියාවේ සංචාරයක නිරත ශ්‍රී ලංකාවේ මුදල් අමාත්‍ය බැසිල් රාජපක්ෂ මෙම අවස්ථාවට එක්ව සිටියහ.
අමාත්‍යවරු අන්‍යෝන්‍ය අවශ්‍යතා සහ ආර්ථික සහයෝගීතාවය පිළිබඳ පුළුල් පරාසයක කරුණු සාකච්ඡා කළ බව ඉන්දීය මුදල් අමාත්‍යාංශය විසින් ට්විටර් පණිවුඩයක් නිකුත් කරමින් කියා සිටියේය.
ගිවිසුම අත්සන් කිරීම ට්විටර් ඔස්සේ නිවේදනය කරමින් ඉන්දීය විදේශ කටයුතු අමාත්‍ය ජයිශංකර් කියා සිටියේ ඉන්දියාවේ ‘අසල්වැසියන් පළමුව’ ප්‍රතිපත්තියට අනුකූලව ඉන්දියාව ශ්‍රී ලංකාව සමඟ සිටින බවයි.
“පළමුව අසල්වැසි. ඉන්දියාව සිටින්නේ ශ්‍රී ලංකාව සමඟයි. අත්‍යවශ්‍ය භාණ්ඩ සැපයීම සඳහා ඇමෙරිකානු ඩොලර් බිලියන 1 ක ණය සහනයක් අත්සන් කර ඇත.
බදාදා, ශ්‍රී ලංකා මුදල් අමාත්‍යවරයා ඉන්දීය අගමැති නරේන්ද්‍ර මෝදි හමුවී ද්විපාර්ශ්වික ආර්ථික සහයෝගීතාව ඉහළ නැංවීම සඳහා දෙරට විසින් ගෙන ඇති මුලපිරීම් පිළිබඳව ඔහුව දැනුවත් කර තිබේ. ශ්‍රී ලංකාවේ ආර්ථිකයට ඉන්දියාව ලබා දෙන සහයෝගයට ස්තූතිය පළ කරන බවද ඔහු පැවසීය.
ඉන්දීය විදේශ කටයුතු අමාත්‍යාංශයේ ප්‍රකාශයකට අනුව, අග්‍රාමාත්‍ය මෝදි ඉන්දියාවේ ‘අසල්වැසි ප්‍රථම’ ප්‍රතිපත්තිය සහ එහි S.A.G.A.R (කලාපයේ සැමට ආරක්ෂාව සහ වර්ධනය) මූලධර්මය තුළ ශ්‍රී ලංකාව දරන ප්‍රධාන භූමිකාව ගැන කතා කළේය.
“ඉන්දියාව ශ්‍රී ලංකාවේ මිත්‍රශීලී ජනතාව සමඟ දිගටම සිටින බව ඔහු නැවත අවධාරණය කළේය,” ඉන්දීය විදේශ කටයුතු අමාත්‍යාංශය වැඩිදුරටත් ප්‍රකාශ කළේය.
“සංස්කෘතික ක්‍ෂේත්‍රය ඇතුළුව දෙරට අතර ජනතාව අතර සබඳතා පුළුල් වන බව මුදල් අමාත්‍ය රාජපක්ෂ විසින් සටහන් කරන ලදී” යනුවෙන් ඉන්දීය විදේශ කටයුතු අමාත්‍යාංශය ප්‍රකාශයේ සඳහන් වේ.
“බෞද්ධ සහ රාමායණ සංචාරක පරිපථ ඒකාබද්ධව ප්‍රවර්ධනය කිරීම ඇතුළුව සංචාරක ප්‍රවාහය වැඩි කිරීමේ හැකියාව ඉන්දීය අග්‍රාමාත්‍යවරයා පෙන්වා දුන්නේය.
දෙසැම්බර් මාසයේදී ශ්‍රී ලංකා මුදල් අමාත්‍යවරයාගේ අවසන් ඉන්දීය සංචාරයේදී දෙරට අතර ආර්ථික සහයෝගීතාවයේ කරුණු හතරකින් යුත් පැකේජයක් සම්මත කර ගෙන තිබුණි. ආහාර සහ ඖෂධ ආනයනය ආවරණය කිරීම සඳහා ණය සහනය සහ මුදල් හුවමාරු කිරීමේ වැඩපිළිවෙළක් මෙයට ඇතුළත් විය.
