ඇමති ප්‍රසන්න රණතුංග මහතා වෙනුවෙන් ශ්‍රී ලංකා නිදහස් පක්ෂ නීතිඥවරුන් අධිකරණයේදී මුණ ගැසීමට සූදානම් බව ගම්පහ දිස්ත්‍රික් ශ්‍රී ලංකා පොදුජන නීතිඥ සංවිධානය අවධාරණය කරයි. ප්‍රසන්න රණතුංග මහතාට එරෙහිව නඩු දමන බවට ශ්‍රී ලංකා නිදහස් නීතිඥ සංගමය කළ ප්‍රකාශය කිසිදු නීතිමය පදනමක් නොමැති ප්‍රකාශයක් බවත් එය තනිකරම දේශපාලන තර්ජනයක් බවත් එම සංගමය පෙන්වා දෙයි.
මෛත්‍රීපාල සිරිසේන මහතා සම්බන්ධයෙන් කරනු ලබන ප්‍රකාශ සම්බන්ධයෙන් නඩු දමන බවට ශ්‍රී ලංකා නිදහස් පක්ෂ නීතිඥ සංගමය පසුගිය දා කළ ප්‍රකාශයකට ප්‍රතිචාර දක්වමින් ශ්‍රී ලංකා පොදුජන නීතිඥ සංගමයේ ගම්පහ දිසාවේ නීතිඥවරු මේ බව අවධාරණය කළහ.
එහි දි එම නීතිඥවරු මෙසේ ද කීහ.
ගම්පහ දිස්ත්‍රික් ශ්‍රී ලංකා පොදුජන නිතිඥ සංගමයේ සභාපති නීතිඥ සරල කරුණාරත්න මහතා
සාපරාධි අපරධ නීතිය දැනට ලංකාවේ වලංගු නීතියක් නොවෙයි. යම් කෙනෙක් අපහාසයක් කළොත් ඒ සම්බන්ධයෙන් අගතියට පත් වන පාර්ශවයට වන්දියක් ඉල්ලන්න පුළුවන්. සාධාරණ නඩු නිමිත්තක් තියනවා කියලා හිතනවානම් මේ අය කරන්න ඕනෑ එන්තරවාසියක් එවන එක මිසක් නඩු දානවා යැයි තර්ජනය කරන එක නෙමෙයි. එන්තරවාසියක් ලිඛිතව එවනවානම් ඒකට උත්තර බදින්න ලෑස්තියි. ඒ වගේම ඔය කියන ශ්‍රී ලංකා නිදහස් පක්ෂයේ නීතිඥවරුන්ව අධිකරණයේදී මුණ ගැසීමට අපි කැමැත්තෙන් ඉන්නවා.
ගම්පහ දිස්ත්‍රික් නායක ප්‍රසන්න රණතුංග මහතා වෙනුවෙන් අපි ශ්‍රී ලංකා පොදුජන නීතිඥවරුන්ගේ සංගමයේ ඕනෑම නීතිමය කටයුත්තකදී පෙරට එන්න ලෑස්තියි. ප්‍රසන්න රණතුංග ඇමතිතුමාට එරෙහිව නඩු පැවරීම කිසිසේත් සදාචාරාත්මක නෑ. ඒ වගේම නීත්‍යානුකූල නෑ.
හිටපු ජනාධිපතිවරයාව එක්සත් ජාතික පක්ෂය, සමගි ජනබලවේගය මොනතරම් විවේචනය කරනවාද? ඊයේ පෙරේදා රවුෆ් හකීම්, සිරිසේන හිටපු ජනාධිපතිවරයාට නිර්දය ප්‍රහාරයක් එල්ල කළා. ඒ ප්‍රකාශ සම්බන්ධයෙන් මුණිවත රකින ශ්‍රීලනිප නීතීඥ සංගමය ප්‍රසන්න රණතුංගට එරෙහිව නඩු පවරන බවට තර්ජනය කිරීම දේශපාලන වුවමනාව මත සිදුවන්නක් මිස නීතිමය පසුබිමක් ඇතිව සිදු කරන්නක් නොවේ. ප්‍රසන්න රණතුංග ඇමතිතුමා කියන දේ ඇත්ත. ශ්‍රී ලංකා නිදහස් පක්ෂය ඔවුන්ගේ විරුද්ධවාදීන් ලෙස සලකන්නේ ශ්‍රී ලංකා පොදුජන පෙරමුණ බවයි මෙහිදී පැහැදිලි වන්නේ.
ජනාධිපති නීතීඥ ඩි.ඒ.පි.වීරත්න මහතා
ප්‍රසන්න රණතුංග මහතාගේ ප්‍රකාශ මගින් සන්ධානයේ ගිවිසුම් උල්ලංගණය බවට කරන ප්‍රකාශ පදනම් විරහිතයි. ඔහුගේ ප්‍රකාශ වලින් මැතිවරණ නීතිය උල්ලංගණය කිරීමක් වන්නේ නෑ. අද තියෙන්නේ මනාප ක්‍රමයක්. එතකොට මනාප ඉල්ලීම පක්ෂයකට ඡන්දය දෙන්න කියන එකත් වැරදීනේ. මේ මැතිවරණ ක්‍රමය, මනාප ක්‍රමය යටතේ ඡන්දය දෙන්න කියන එක වරදක් නෙමේ.
ප්‍රසන්න රණතුංග කියන්නේ ගම්පහ නායකයා. ගම්පහ තමයි හැම මැතිවරණයකදීම රටේම ප්‍රතිඵලය උස්සලා තියෙන්නේ. ප්‍රසන්න රණතුංගට ගහනවා කියන්නේ මේ ප්‍රතිඵලයට ගහනවා කියන එකයි. මේක මිත්‍ර පාර්ශවයේ සිටින සතුරන්ගේ වැඩක් ලෙසයි අපිට පෙනෙන්නේ. මේ ගහන්නේ ප්‍රසන්න රණතුංගට. ඒකේ අරමුණ ගම්පහ දිස්ත්‍රික්කය අඩාල කිරීම. උසාවියේ දී හම්බවෙන්න කිව්වා. මම උසාවි එනකොට ඔය නීතීඥ මහත්වරු ඉපදිලාවත් නැතිව ඇති. උසාවියට නඩු නිමිත්තක් නැත්නම් ඒ නඩුව විසි කරනවා. ඒ ගාස්තුවට යටත්ව මේ අය ප්‍රසන්න රණතුංගට එරෙහිව නඩු දැම්මොත් වෙන්නේ ඕකයි. අපි කියන්නේ නෑ අහවල් පක්ෂයට දෙන්න එපා කියලා අහවලාට ගෑවුනු එකෙකුටවත් දෙන්න එපා කියලයි කියන්නේ. තොප්පිය හරිනම් දාගත්තට අපිට කමක් නෑ.
