නිදහස්-ශරීර සංස්කෘතිය – Free-body culture සොබාදහම සමග සමගිය ප්‍රවර්ධනය කරන අතර, අද සමහර ජර්මානුවන් නිරුවතින් හිරු රැස් විදීමට පමණක් නොව ක්‍රීඩා කිරීමට ද යොමුවී සිටිති
එක්සත් ජනපද පුරවැසියෙකු වන මම වසර හතරක් බර්ලිනයේ ජීවත් වීමෙන් පසු යළි මව්රට පැමිණි පසු ජර්මනියේ සිටියදී මා වඩාත් ඇළුම් කළ සහ සතුටු වූ ජර්මන් සංස්කෘතියේ වඩාත් රැඩිකල් ප්‍රවේශයක් වන ‘ප්‍රසිද්ධියේ නිරුවතින් සිටීම‘ තව දුරටත් පවත්වා ගෙන යාමට ප්‍රිය කළෙමි.
ප්‍රධාන ධාරාවේ ඇමරිකානු සංස්කෘතියේ ‘නිරුවත (nudity) සාමාන්‍යයෙන් ලිංගික (sexual) යැයි සලකනු ලැබුවද, මෙහි ජර්මනියේ, සමහර එදිනෙදා අවස්ථාවන්හිදී නිරුවත් වීම අසාමාන්‍ය දෙයක් නොවේ. මම නිරුවතින් සිටීමට ප්‍රිය කළ අතර සම්භාහන මධ්‍යස්ථානයට ගිය විට වඩාත් පහසුවෙන්, ඔවුන් ඉල්ලා සිටීමටත් පෙර නිරුවත්වීමි. මෙය සාමාන්‍ය යෙන් ඇමෙරිකාවේ සිදු නොවන දෙයකි. ‘ඇදුම් ගළවා දමන්න‘ ඔවුන්ට කිහිප වරක් කීමට සිදුවේ.
බර්ලිනයේ සහ තවත් බොහෝ ජර්මානු නගරවලෙ නිරුවතින් උද්‍යානවල විවේකය ගත කිරීම සහ හිරු රැස් නෑම සුලභ දසුනකි
මිනිසුන් කණ්ඩායමක් නිරුවතින් ප්‍රසිද්ධියේ සිටින අවස්ථාව දුටු මුල්ම දිනය මට කිසිදා අමතක නොවේ. මා එම මුල්ම අවස්ථාවට මුහුණ දුන්නේ බර්ලිනයේ දකුණු නියුකොල්න් දිස්ත්‍රික්කයේ හසන්හයිඩ් නම් උද්‍යානය හරහා ගමන් කරමින් සිටියදී දහවල් හිරු එළියේ දී නිරුවත් සිටින කණ්ඩායමක් මට හමු වූ විට ය. පසුව, මිතුරන් සමඟ කතා කිරීමෙන් හා තරමක් සැක සහිත ගූගල් සෙවුම් ඉතිහාසයක් ලබා ගැනීමෙන් පසුව, නගර උද්‍යානයක හෝ වෙරළ තීරයක හිරු එළිය ඇති ස්ථානයක නිරුවතින් විවේක ගැනීම බර්ලිනයේ චාරිත්‍රයක් බව මම දැන ගතිමි.
ස්වාභාවික ලෝකය තුළ ඔබේ සාරය යටපත් කිරීම ඓතිහාසිකව ප්‍රතිරෝධය සහ සහනය යන දෙකෙහිම ක්‍රියාවකි
මා දුටු දෙය බර්ලිනයේ “නිදහස් ශරීර සංස්කෘතිය free-body culture” පිළිබඳ උදාහරණයකි. එය ජර්මානු ප්‍රජාතන්ත්‍රවාදී ජනරජයේ Freikörperkultur (නැගෙනහිර ජර්මනිය FKK, සාමාන්‍යයෙන් කෙටි කර ඇති පරිදි, හෝ “GDR”) ජීවිතය සමඟ සමීපව සම්බන්ධ වී ඇත.
නමුත් ජර්මනියේ නිරුවත පොදු භාවිතයක් ලෙස 19 වන සියවසේ අග දක්වා දිව යයි. එය ස්පාඤ්ඤයේ වෙරළ තීරයක නිරුවත් වීම මෙන් නොව ඊටත් වඩා පුළුල් අරමුණක් සහිත ක්‍රියාවකි. එය නැගෙනහිර ජර්මනියේ (කොමියුනිස්ට් පාලන සමයේ) අධිපතිවාදී පාලනයට අභියෝග කරන තවත් නිර්මාණාත්මක ක්‍රියාකාරකමක් වූ අතර ස්වභාවිකත්වය හා බැදි ඓතිහාසික ප්‍රතිරෝධය සහ සහනය යන දෙකෙහිම ඒකාබද්ධ ක්‍රියාවකි.
“නිරුවතට ජර්මනියේ දීර්ඝ සම්ප්‍රදායක් ඇත” යැයි බර්ලිනයේ ෆ්‍රී විශ්ව විද්‍යාලයේ (Freie University in Berlin) නූතන ඉතිහාසය පිළිබඳ මහාචාර්ය ආන්ඩ් බවර්කැම්පර් පැවසීය.
විසිවන සියවස ආරම්භයේදී, කාබනික ආහාර, ලිංගික විමුක්තිය, විකල්ප වෛද්‍ය විද්‍යාව සහ සොබාදහමට සමීපව ජීවත්වීම සඳහා පෙනී සිටි දර්ශනයක් වන ‘ලෙබන්ස්රෙෆෝම් – Lebensreform සක්‍රියව පැවතුනි.
“නිරුවත යනු කාර්මික නූතනත්වයට එරෙහිව, 19 වන සියවසේ අග භාගයේ මතුවූ මෙම පුළුල් ව්‍යාපාරයේම කොටසකි,” බවර්කැම්පර් පැවසීය.
නිදහස්-ශරීර සංස්කෘතිය – හෝ “FKK” – ජර්මනිය පුරා නම් කරන ලද බොහෝ වෙරළ, කඳවුරු සහ උද්‍යානවල භාවිතා වේ
පොට්ස්ඩෑම්හි ලිබ්නිස් මධ්‍යස්ථානයේ ඉතිහාසඥ හැනෝ හොච්මුත් පවසන පරිදි , මෙම ප්‍රතිසංස්කරණ ව්‍යාපාරය ජීවත්වීම පිළිබඳ ආදර හැඟීම් නොතකා බර්ලිනය ඇතුළු විශාල නගරවල පුළුල් අවධානයක් දිනා ගත්තේය. වයිමර් යුගයේදී (1918-1929) එෆ්කේකේ වෙරළ තීරයන් හරහා එය වේගයෙන් පැතිර ගියේය.
බවර්කොම්පර්ට අනුව, “ඒකාධිපති සමාජයෙන් පසු නව නිදහසක් පිළිබඳ හැඟීමක් ඇති වූ අතර අධිරාජ්‍ය ජර්මනියේ (1878 සිට 1918 දක්වා) ගතානුගතික වටිනාකම් හුස්ම හිර කළේය.”
මිශ්‍ර-ස්ත්‍රී පුරුෂ නිරුවත් ව්‍යායාම (mixed-gender nudist exercise) දිරිගැන්වීම සඳහා 1926 දී ඇල්ෆ්‍රඩ් කෝච් බර්ලින් නිරුවත් පාසල ආරම්භ කළ අතර ‘එළිමහන් නිරුවත ස්වභාව ධර්මය හා සුවතා ප්‍රතිලාභ සමඟ සමගිය ප්‍රවර්ධනය කරයි‘ යන විශ්වාසය දිගටම පවත්වාගෙන ගියේය.
නාසි දෘෂ්ටිවාදය මුලින් මෙම ව්‍යාපාරය තහනම් කළ අතර එය ‘දුරාචාරයේ වසන්තයක්‘ ලෙස සලකන ලදි. නමුත් හොච්මුත් පැහැදිලි කළේ 1942 වන විට ප්‍රසිද්ධ නිරුවත් සීමාවන් ලිහිල් කර ඇති බවයි.
ජර්මනිය නැගෙනහිර සහ බටහරි වශයෙන් ‘පශ්චාත් යුද බෙදීමෙන්‘ දශක ගණනාවකට පසු “Free-body culture සැබවින්ම ව්‍යාප්ත වීමට පටන් ගත්තේ, විශේෂයෙන් නැඟෙනහිර දෙසිනි. නිරුවතින් වැළඳ ගැනීම තවදුරටත් ධනේශ්වර පන්තියට පමණක් සීමා නොවීය. ගමන්, පුද්ගලික නිදහස සහ පාරිභෝගික භාණ්ඩ අලෙවිය සීමා කරන ලද කොමියුනිස්ට් ජර්මනියෙ හි ජීවත් වන ජර්මානුවන් සඳහා, “Free-body culture අර්ධ වශයෙන් “ආරක්ෂිත කපාටයක්” ලෙස ක්‍රියා කළ බව බවර්කැම්පර් පවසයි.
එය මඳක් “නිදහස් චලනය” ලබා දීමෙන් ගැඹුරින් සීමා සහිත තත්වයක ආතතිය දුරු කිරීමේ ක්‍රමයක් බවට පත් විය.
නැගෙනහිර ජර්මනියේ FKK සංස්කෘතිය මල් හට ගත් අතර එය මර්දනකාරී කොමියුනිස්ට් රජයෙන් ගැලවීමක් ලෙස සේවය කළේය
නැගෙනහිර බර්ලිනයේ හැදී වැඩෙන දරුවෙකු ලෙස තම දෙමාපියන් සමඟ නිරුවත් වෙරළ තීරයට ගිය බව හොච්මුත් කියයි.
“පැන යාමේ හැඟීමක් තිබුණා,” ඔහු පැවසීය.
නැගෙනහිර ජර්මානුවන් සෑම විටම කොමියුනිස්ට් පක්ෂයේ සියලු ඉල්ලීම්වලට නිරාවරණය වූ අතර පක්ෂ රැලිවලට යාම හෝ සති අන්තයේ වැටුප් රහිතව පොදු කටයුතුවල නියැලීම ඔවුන් විසින් අඛණ්ඩව සිදු කළ යුතුව තිබුණි.
මුරණ්ඩු නැගෙනහිර ජර්මානුවන් මුල් අවදියේ දී දිගටම නිරුවතින් ස්නානය කරමින් සිටියදී (මුර සංචාරයේ යෙදෙන පොලිස් නිලධාරීන් ගැන විමසිල්ලෙන් සිටියදී) 1971 දී එරික් හොනෙකර් බලයට පත්වීමෙන් පසුව Free-body culture නැවත නිල වශයෙන් අවසර දෙනු ලැබීය.
බවර්කැම්පර්ට අනුව, හොනෙකර් යටතේ නැගෙනහිර ජර්මනිය විදේශ හා දේශීය ප්‍රතිපත්ති විවෘත කිරීමේ ක්‍රියාවලියක් ආරම්භ කළ අතර එය බාහිර ලෝකයට වඩාත් හිතකර ලෙස පෙනෙන උපක්‍රමයක් විය.
“ හරි, අපි නිරුවතට ඉඩ දෙන්නෙමු, ධෛර්යමත් කරන්නෙමු, අපි නිදහස් සමාජයක් ”යැයි තර්ක කිරීමට එය නැගෙනහිර ජර්මන් පාලකයින්ට බෙහෙවින් ප්‍රයෝජනවත් විය,” බවර්කැම්පර් පැවසීය.
1970 සහ 80 දශක වලදී නැගෙනහිර ජර්මානු රජය ලෝකයට වඩාත් විවෘතව පෙනෙන මාර්ගයක් ලෙස FKK පුහුණුවීමට ඉඩ දුන්නේය
නැගෙනහිර ජර්මනිය 1990 දී බටහිර සමඟ ඒකාබද්ධ වී හිටපු කොමියුනිස්ට් රාජ්‍යයේ සීමාවන් ඉවත් කළ දා සිට Free-body culture පහත වැටී ඇත.
1970 සහ 80 දශකවල සිය දහස් ගණන් නිරුවත් කඳවුරු, වෙරළ සහ උද්‍යාන සංවිධානය කර තිබුණි. 2019 දී ජර්මානු නිදහස් ශරීර සංස්කෘතිය සඳහා වූ සංගමය සතුව ඇත්තේ ලියාපදිංචි සාමාජිකයන් 30,000 කට අධික සංඛ්‍යාවක් පමණි. ඔවුන්ගෙන් බොහෝ දෙනෙක් 50 සහ 60 වයස්වල පසුවන අයයි.
අදටත්, Free-body culture ජර්මානු සංස්කෘතිය පිළිබඳ හැඟීමක් ඇති කරයි. මෙම ගිම්හානයේදී බර්ලින් විලක FKK ලෙස නම් කරන ලද ප්‍රදේශයක නිරුවත් මිනිසෙකුට තම ලැප්ටොප් පරිගණකය අඩංගු බෑගයක් සමඟ අපූරු දවසක් ගත කළ හැකිය.
ඇත්ත වශයෙන්ම, එෆ්.කේ.කේ සහ ජර්මනියේ දිගු කාලීන නිරුවත සම්ප්‍රදාය රට පුරා ඇඳුම් පැළඳුම් රහිත අවකාශයන් සහ මහජන නිරුවත නිරෝගී භාවයක් ලෙස පුළුල් ලෙස ඉවසා සිටියි. මා සොයාගත් පරිදි, එෆ්කේකේ අවකාශයන් තවමත් එතරම් වෙහෙස නොබලා සොයා ගත හැකි අතර ඒවා බොහෝ විට සෞඛ්‍ය කටයුතු සමග බැඳී ඇත.
මිනිසුන් නිරුවතින් දැකීමට ඔබ පුරුදු වී සිටින්නේ නම්, ඔබ නිරුවත ගැන වැඩි යමක් සිතන්නේ නැත
ලැයිස්තුගත කිරීමේ වෙබ් අඩවිය වන Nacktbaden.de ඔබට නිරුවතින් සිටිය හැකි ජර්මනිය පුරා වෙරළ සහ උද්‍යාන පිළිබඳ සංවිධානාත්මක ලැයිස්තුවක් ඉදිරිපත් කරයි.
බොහෝ ආකාරවලින්, FKK උරුමය බොහෝ නැගෙනහිර ජර්මානුවන් තවමත් එක්සත් කරන සාරධර්ම පිළිබඳ අවබෝධයක් සංචාරකයින්ට ලබා දෙයි.
අද, ජර්මනියේ මහජන නිරුවත පිළිබඳ ඉතිහාසය ශරීර ධනාත්මකතාව කෙරෙහි පුළුල් විවෘත මනසක් ඇති කර තිබේ
“නැගෙනහිර ජර්මනියේ මගේ පරම්පරාව තුළ මෙය තවමත් ඉතා ගැඹුරින් මුල් බැස ඇති බව මම සිතනවා. මමත් මෙය මගේ දරුවන්ට ලබා දීමට උත්සාහ කරනවා‘ නැගෙනහිර ජර්මනියේ මවක් වන ස්ටර්න්කොෆ් පැවසුවාය.
ස්ටර්න්කොෆ්ට අනුව, සිරුරු ලිංගික නොවන ආකාරයෙන් දැකීම මගින් මිනිසුන්ට ඔවුන්ගේ බාහිර පෙනුමෙන් ඔබ්බට ගොස් අන් අය දැකීමට හා ඔවුන් ගැන ඉගෙන ගැනීමට උපකාරී වේ. ඒ සියල්ල දරා ගැනීමෙන් ශරීරයක් පමණක් නොව පුද්ගලයා ද දැකීම පහසු කරයි.
“ඔබ මිනිසුන් නිරුවතින් දැකීමට පුරුදු වී සිටින්නේ නම්, එසේ පෙනී සිටීම ගැන ඔබ වැඩි යමක් සිතන්නේ නැහැ,” ඇය පැවසුවාය.
“මම හිතන්නේ මෙය පොදුවේ නැගෙනහිර ජර්මනියේ වඩාත් පුලුල්ව පැතිර ඇති දෙයක්: අපි මිනිසුන්ව විනිශ්චය කිරීමට උත්සාහ කරන්නේ ඔවුන්ගේ බාහිර පෙනුම නිසා නොව, අපි සැමවිටම ගැඹුරින් බැලීමට උත්සාහ කරමු‘
2020 නොවැම්බර් 10 වැනි දින බී.බී.සී. වාර්තාවකි – සැකසුම – තීක්ෂණ වෙළෙන්එගොඩ
